ರಾಮನಗರ: ಪೊಲೀಸ್ ಅಧಿಕಾರ ಹೆಸರಲ್ಲಿ ಪೊಲೀಸ್ ಕಾನ್ಸ್ಸ್ಟೇಬಲ್ಗೆ ಸಂದೇಶ ಕಳುಹಿಸಿ 75 ಸಾವಿರ ರೂ ವಂಚನೆ ಮಾಡಿರುವ ಪ್ರಕರಣ ರಾಮನಗರ ಸಿಇಎನ್ ಠಾಣೆಯಲ್ಲಿ ದಾಖಲಾಗಿದೆ.
ಮುಖ್ಯಪೇದೆ ಧನಂಜಯ ಹಣ ಕಳೆದುಕೊಂಡವರು. ಇವರ ಸ್ನೇಹಿತ ಕೈಲಾಶ್ ಎನ್ನುವರ ಮೊಬೈಲ್ಗೆ ಸೆ.26ರಂದು ಹೊಸ ನಂಬರ್ನಿಂದ ಸಂದೇಶ ಒಂದು ಬಂದಿದ್ದು, ಇದರಲ್ಲಿ ತಾನು ಪೊಲೀಸ್ ಇನ್ಸ್ಪೆಕ್ಟರ್ ಬಿ.ಎಸ್.ಅಶೋಕ್ ಬಿಂಬಿಸುವಂತೆ ಮೊಬೈಲ್ಗೆ ಬಿಎಸ್ ಎಂದು ಹೆಸರಿಟ್ಟು, ಕ್ಯೂರ್ ಕೋಡ್ ಒಂದನ್ನು ಕಳುಹಿಸಿದ್ದಾರೆ.
ನಂತರ ತಾನು ಕಳುಹಿಸಿರುವ ಮೊಬೈಲ್ ಸಂಖ್ಯೆಗೆ ಕೂಡಲೇ 75 ಸಾವಿರ ರೂ.ಗಳನ್ನು ಕಳುಹಿಸುವಂತೆ ಸೂಚಿಸಿದ್ದಾರೆ. ಇದನ್ನು ನಂಬಿದ ಕೈಲಾಶ್ ನನಗೆ ಬಂದು ತುರ್ತಾಗಿ ಹಣ ಕಳುಹಿಸಬೇಕಿದೆ ಎಂದು ಹೇಳಿದ್ದರಿಂದ ಸೆ.26ರಂದೇ ಧನಂಜಯ ತಮ್ಮ ಎರಡು ಬ್ಯಾಂಕ್ ಖಾತೆಗಳಿಂದ ಒಮ್ಮೆ 50 ಸಾವಿರ ಮತ್ತು 10 ಸಾವಿರ ರೂ.ಗಳನ್ನು ಕಳುಹಿಸಿದ್ದಾರೆ. ನಂತರ ಇವರ ಜೊತೆಯಲ್ಲಿ ಕೆಲಸ ಮಾಡುವ ಕಲ್ಯಾಣ್ ಕುಮಾರ್ ಎಂಬುವರ ಖಾತೆಯಿಂದಲೂ 15 ಸಾವಿರ ರೂ.ಗಳನ್ನು ಒಟ್ಟು 75 ಸಾವಿರ ರೂ.ಗಳನ್ನು ಇನ್ಸ್ಪೆಕ್ಟರ್ ಅಶೋಕ್ ಎಂದುಕೊಂಡು ಕಳುಹಿಸಿದ್ದಾರೆ.
ಆದರೆ, ನಂತರ ತಾನು ಮೋಸ ಹೋಗಿರುವುದು ಗೊತ್ತಾದ ಹಿನ್ನೆಲೆಯಲ್ಲಿ ಹಿರಿಯ ಅಧಿಕಾರಿ ಹೆಸರಲ್ಲಿ ಸಂದೇಶ ಕಳುಹಿಸಿ ತುರ್ತಾಗಿ ಹಣ ಬೇಕು ಎಂದು ವಂಚಿಸಿರುವ ಆರೋಪಿಗಳನ್ನು ಪತ್ತೆ ಮಾಡಿ ಹಣ ವಸೂಲಿ ಮಾಡಿಕೊಡುವಂತೆ ಧನಂಜಯ ಸೋಮವಾರ ಸಿಇಎಸ್ ಠಾಣೆಗೆ ದೂರು ನೀಡಿದ್ದಾರೆ.