ನಿಜವಾಗಿ ಕಡಿಯಬೇಕೆಂದಿರುವ ಮರಗಳೆಷ್ಟು?

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ಬೆಂಗಳೂರು ವಿಶ್ವವಿದ್ಯಾಲಯ "ಜ್ಞಾನ ಭಾರತಿ'ಯಲ್ಲಿ ವಿದ್ಯಾರ್ಥಿ ಕೇಂದ್ರಿತ ಅಭಿವೃದ್ಧಿಗೆ ಶೈಕ್ಷಣಿಕ ಭವನ ಹಾಗೂ ಸಂಶೋಧನಾ ಭವನ ನಿರ್ಮಿಸುವ ಯೋಜನೆ ರೂಪಿಸಿರುವ ವಿವಿ, ಇತ್ತೀಚಿನ ಸುದ್ದಿಗೋಷ್ಠಿಯಲ್ಲಿ 282 ಮರಗಳನ್ನಷ್ಟೇ ಕಡಿಯುತ್ತಿದ್ದೇವೆ ಎಂದು ಮಾಹಿತಿ ನೀಡಿತ್ತು. ಆದರೆ, ಬಿಬಿಎಂಪಿ ಆಕ್ಷೇಪಣೆಗಳಿಗೆ ಆಹ್ವಾನಿಸಿದ ಪತ್ರದಲ್ಲಿ "419 ಮರಗಳನ್ನು ಕಡಿಯುವ ಬಗ್ಗೆ' ಎಂದಿದೆ. ವಾಸ್ತವವನ್ನು ಮರೆಮಾಚುವ ಪ್ರಯತ್ನಗಳು ನಡೆಯುತ್ತಿದೆ ಎಂದು ವಿವಿಯ ನಿವೃತ್ತ ಪ್ರಾಧ್ಯಾಪಕ ರೇಣುಕಾ ಪ್ರಸಾದ್​ ತಿಳಿಸಿದ್ದಾರೆ.

ಬೆಂಗಳೂರು ವಿವಿಯ ಕುಲಪತಿ ಡಾ.ಎಸ್​.ಎಂ.ಜಯಕರ ಅವರು ತಿಳಿಸಿದ ಪ್ರಕಾರ ಕಡಿಯಲು ಹೊರಟಿರುವುದು 169 ನೀಲಗಿರಿ ಮತ್ತು ಅಕೇಶಿಯಾ ಮರಗಳಾಗಿವೆ. ಉಳಿದಂತೆ 137 ಮರಗಳನ್ನು ಬರ್​ ಜೋನ್​ನಲ್ಲೂ ಉಳಿಸಲಾಗುತ್ತದೆ ಎಂದಿದ್ದರು. ಆದರೆ, ಇದು ಸತ್ಯಕ್ಕೆ ದೂರವಾಗಿದ್ದು, ಕಡಿಯಲು ಹೊರಟಿರುವ ಮರಗಳಲ್ಲಿ ಸಾಕಷ್ಟು ಸಾಂಪ್ರದಾಯ ಮರಗಳು ಅಡಕವಾಗಿದೆ. ಕಟ್ಟಡ ನಿರ್ಮಾಣದಿಂದ ಅವು ನಾಶವಾಗಲಿದೆ ಎಂದು ಬೇಸರ ವ್ಯಕ್ತಪಡಿಸಿದರು.

ರಾಜಧಾನಿಯಲ್ಲಿ ಉಳಿದುಕೊಂಡಿರುವ ಹಸಿರು ವಾತಾವರಣವನ್ನು ಕಸಿಯುವ ಕೆಲಸಗಳು ನಿರಂತರವಾಗುತ್ತಿದ್ದು, ಕೆಲವು ತಿಂಗಳ ಹಿಂದೆ ಕಬ್ಬನ್​ ಪಾರ್ಕ್​ನಲ್ಲಿ 5 ಎಕರೆ ಜಮೀನಿನಲ್ಲಿ ಆರ್ಟ್​ ಗ್ಯಾಲರಿ ಪ್ರಸ್ತಾಪ ಬಂದಿತ್ತು. ಇದೀಗ ಬೆಂಗಳೂರು ವಿಶ್ವವಿದ್ಯಾಲಯ "ಜ್ಞಾನ ಭಾರತಿ' ಕ್ಯಾಂಪಸ್​ ಮೇಲೆಯೂ ದೃಷ್ಟಿ ಬಿದ್ದಿದೆ.