ನೀರಿಗಾಗಿ ಕಡಗಂಚಿ ಗ್ರಾಪಂಗೆ ಬೀಗ

ಆಳಂದ: ಕಡಗಂಚಿಯ ವಾರ್ಡ್​ 5 ಮತ್ತು 6ರಲ್ಲಿ 15 ದಿನಗಳಿಂದ ಕುಡಿಯುವ ನೀರು ಬಾರದ್ದರಿಂದ ಸಿಡಿದೆದ್ದ ಮಹಿಳೆಯರು ಗ್ರಾಮ ಪಂಚಾಯಿತಿಗೆ ಬೀಗ ಹಾಕಿ ಮಂಗಳವಾರ ಆಕ್ರೋಶ ವ್ಯಕ್ತಪಡಿಸಿದರು.

ಖಾಲಿ ಕೊಡಗಳೊಂದಿಗೆ ಆಗಮಿಸಿದ ಹೆಣ್ಮಕ್ಕಳು ಮಳೆ ಕೈಕೊಟ್ಟಿದ್ದರಿಂದ ಸಮಸ್ಯೆ ಉಂಟಾಗಿದ್ದು, ಪಂಪ್​ ಆಪರೇಟರ್​ಗಳು ಸರಿಯಾಗಿ ನೀರು ಪೂರೈಸುತ್ತಿಲ್ಲ. ಶಾಶ್ವತ ಪರಿಹಾರಕ್ಕೆ ಕ್ರಮ ಕೈಗೊಳ್ಳಬೇಕು ಎಂದು ಪಟ್ಟು ಹಿಡಿದರು. ನೋಡಲ್​ ಅಧಿಕಾರಿ ಸುರೇಂದ್ರ ಪಾಟೀಲ್​ ಸೂಚನೆ ಮೇರೆಗೆ ಸ್ಥಳಕ್ಕೆ ಆಗಮಿಸಿದ ಪಿಡಿಒ ಉಷಾ ಪಾಟೀಲ್​, ಬೇಡಿಕೆಗೆ ಸ್ಪಂದಿಸುವ ಭರವಸೆ ನೀಡಿದ ಬಳಿಕ ಪಂಚಾಯಿತಿ ಬೀಗ ತೆಗೆಯಲಾಯಿತು.

ಗ್ರಾಮಸ್ಥರಾದ ಅರುಣಕುಮಾರ ಇಟಗಿ, ಸಂಜುಕುಮಾರ ಘತ್ತರಗಿ, ಅಶೋಕ ಕಡಗಂಚಿ, ಮಲ್ಲಿಕಾರ್ಜುನ ಧುದನ, ಉಲ್ಲಾಸ ಸುತಾರ, ಶಿವಲೀಲಾ ಇಟಗಿ, ಲಕ್ಷಿ$್ಮ ಧೂಳೆ, ಲಕ್ಷ್ಮೀ ಇಟಗಿ, ಅಂಬಿಕಾ ಪಾಟೀಲ್​, ಶಿವಲೀಲಾ ಕುಡಕಿ, ಸಿದ್ದಮ್ಮ ಮಾದಗುಂಡ, ವಿಜಯಲಕ್ಷ್ಮೀ, ನಿಖಿಲ್​ ಕುಂಬಾರ, ಬಸವ್ವ ಜವಳಿ, ಕಾವೇರಿ ಕುಂಬಾರ, ಜಗದೇವಿ ಭೂಸನೂರ ಇತರರಿದ್ದರು.