ಅಕ್ರಮ ಗೋ ಸಾಗಣೆ ತಡೆಯಲು ಶ್ರೀರಾಮ ಸೇನೆ ಆಗ್ರಹ, ಪ್ರತಿಭಟನೆ

ರಾಜ್ಯದಲ್ಲಿ ಗೋಹತ್ಯೆ ನಿಷೇಧ ಕಾನೂನು ಜಾರಿಯಲ್ಲಿದ್ದರೂ ಕಲಬುರಗಿಯಲ್ಲಿ ಅಕ್ರಮ ಗೋಹತ್ಯೆ ಮತ್ತು ಗೋಮಾಂಸ ಮಾರಾಟ ಎಗ್ಗಿಲ್ಲದೆ ನಡೆಯುತ್ತಿದೆ ಎಂದು ಪ್ರತಿಭಟನಾಕಾರರು ಆಕ್ರೋಶ ವ್ಯಕ್ತಪಡಿಸಿದರು.

ಶ್ರೀರಾಮ ಸೇನೆ ಜಿಲ್ಲಾಧ್ಯಕ್ಷ ಲಕ್ಷಿ$್ಮಕಾಂತ ಸ್ವಾದಿ ಮಾತನಾಡಿ, ಹಿಂದುಗಳು ಪೂಜಿಸುವ ಗೋವಿನ ಹತ್ಯೆ ನಡೆಯಬಾರದು. ಹಿಂದುಗಳ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತರುವ ಕೃತ್ಯಗಳನ್ನು ಅಧಿಕಾರಿಗಳು ತಡೆಯಲು, ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳಬೇಕು ಎಂದು ಆಗ್ರಹಿಸಿದರು.

ಆಳಂದ ರಿಂಗ್​ ರಸ್ತೆ, ಹುಮನಾಬಾದ್​ ರಿಂಗ್​ ರಸ್ತೆ, ಸೇಡಂ ರಿಂಗ್​ ರಸ್ತೆ, ಶಹಾಬಾದ್​ ರಿಂಗ್​ ರಸ್ತೆ ಹಾಗೂ ಜೇವರ್ಗಿ ರಿಂಗ್​ ರಸ್ತೆಗಳಲ್ಲಿ 24 ಗಂಟೆ ಚೆಕ್​ಪೋಸ್ಟ್​ಗಳನ್ನು ಸ್ಥಾಪಿಸಿ ಅಕ್ರಮ ಗೋ ಸಾಗಾಟ ತಡೆಯುವಂತೆ ಮನವಿ ಮಾಡಿದರು.

ಬಕ್ರೀದ್​ ವೇಳೆ ಇತರೆ ರಾಜ್ಯಗಳಿಂದ ಅಕ್ರಮವಾಗಿ ತರಲಾಗುವ ಗೋವುಗಳು ಹಾಗೂ ಜಾನುವಾರುಗಳನ್ನು ರಕ್ಷಿಸಬೇಕು. ಅಕ್ರಮ ಸಾಗಣೆ ನಡೆಸುವ ವಾಹನಗಳು ಮತ್ತು ಮಾಲೀಕರ ವಿರುದ್ಧ ಕಾನೂನು ಪ್ರಕಾರ ಕಠಿಣ ಕ್ರಮ ಕೈಗೊಳ್ಳಬೇಕು. ರಾತ್ರಿ ಗೋ ರಕ್ಷಣೆ ಕಾರ್ಯದಲ್ಲಿ ತೊಡಗುವ ಕಾರ್ಯಕರ್ತರಿಗೆ ಸೂಕ್ತ ಪೊಲೀಸ್​ ಬಂದೋಬಸ್ತ್​ ಒದಗಿಸಬೇಕು ಎಂದು ಒತ್ತಾಯಿಸಿದರು.

ಪ್ರಮುಖರಾದ ವೀರೇಶ ಗಣಮುಖಿ, ವೀರೇಶ್​ ಕೊರಳ್ಳಿ, ರಾಮು ಸೇವಕ ಶಿವು, ಚನ್ನವಿರ ಸಿಂಗಿ, ಉದಯ ಸುಲ್ತಾನಪುರ, ವಿರೇಶ್​ ಬಿಂಗೆ, ಪ್ರಶಾಂತ ಶಿರೂರ್​, ಶರಣು ಶಿರೂರ, ಸಾಯಿನಾಥ ಸಾಸಟ್ಟಿ, ಗಣೇಶ ರಾಠೋಡ ಇತರರಿದ್ದರು.