ಕಾರಿನಿಂದ ಡಿಕ್ಕಿ ಹೊಡೆಸಿ ಹತ್ಯೆಗೆ ಯತ್ನ?

ಗುಬ್ಬಿ: ಪಟ್ಟಣದ ತಹಸೀಲ್ದಾರ್​ ಕ್ವಾರ್ರ್ಟಸ್​ ಮುಂಭಾಗದ ಎಂ.ಜಿ.ರಸ್ತೆಯಲ್ಲಿ ಗುರುವಾರ ಬೆಳಗ್ಗೆ ದ್ವಿಚಕ್ರ ವಾಹನಕ್ಕೆ ಕಾರಿನಿಂದ ಡಿಕ್ಕಿ ಹೊಡೆಸಿ, ಬೈಕ್​ ಸವಾರನನ್ನು ಕಾರಿನಿಂದ ಓಡಾಡಿಸಿಕೊಂಡು ಹತ್ಯೆಗೆ ಯತ್ನಿಸಿದ್ದು, ಅದೃಷ್ಟವಶಾತ್​ ಬೈಕ್​ ಸವಾರ ಬಚಾವ್​ ಆಗಿದ್ದಾನೆ. ಪಟ್ಟಣದ ಪಂಚಮುಖಿ ಆಂಜನೇಯ ದೇವಸ್ಥಾನ ಸಮೀಪದ ನಿವಾಸಿ ಜಿ.ಎನ್​.ಮನೋಜ್​(29) ಕೊಲೆ ಸಂಚಿನ ಅಪಾಯದಿಂದ ಪಾರಾದವ. ಗುರುವಾರ ಮನೆಯಿಂದ ಬಸ್​ ನಿಲ್ದಾಣದತ್ತ ಮನೋಜ್​ನ ಬೈಕ್​ಗೆ ಯುವಕರ ಗುಂಪು ಕಾರಿನಿಂದ ಡಿಕ್ಕಿಹೊಡೆಸಿದ್ದು, ಅಟ್ಯಾಕ್​ ಮಾಡುವ ಸಂಚು ಅರಿತ ಮನೋಜ್​ ಸ್ಥಳದಿಂದ ಓಡಿ ಮಾರುತಿನಗರ ಬಡಾವಣೆಯ ಸಹೋದರನ ಮನೆ ಸೇರಿದ. ಅಲ್ಲಿವರೆಗೂ ಬೆನ್ನತ್ತಿದ ಕಾರು, ಮನೆಯ ಮುಂದೆ ಕೆಲ ಹೊತ್ತು ನಿಂತಿತು. ಈ ವೇಳೆ ಮನೋಜ್​ ಸಂಬಂಧಿಕರು ಕೂಗಾಡಿದ್ದು, ಬಳಿಕ ಅಪರಿಚಿತರು ಕಾರು ಚಲಾಯಿಸಿಕೊಂಡು ಹೋದರು ಎಂದು ಗುಬ್ಬಿ ಪೊಲೀಸ್​ ಠಾಣೆಯಲ್ಲಿ ಮನೋಜ್​ ಪ್ರಕರಣ ದಾಖಲಿಸಿದ್ದಾರೆ. ಅಪರ ಜಿಲ್ಲಾ ವರಿಷ್ಠಾಧಿಕಾರಿ ಮರಿಯಪ್ಪ, ಸಿಪಿಐ ಗೋಪಿನಾಥ್​ ಸ್ಥಳ ಪರಿಶೀಲನೆ ನಡೆಸಿ, ತನಿಖೆಗೆ ತಂಡ ರಚಿಸಿದ್ದಾರೆ. ಕೆಲ ಸಿಸಿ ಕ್ಯಾಮರಾ ದಾಖಲೆಗಳನ್ನು ಸಂಗ್ರಹಿಸಿದ್ದಾರೆ.