ನಲ್ಲಿ ನೀರು ಕುಡಿದ 15 ಮಂದಿಗೆ ವಾಂತಿ, ಭೇದಿ ; ಗದ್ದಗೇರಹಟ್ಟಿ ಬೀಡುಬಿಟ್ಟ ಆರೋಗ್ಯ ಇಲಾಖೆ ಸಿಬ್ಬಂದಿ ; ಗ್ರಾಮದಲ್ಲೆ ಚಿಕಿತ್ಸೆ

ಹುಳಿಯಾರು : ಚಿಕ್ಕನಾಯಕನಹಳ್ಳಿ ತಾಲೂಕು ಹಂದನಕೆರೆ ಹೋಬಳಿಯ ಬರಗೂರು ಗ್ರಾಪಂ ವ್ಯಾಪ್ತಿಯ ಗದ್ದಗೇರಹಟ್ಟಿ ಗ್ರಾಮದಲ್ಲಿ ನಲ್ಲಿ ನೀರು ಕುಡಿದು 10ರಿಂದ 15 ಮಂದಿ ವಾಂತಿ, ಭೇದಿಯಿಂದ ಅಸ್ವಸ್ಥಗೊಂಡಿದ್ದಾರೆ.

ಗ್ರಾಮದ ಪಾಲಾಕ್ಷಯ್ಯ, ವೇದಮೂರ್ತಿ, ಶಂಕರಯ್ಯ, ಲಿಂಗದೇವರು, ಚಂದ್ರಯ್ಯ, ಕದುರಪ್ಪ, ಪ್ರಶಾಂತ್, ಕುದುರೆಚಿತ್ತಯ್ಯ, ಶಂಕರಮ್ಮ, ಕಾವ್ಯ, ಶೃತಿ, ಸಂತೋಷ್, ಹರೀಶ್, ಯಶೋದಮ್ಮ, ಕೊಟ್ರೇಶ್, ಮರುಳಯ್ಯ, ಕೃಷ್ಣಪ್ಪ, ಶಿವಯ್ಯ, ಗೌರಮ್ಮ, ಚಿದಾನಂದ, ಮಮತಾ, ಪೂಜಾ, ಗುರುಸ್ವಾಮಿ, ಅರುಣ್ ಕುಮಾರ್ ಅಸ್ವಸ್ಥಗೊಂಡವರು.

ನಾಲ್ಕೈದು ವರ್ಷದಿಂದ ಓವರ್ ಹೆಡ್ ಟ್ಯಾಂಕ್ ಸ್ವಚ್ಛಗೊಳಿಸದೆ ನೀರು ಪೂರೈಸಲಾಗುತ್ತಿದ್ದು, ಇಡೀ ಊರೇ ಅನಾರೋಗ್ಯಕ್ಕೆ ತುತ್ತಾಗಿದೆ ಎಂದು ಸ್ಥಳೀಯರು ಆರೋಪಿಸಿದರು. ಟ್ಯಾಂಕ್ ಸ್ವಚ್ಛಗೊಳಿಸಲು ಪಿಡಿಒ ಮತ್ತು ನೀರುಗಂಟಿ ಗಮನಕ್ಕೆ ತಂದರೂ ನಿರ್ಲಕ್ಷ್ಯಿಸಿದ ಫಲವಾಗಿ ಇಂದು ಊರಿನ ಜನ ವಾಂತಿಭೇದಿಗೆ ತುತ್ತಾಗಿದ್ದಾರೆ. ಘಟನೆಗೆ ಕಾರಣರಾದವರ ಮೇಲೆ ಕಾನೂನು ಕ್ರಮ ಜರುಗಿಸುವಂತೆ ಸ್ಥಳೀಯರು ಒತ್ತಾಯಿಸಿದ್ದಾರೆ. ಘಟನೆ ತಿಳಿದ ತಕ್ಷಣ ಟಿಎಚ್‌ಒ ನವೀನ್ ನೇತೃತ್ವದಲ್ಲಿ ಗೂಬೆಹಳ್ಳಿ ಸರ್ಕಾರಿ ಆಸ್ಪತ್ರೆ ವೈದ್ಯ ಭರತ್, ಮತಿಘಟ್ಟ ಸರ್ಕಾರಿ ಆಸ್ಪತ್ರೆ ವೈದ್ಯ ಮಧುರಂಜನ್ ಸೇರಿ ಆರೋಗ್ಯ ಇಲಾಖೆ ಸಿಬ್ಬಂದಿ ಗ್ರಾಮದಲ್ಲಿ ಬೀಡು ಬಿಟ್ಟು ಚಿಕಿತ್ಸೆ ನೀಡಿದ್ದಾರೆ. ಈಗ ಕಾಯಿಲೆ ಹತೋಟಿಗೆ ಬಂದಿದೆ.

