ಸೊಗಡು ಕಳೆದುಕೊಂಡ ಅವರೆ

ಎನ್​.ಮುನಿವೆಂಕಟೇಗೌಡ ಕೋಲಾರ

ಡಿಸೆಂಬರ್​ ಪ್ರಾರಂಭದಿಂದಲೂ ಬಂಗಾಳ ಕೊಲ್ಲಿಯಲ್ಲಿ ವಾಯುಭಾರ ಕುಸಿತದಿಂದ ಆಗಾಗ ಜಡಿ ಮಳೆ, ಮೋಡ ಕವಿದ ವಾತಾವರಣ, ಮಂಜು ಹಾಗೂ ಕೀಟಬಾಧೆಯಿಂದ ಈ ವರ್ಷ ಅವರೆ ಫಸಲು ಇಳಿಮುಖಗೊಂಡಿದೆ. ಫೆಂಗಲ್​ ಚಂಡಮಾರುತ ಪ್ರಭಾವದಿಂದ ಅವರೆಕಾಯಿ ಸೊಗಡು ಕಳೆದುಕೊಂಡಿದ್ದು, ಮಾರುಕಟ್ಟೆಯಲ್ಲಿ ರೈತನಿಗೆ ಉತ್ತಮ ಬೆಲೆ ಸಿಗದಂತಾಗಿದೆ.

ಡಿಸೆಂಬರ್​-ಮಾರ್ಚ್​ ವರೆಗೆ ಅವರೆಕಾಯಿ ಸುಗ್ಗಿ ಪ್ರತಿ ವರ್ಷ ಇರುತ್ತದೆ. ಈ ವರ್ಷ ಡಿಸೆಂಬರ್​ನಲ್ಲಿ ಚಂಡಮಾರುತ ಪರಿಣಾಮ ಜಡಿ ಮಳೆ ಮತ್ತು ಶೀತ ಗಾಳಿಯಿಂದಾಗಿ ಅವರೆ ಹೂವು ಉದುರಿದೆ. ಅವರೆಗಿಡ ಹೂವು ಬಿಟ್ಟನಂತರ ಕಾಯಿ ಕಚ್ಚಿದ ಮೇಲೆ ಮಳೆ ಬೀಳದಿದ್ದರೆ ಸೊಗಡು ಹೆಚ್ಚಾಗಿರುತ್ತದೆ. ಆಗ ಕಾಯಿ ಒಳಗಿನ ಬೀಜವೂ ರುಚಿಯಾಗಿರುತ್ತದೆ. ಜಡಿ ಮಳೆಯಿಂದ ರುಚಿಯೂ ಇಲ್ಲದಂತಾಗಿದೆ. ಅವರೆಕಾಯಿಗೆ ಮಾರುಕಟ್ಟೆಯಲ್ಲಿ ಪ್ರತಿ ಕೆಜಿಗೆ 50 ರಿಂದ 60 ರೂ.ಇದ್ದು, ರೈತರಿಗೆ ಪ್ರತಿ ಕೆಜಿಗೆ 35 ರಿಂದ 40 ರೂ. ಸಿಗುತ್ತಿದೆ.

ಬಗೆ ಬಗೆಯ ತಿಂಡಿಗಳು: ಅವರೆಕಾಯಿಂದ ಹಿದುಕಿದ ಬೇಳೆಸಾರು, ಉಪ್ಪಿಟು, ಪಲ್ಯ, ನಿಪ್ಪಟ್ಟು, ಚಕ್ಕುಲಿ, ವಡೆ, ಹೋಳಿಗೆ, ಸಿಹಿ ಸಾಂಬಾರ್​, ದೋಸೆ ಸೇರಿ ಬಗೆ ಬಗೆಯ ಖಾದ್ಯಗಳನ್ನು ಮಾಡಲಾಗುತ್ತದೆ. ವರ್ಷದಲ್ಲಿ ಕೇವಲ 4 ತಿಂಗಳ ಕಾಲ ಅವರೆ ಕಾಯಿ ಸುಗ್ಗಿ ಇರುವುದರಿಂದ ಅದನ್ನೇ ವರ್ಷ ಪೂರ್ತಿ ಬಳಸಿಕೊಳ್ಳಲಾಗುತ್ತಿದೆ.