ಚನ್ನರಾಯಪಟ್ಟಣದಲ್ಲಿ ಪಾಲನೆಯಾಗದ ಸಂಚಾರ ನಿಯಮ

ಪಟ್ಟಣದಲ್ಲಿ ಜನವಸತಿ ಪ್ರದೇಶ ವಿಸ್ತಾರವಾಗಿ ಬೆಳೆಯುತ್ತಿರುವುದರಿಂದ ವಾಹನದಟ್ಟಣೆ ಹಾಗೂ ಜನಸಂದಣಿ ಹೆಚ್ಚಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಸುಗಮ ಸಂಚಾರಕ್ಕೆ ಸಿಗ್ನಲ್ ದೀಪಗಳ ಅನಿವಾರ್ಯತೆಯನ್ನು ಮನಗಂಡು ಶಾಸಕ ಸಿ.ಎನ್.ಬಾಲಕೃಷ್ಣ ಸಿಗ್ನಲ್ ದೀಪಗಳ ಅಳವಡಿಕೆಗೆ ಕ್ರಮ ವಹಿಸಿದರು. ಇತ್ತೀಚಿನ ದಿನಗಳಲ್ಲಿ ಪಟ್ಟಣದಲ್ಲಿ ವಾಹನಗಳ ಬಳಕೆ ವಿಪರೀತವಾಗಿ ಹೆಚ್ಚಿದೆಯಾದರೂ ಸಂಚಾರ ನಿಯಮ ಶಿಸ್ತಿನಿಂದ ಪಾಲನೆಯಾಗುತ್ತಿಲ್ಲ. ಪರಿಣಾಮ, ರಸ್ತೆ ಅಪಘಾತಗಳ ಪ್ರಮಾಣ ನಿರಂತರವಾಗಿ ಹೆಚ್ಚುತ್ತಲೇ ಇದೆ. ತಾಲೂಕಿನಲ್ಲಿ 2025ನೇ ವರ್ಷದಲ್ಲಿ ಒಟ್ಟು 147 ಅಪಘಾತ ಸಂಭವಿಸಿ, 154 ಜನರು ಗಾಯಗೊಂಡಿದ್ದು, 38 ಜನರು ಜೀವ ಕಳೆದುಕೊಂಡಿದ್ದಾರೆ.

ಕೆಲವರಿಗೆ ವಾಹನಗಳನ್ನು ಮಿತಿಮೀರಿದ ವೇಗ ಹಾಗೂ ಬೇಕಾಬಿಟ್ಟಿ ಓಡಿಸುವುದು ಖಯಾಲಿ. ಹೆಲ್ಮೆಟ್ ಧರಿಸದೆ ವಾಹನ ಓಡಿಸುವುದು, ದ್ವಿಚಕ್ರ ವಾಹನದ ಮೇಲೆ ಹೆಚ್ಚು ಜನರು ಸವಾರಿ ಮಾಡುವುದು... ಇಂತಹವು ನೋಟಗಳು ನಿತ್ಯ ಕಾಣ ಸಿಗಲಿವೆ. ಪಟ್ಟಣದ ಪ್ರಮುಖ ವೃತ್ತ ಎನಿಸಿಕೊಂಡಿರುವ ನವೋದಯ ವೃತ್ತದಲ್ಲಿ ಪಾದಚಾರಿಗಳಿಗೆ ಮೃತ್ಯುಕೂಪವಾಗಿದೆ. ಮೈಯೆಲ್ಲ ಕಣ್ಣಾಗಿಸಿಕೊಂಡು ರಸ್ತೆ ದಾಟಿದರಷ್ಟೇ ಜೀವ ಉಳಿಯುತ್ತದೆ. ಕೊಂಚ ಎಚ್ಚರ ತಪ್ಪಿದರೂ ಟ್ರಾಫಿಕ್ ಸಿಗ್ನಲ್ ವ್ಯವಸ್ಥೆಯನ್ನೂ ಲೆಕ್ಕಿಸದೆ ನುಗ್ಗಿ ಬರುವ ವಾಹನಗಳಿಗೆ ಬಲಿಯಾಗಬೇಕಾಗುತ್ತದೆ !

ಹಸಿರು ದೀಪ ಬೆಳಗಿತಲ್ಲ ಎಂದುಕೊಂಡು ರಸ್ತೆ ದಾಟಲು ಹೆಜ್ಜೆ ಇಡುತ್ತಿದ್ದಂತೆಯೇ ಮತ್ತೊಂದು ಕಡೆಯಿಂದ ಶರವೇಗದಲ್ಲಿ ವಾಹನಗಳು ಮುಂದೆ ಸಾಗದಂತೆ ತಡೆಯುತ್ತವೆ.

ಇದರಿಂದ ಜನರು ಹೈರಾಣಾಗುವಂತಾಗಿದೆ. ವೃತ್ತಕ್ಕೆ ಹೊಂದಿಕೊಂಡಂತಿರುವ ನವೋದಯ ವಿದ್ಯಾ ಸಂಸ್ಥೆ, ಚಾಮುಂಡೇಶ್ವರಿ ವಿದ್ಯುತ್ ನಿಗಮ ಹಾಗೂ ಕೋಟೆ ಬಡಾವಣೆಗೆ ಪ್ರವೇಶ ಮಾಡಲು ಇದೇ ಪ್ರಮುಖ ವೃತ್ತವಾಗಿದ್ದು ಕೆಲವು ಮೀಟರ್‌ಗಳ ಅಂತರದಲ್ಲಿ ತಾಲೂಕು ಪಂಚಾಯಿತಿ ಮಾಧ್ಯಮಿಕ ಶಾಲೆ, ಸ್ವತಂತ್ರ ಪದವಿ ಪೂರ್ವ ಕಾಲೇಜು ಇದೆ. ಇದಲ್ಲದೆ ಮೈಸೂರು, ಶಿವಮೊಗ್ಗ, ಚಿಕ್ಕಮಗಳೂರು, ಮಂಗಳೂರು ಹಾಗೂ ಬೆಂಗಳೂರಿಗೆ ನವೋದಯ ವೃತ್ತದ ಮುಖಾಂತರವೇ ಸಾಗಬೇಕಾಗಿರುವುದರಿಂದ ನಾನಾ ಪ್ರದೇಶಗಳಿಂದ ಬರುವ ಶಾಲಾ ವಿದ್ಯಾರ್ಥಿಗಳು, ಉದ್ಯೋಗಿಗಳು ಇದೇ ವೃತ್ತದಲ್ಲಿ ಇಳಿದು ಸಾಗುತ್ತಾರೆ. ಹಾಗಾಗಿ ಇಲ್ಲಿ ನಿತ್ಯವೂ ಜನರ ಓಡಾಟ ಸಾಮಾನ್ಯವಾಗಿ ಹೆಚ್ಚಿರುತ್ತದೆ. ಪೀಕ್ ಅವರ್‌ನಲ್ಲಿ ಅಪಾರ ಪ್ರಮಾಣದ ವಾಹನಗಳು ವೃತ್ತದ ಮುಖಾಂತರ ಹಾದು ಹೋಗುತ್ತವೆ. ಇದರಿಂದಾಗಿ ಜನರು ರಸ್ತೆ ದಾಟಲು ಹರಸಾಹಸ ಮಾಡಬೇಕಿದೆ.