ಸೋಮವಾರ ವರದಿ ಬರುವ ನಿರೀಕ್ಷೆ : ಮಾ.2 ರಂದು ಐದಾರು ಮಂದಿ ಮತ್ತಿಘಟ್ಟ ಆಸ್ಪತ್ರೆಗೆ ಚಿಕಿತ್ಸೆಗೆ ತೆರಳಿದ್ದಾರೆ. ತಕ್ಷಣ ಮತ್ತಿಘಟ್ಟ ವೈದ್ಯರು ಗೂಬೆಹಳ್ಳಿ ವೈದ್ಯರೊಂದಿಗೆ ಗ್ರಾಮಕ್ಕೆ ತೆರಳಿ ತಪಾಸಣೆಗೆ ಮುಂದಾದಾಗ ಏಳೆಂಟು ಮಂದಿಗೆ ವಾಂತಿ, ಭೇದಿಯಾಗುತ್ತಿರುವುದು ಪತ್ತೆಯಾಗಿದೆ. ಇಬ್ಬರು ವೈದ್ಯರೂ ಸೂಕ್ತ ಚಿಕಿತ್ಸೆ ನೀಡಿ ಹಿಂದಿರುಗಿದ್ದಾರೆ. ರಾತ್ರಿ ಮತ್ತೆ ನಾಲ್ಕು ಮಂದಿ ಅಸ್ವಸ್ಥಗೊಂಡ ಪರಿಣಾಮ ಹಾಸನ ಆಸ್ಪತ್ರೆಗೆ ತೆರಳಿ ಚಿಕಿತ್ಸೆ ಪಡೆದಿದ್ದಾರೆ. ಮರುದಿನ ನಾನೂ ಸೇರಿ ಇಬ್ಬರು ವೈದ್ಯರು, ದಾದಿಯರ ತಂಡ ಕ್ಯಾಂಪ್ ಮಾಡಿ 15-20ಮಂದಿಗೆ ಚಿಕಿತ್ಸೆ ನೀಡಿದ್ದೇವೆ. ಶನಿವಾರ ಮತ್ತೆ ಇಬ್ಬರಿಗೆ ವಾಂತಿಭೇದಿ ಕಾಣಿಸಿಕೊಂಡಿದ್ದು, ಉಳಿದವರು ಆರೋಗ್ಯದಿಂದಿದ್ದಾರೆ. ಮೇಲ್ನೋಟಕ್ಕೆ ನೀರಿನಿಂದ ಹೀಗಾಗಿರಬಹುದೆಂದು ಊಹಿಸಲಾಗಿದ್ದು, ಲ್ಯಾಬ್‌ಗೆ ಕಳುಹಿಸಿಕೊಡಲಾಗಿದೆ. ಸೋಮವಾರ ವರದಿ ಬರುವ ನಿರೀಕ್ಷೆಯಲ್ಲಿದ್ದೇವೆ ಎಂದು ಚಿಕ್ಕನಾಯಕನಹಳ್ಳಿ ಟಿಎಚ್‌ಒ ನವೀನ್ ತಿಳಿಸಿದರು.