ಹಾವೇರಿ: ರೇಷನ್ ಕಾರ್ಡ್ ಮಾಡಿಸಿಕೊಡಲು ಫೋನ್ ಪೇ ಮೂಲಕ 5,000 ರೂ. ಲಂಚ ಸ್ವೀಕರಿಸುತ್ತಿದ್ದ ತಾಲೂಕು ಪ್ರಭಾರ ಆಹಾರ ನಿರೀಕ್ಷಕ ವಿಜಯಕುಮಾರ ಮ. ಗುಡಗೇರಿ ಎಂಬಾತನನ್ನು ಲೋಕಾಯುಕ್ತ ಪೊಲೀಸರು ಬುಧವಾರ ಬಂಧಿಸಿದ್ದಾರೆ.
ತಾಲೂಕಿನ ಕುರುಬಗೊಂಡ ಗ್ರಾಮದ ಶಿವಾನಂದ ಮಾಳಗಿ ತಮ್ಮ ಸಂಬಂಧಿ ಹಿರೇಲಿಂಗದಹಳ್ಳಿಯ ಭೀರಪ್ಪ ಕಾಶಂಬಿ ಎಂಬುವರಿಗೆ ರೇಷನ್ ಕಾರ್ಡ್ ಮಾಡಿಸಿಕೊಟ್ಟಿದ್ದರು. ಈ ಕೆಲಸ ಮಾಡಿಸಿಕೊಟ್ಟಿದ್ದಕ್ಕೆ ಪ್ರಭಾರ ಆಹಾರ ನಿರೀಕ್ಷಕ ವಿಜಯಕುಮಾರ ಗುಡಗೇರಿ ಹಣಕ್ಕೆ ಬೇಡಿಕೆ ಇಟ್ಟಿದ್ದರು. ಈ ಕುರಿತು ಶಿವಾನಂದ ಮಾಳಗಿ ಲೋಕಾಯುಕ್ತ ಪೊಲೀಸರಿಗೆ ದೂರು ಸಲ್ಲಿಸಿದ್ದರು. ಫೋನ್ ಪೇ ಮೂಲಕ 5 ಸಾವಿರ ರೂ. ವರ್ಗಾಯಿಸುತ್ತಿದ್ದ ವೇಳೆ ಲೋಕಾಯುಕ್ತ ಪೊಲೀಸರು ಟ್ರಾೃಒಪ್ ಮಾಡಿದ್ದಾರೆ.
ಲೋಕಾಯುಕ್ತ ಎಸ್ಪಿ ಎಂ.ಎಸ್.ಕೌಲಾಪುರೆ ಮಾರ್ಗದರ್ಶನದಲ್ಲಿ, ಹಾವೇರಿ ಡಿವೈಎಸ್ಪಿ ಮಧುಸೂದನ ಸಿ. ನೇತೃತ್ವದ ತಂಡ ಕಾರ್ಯಾಚರಣೆ ನಡೆಸಿದೆ. ಇನ್ಸ್ಪೆಕ್ಟರ್ಗಳಾದ ದಾದಾವಲಿ ಕೆ.,ಎಚ್., ವಿಶ್ವನಾಥ ಕಬ್ಬೂರಿ, ಶ್ರೀದೇವಿ ಪಾಟೀಲ ಹಾಗೂ ಸಿಬ್ಬಂದಿ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದರು.