ಮೊಗದಲ್ಲಿ ನಗು ತಂದ ಪುಷ್ಪ ಕೃಷಿ

ತಾಲೂಕಿನ ದಂಡಿಗನಹಳ್ಳಿ ಹೋಬಳಿಯ ಬಿ.ಸಮುದ್ರವಳ್ಳಿ ಗ್ರಾಮದ ಯುವ ರೈತ ಬಿ.ಎನ್.ದೊರೆಸ್ವಾಮಿ 9 ವರ್ಷಗಳಿಂದ ಪುಷ್ಪ ಕೃಷಿ ಮಾಡುತ್ತಿದ್ದು, ಆರಂಭದಲ್ಲಿ ಎಲ್ಲರಂತೆ ನಷ್ಟ ಅನುಭವಿಸಿದರು. ಆದರೆ ಛಲ ಬಿಡದೆ ವೈಜ್ಞಾನಿಕ ಪದ್ಧತಿಯನ್ನು ಹಂತ ಹಂತವಾಗಿ ಅಳವಡಿಸಿಕೊಂಡು ಇದೀಗ ಯಶಸ್ವಿಯಾಗಿ ಬಗೆಬಗೆಯ ಹೂಗಳನ್ನು ಬೆಳೆದು ಲಕ್ಷಾಂತರ ರೂ. ಆದಾಯ ಗಳಿಸುತ್ತಿದ್ದಾರೆ.

ಆರಂಭದಲ್ಲಿ ಸ್ವಂತ ವ್ಯಾಪಾರ, ಕಂಟ್ರಾೃಕ್ಟ್ ಕೆಲಸ ಮಾಡಿದರು. ಆದರೆ ಯಶಸ್ಸು ಸಿಗಲಿಲ್ಲ. ಪಿತ್ರಾರ್ಜಿತವಾಗಿ ಬಂದ ಜಮೀನಿನಲ್ಲಿ ಕೃಷಿ ಮಾಡಲು ಆಲೋಚಿಸಿ ಕೊಳವೆಬಾವಿ ಕೊರೆಸಿದರು. ಆದರೆ ನೀರು ಬಾರದ ಕಾರಣ ತಮ್ಮ ಮನೆ ಬಳಿಯೇ ಕೊಳವೆ ಬಾವಿ ಕೊರೆಸಿ ಎರಡು ಕಿ.ಮೀ. ದೂರವಿರುವ ಜಮೀನಿಗೆ ಪೈಪ್‌ಲೈನ್ ಮೂಲಕ ನೀರು ತೆಗೆದುಕೊಂಡು ಹೋಗಿ ಕೃಷಿ ಹೊಂಡ ತೋಡಿಸಿ ನೀರು ಸಂಗ್ರಹಣೆ ಮಾಡಿದರು. ಆರಂಭದಲ್ಲಿ ತರಕಾರಿ ಬೆಳೆದರಾದರೂ ಮಧ್ಯವರ್ತಿಗಳಿಂದಾಗಿ ಲಾಭ ಸಿಗಲಿಲ್ಲ. ನಂತರ ಹೂ ಬೆಳೆಯಲು ನಿರ್ಧರಿಸಿ ಅನುವಿ ರೈತರಿಂದ ಮಾರ್ಗದರ್ಶನ ಪಡೆದುಕೊಳ್ಳಲು ಕೋಲಾರ, ಚಿಂತಾಮಣಿ, ಚಿಕ್ಕಬಳ್ಳಾಪುರ, ಮಾಲೂರು, ದೊಡ್ಡಬಳ್ಳಾಪುರ, ಮೈಸೂರು, ಬೆಂಗಳೂರು ಸೇರಿದಂತೆ ಹೆಚ್ಚು ಹೂ ಬೆಳೆಯುವ ಪ್ರದೇಶಗಳಲ್ಲಿ ಸುತ್ತಾಡಿ ಪ್ರಾಥಮಿಕ ಮಾಹಿತಿ ಪಡೆದುಕೊಂಡರು.

ಪಟ್ಟಣದ ತೋಟಗಾರಿಕೆ ಇಲಾಖೆ ಸಹಕಾರದೊಂದಿಗೆ ಕೃಷಿ ಭಾಗ್ಯ ಯೋಜನೆ ಮತ್ತು ರಾಷ್ಟ್ರೀಯ ತೋಟಗಾರಿಕೆ ಮಿಷನ್‌ನಡಿ ಒಂದು ಎಕರೆ ಜಮೀನಿನಲ್ಲಿ ಪಾಲಿ ಹೌಸ್ ನಿರ್ಮಾಣ ಮಾಡಿ ವಿವಿಧ ರೀತಿಯ ಹೂವಿನ ಸಸಿಗಳನ್ನು ತಮಿಳುನಾಡು, ಕೋಲ್ಕತ್ತ, ಬಾಂಬೆ ಹೀಗೆ ಬೇರೆ ಬೇರೆ ರಾಜ್ಯಗಳಿಂದ ತಂದು ನಾಟಿ ಮಾಡಿದರು. ಪಾಲಿಹೌಸ್‌ನಲ್ಲಿ ಗುಲಾಬಿ, ಸೇವಂತಿಗೆ, ಟ್ಯೂಬೆರೋಸ್, ಲಿಮೋನಿಯಂ, ಅಲಂಕಾರಿಕ ಎಲೆ ಸೇರಿದಂತೆ ಅಲಂಕಾರಿಕ ಹೂಗಳನ್ನು ಬೆಳೆದು ಇದೀಗ ವಾರ್ಷಿಕ 15 ರಿಂದ 18 ಲಕ್ಷ ರೂ. ಆದಾಯ ಪಡೆಯುತ್ತಿದ್ದಾರೆ. ಇವರ ಕಾಯಕಕ್ಕೆ ಪತ್ನಿ ಜಿ.ಕೆ.ಕವಿತಾ ಸಾಥ್ ನೀಡುತ್ತಿದ್ದಾರೆ.

ತಂತ್ರಜ್ಞಾನ ಬಳಸಿ ಪಾಲಿಹೌಸ್(ಹಸಿರು ಮನೆ) ಮತ್ತು ಹನಿ ನೀರಾವರಿ ಪದ್ಧತಿಯನ್ನು ಅಳವಡಿಸಿಕೊಂಡಿರುವ ಇವರು, ಮಾರುಕಟ್ಟೆಯಲ್ಲಿ ಬೇಡಿಕೆ ಇರುವ ಗುಲಾಬಿ, ಜರ್ಬೆರಾ, ಕಾರ್ನೇಷನ್ ಮತ್ತು ಸೇವಂತಿಗೆಯಂತಹ ಅಲಂಕಾರಿಕ ಹೂವುಗಳ ಆಯ್ಕೆ ಮಾಡಿ ಬೆಳೆಯುತ್ತಾರೆ. ಮಧ್ಯವರ್ತಿಗಳಿಲ್ಲದೆ ಮಾರುಕಟ್ಟೆಗೆ ಹೂವುಗಳನ್ನು ತಲುಪಿಸಲಿದ್ದಾರೆ.