ಕೊಳ್ಳೇಗಾಲ: ಶಾಸಕರೊಬ್ಬರ ಹೆಸರಿನಲ್ಲಿ ಶಾಸಕಿಯೊಬ್ಬರಿಗೆ ಐವತ್ತು ಸಾವಿರ ರೂಪಾಯಿ ಮೋಸ ಮಾಡಿದ್ದ ಯುವಕನೊಬ್ಬ ಕೊನೆಗೂ ಸಿಕ್ಕಿಬಿದ್ದಿದ್ದು, ಪೊಲೀಸರಿಂದ ಬಂಧನಕ್ಕೆ ಒಳಗಾಗಿದ್ದಾನೆ. ಕನಕಪುರದ ದೊಡ್ಡಮಳಲವಾಡಿಯ ಸಚಿನ್ ಗೌಡ ಬಂಧಿತ ಆರೋಪಿ.
ಈತ ಕೊಳ್ಳೇಗಾಲ ಶಾಸಕ ಮಹೇಶ್ ಅವರ ಹೆಸರನ್ನು ದುರ್ಬಳಕೆ ಮಾಡಿಕೊಂಡು ಅಂಕೋಲ ಶಾಸಕಿ ರೂಪಾಲಿ ನಾಯ್ಕ್ ಅವರಿಗೆ ವಂಚಿಸಿ, ಪೊಲೀಸರ ಕೈಗೆ ಸಿಕ್ಕಿಹಾಕಿಕೊಂಡಿದ್ದಾನೆ. ತಾನು ಕೊಳ್ಳೇಗಾಲ ಶಾಸಕ ಮಹೇಶ್ ಅವರ ಆಪ್ತ ಸಹಾಯಕ ಎಂದು ಶಾಸಕಿ ರೂಪಾಲಿ ನಾಯ್ಕ್ಗೆ ಕರೆ ಮಾಡಿದ್ದ ಸಚಿನ್, ಶಾಸಕರಿಗೇ ತುರ್ತಾಗಿ 50 ಸಾವಿರ ರೂಪಾಯಿ ಬೇಕೆಂದು ಕೇಳಿದ್ದ.
ಈತನ ಮಾತನ್ನು ನಂಬಿದ ಶಾಸಕಿ 50 ಸಾವಿರ ರೂ. ಸಚಿನ್ ಖಾತೆಗೆ ಟ್ರಾನ್ಸ್ಫರ್ ಮಾಡಿದ್ದರು. ನಂತರ ಸಚಿವ ಪ್ರಭು ಚೌಹಾನ್ಗೆ ಕರೆ ಮಾಡಿ ಮಹೇಶ ಅಣ್ಣನಿಗೆ ತುರ್ತಾಗಿ ಒಂದು ಲಕ್ಷ ರೂಪಾಯಿ ಬೇಕಿದೆ ಎಂದು ಬೇಡಿಕೆ ಇಟ್ಟಿದ್ದ. ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸಿ.ಟಿ. ರವಿ ಅವರಿಗೂ ಕರೆ ಮಾಡಿ ದುಡ್ಡು ಕೇಳಿದ್ದ. ಅವರು ಸಂಶಯ ಬಂದು ಎನ್. ಮಹೇಶ್ಗೆ ಕರೆ ಮಾಡಿ ವಿಷಯ ತಿಳಿಸಿದ್ದರು. ಮಾತ್ರವಲ್ಲ, ವಾರದ ಹಿಂದೆ ಎನ್.ಮಹೇಶ್-ರೂಪಾಲಿ ನಾಯ್ಕ್ ಬೆಂಗಳೂರಿನಲ್ಲಿ ಭೇಟಿ ಆಗಿದ್ದಾಗ 50 ಸಾವಿರ ರೂ. ವಂಚನೆ ವಿಷಯ ಗೊತ್ತಾಗಿತ್ತು. ನಂತರ ಶಾಸಕರು ತಮ್ಮ ಆಪ್ತ ಸಹಾಯಕನಿಂದ ಕೊಳ್ಳೇಗಾಲ ಪೊಲೀಸರಿಗೆ ದೂರು ನೀಡಿದ್ದರು. ಕಾರ್ಯಾಚರಣೆಗಿಳಿದ ಪೊಲೀಸರು ಸಚಿನ್ನನ್ನು ಬಂಧಿಸಿದ್ದಾರೆ.