ಕಲಬುರಗಿ ಕೃಷಿ ಮಾರುಕಟ್ಟೆಯಲ್ಲಿ ನೆಹರು ಮೂರ್ತಿ ಪ್ರತಿಷ್ಠಾಪನೆಗೆ ಆಕ್ಷೇಪ

ಗಂಜ್​ನ ಹನುಮಾನ ದೇವಸ್ಥಾನದಲ್ಲಿ ಸಭೆ ಸೇರಿದ ವರ್ತಕರು, ಎಪಿಎಂಸಿ ತಾತ್ಕಾಲಿಕ ಕಚೇರಿವರೆಗೆ ಆಹಾರ ಧಾನ್ಯ ಮತ್ತು ಬೀಜ ವ್ಯಾಪಾರಿಗಳ ಸಂಘದ ನೇತೃತ್ವದಲ್ಲಿ ಪ್ರತಿಭಟನಾ ಮೆರವಣಿಗೆ ನಡೆಸಿ, ಆಡಳಿತದ ನಿರ್ಧಾರಕ್ಕೆ ಆಕ್ಷೇಪ ವ್ಯಕ್ತಪಡಿಸಿ, ಕೃಷಿ ಮಾರಾಟ ಮಂಡಳಿ ನಿರ್ದೇಶಕರಿಗೆ ಮನವಿ ಸಲ್ಲಿಸಲಾಯಿತು.

ನೆಲಸಮಗೊಳಿಸಿದ ಸ್ಥಳವೂ ಎಪಿಎಂಸಿಯ ಕೇಂದ್ರ ಸ್ಥಳದಲ್ಲಿ ಇದೆ. ಆದರೆ ಸರ್ಕಾರ, ಸ್ಥಳಿಯ ಆಡಳಿತವೂ ದಿಢೀರ್​ ಎಂದು ನಿರ್ಧರಿಸಿ, ನೆಹರು ಪ್ರತಿಮೆ ಸ್ಥಾಪನೆಗೆ ಮುಂದಾಗಿರುವುದು ಸರಿಯಲ್ಲ. ಸಾರ್ವಜನಿಕ ಸ್ಥಳಗಳಲ್ಲಿ ಮೂರ್ತಿ, ಪ್ರತಿಮೆ ಸ್ಥಾಪಿಸಬಾರದು ಎಂದು ಕೋರ್ಟ್​ ಆದೇಶವಿದ್ದರೂ ಧಿಕ್ಕರಿಸಿರುವುದು ನ್ಯಾಯಾಂಗ ನಿಂದನೆ ಆಗುತ್ತದೆ. ಮೂರ್ತಿಯಿಂದ ಎಪಿಎಂಸಿ ಆವರಣದಲ್ಲಿ ರಾಜಕೀಯ ಕಲಹ ಸೃಷ್ಟಿಯಾಗುತ್ತವೆ. ನಿಯಮ ಉಲ್ಲಂಘಿಸಿ ಪ್ರತಿಮೆ ನಿರ್ಮಾಣಕ್ಕೆ ಮುಂದಾದರೆ ಉಗ್ರ ಹೋರಾಟ ಮಾಡಲಾಗುವುದು ಎಂದರು.

ರೈತರು ಮತ್ತು ವ್ಯಾಪಾರಿಗಳ ಜೀವನಾಡಿಯಾದ ಎಪಿಎಂಸಿ ಆಡಳಿತ ಕಚೇರಿಯನ್ನು ಸ್ಥಳಾಂತರಿಸಿದರೆ ಸಹಸ್ರಾರು ರೈತರಿಗೆ, ಇಡೀ ವರ್ತಕ ಸಮೂಹಕ್ಕೆ ಅನ್ಯಾಯವಾಗುತ್ತದೆ. ಪ್ರಸ್ತುತ ಎಪಿಎಂಸಿ ಕಚೇರಿಯ ಸ್ಥಳವೂ ಕೇಂದ್ರ ಭಾಗದಲ್ಲಿ ಇದ್ದು, ಇಲ್ಲಿ ಹೊಸ ಟೆಂಡರ್​ ಹಾಲ್​ ನಿರ್ಮಿಸುವುದು ಸೂಕ್ತ ಎಂದು ಪ್ರತಿಭಟನಾಕಾರರು ಒತ್ತಾಯಿಸಿದರು.