ನರಗುಂದ: ತಾಲೂಕಿನ ಹುಣಸೀಕಟ್ಟಿ ಗ್ರಾಪಂ ಅಧ್ಯಕ್ಷೆಯಾಗಿ ಶೋಭಾ ಮುಳ್ಳೂರ ಉಪಾಧ್ಯಕ್ಷೆಯಾಗಿ ಶಾಂತವ್ವ ದ್ಯಾಮಪ್ಪ ದೇವಕ್ಕಿ ಆಯ್ಕೆಯಾದರು.
ಸೋಮವಾರ ಅಧ್ಯಕ್ಷ-ಉಪಾಧ್ಯಕ್ಷ ಸ್ಥಾನಕ್ಕೆ ಚುನಾವಣೆ ನಡೆಯಿತು. ಅಧ್ಯಕ್ಷ ಸ್ಥಾನಕ್ಕೆ ಶೋಭಾ ಬಸಪ್ಪ ಮುಳ್ಳೂರ ಹಾಗೂ ಮಹಾದೇವಿ ಶೇಖರಪ್ಪ ಭರಮಪ್ಪನವರ ನಾಮಪತ್ರ ಸಲ್ಲಿಸಿದ್ದರು. 8 ಮತ ಪಡೆದ ಶೋಭಾ ಮುಳ್ಳೂರ ಅಧ್ಯಕ್ಷೆಯಾಗಿ ಆಯ್ಕೆಗೊಂಡರು. ಮಹಾದೇವಿ ಭರಮಪ್ಪನವರ 6 ಮತ ಪಡೆದು ಪರಾಭವಗೊಂಡರು.
ಅ ವರ್ಗ ಮಹಿಳೆಗೆ ಮೀಸಲಾಗಿದ್ದ ಉಪಾಧ್ಯಕ್ಷ ಸ್ಥಾನಕ್ಕೆ ಶಾಂತವ್ವ ದ್ಯಾಮಪ್ಪ ದೇವಕ್ಕಿ ಒಬ್ಬರೇ ನಾಮಪತ್ರ ಸಲ್ಲಿಸಿದ್ದರಿಂದ ಅವಿರೋಧ ಆಯ್ಕೆ ಎಂದು ಘೋಷಿಸಲಾಯಿತು.
ಎಪಿಎಂಸಿ ಕಾರ್ಯದರ್ಶಿ ರಾಘವೇಂದ್ರ ಸಜ್ಜನ ಅವರು ಚುನಾವಣೆ ಅಧಿಕಾರಿಯಾಗಿ ಕಾರ್ಯ ನಿರ್ವಹಿಸಿದರು. ಪಿಡಿಒ ವಿ.ಆರ್. ರಾಯನಗೌಡ್ರ ಇತರರಿದ್ದರು.