ಪ್ರಮುಖ ಮುಖ್ಯಾಂಶಗಳು
ಹಾಸನ:
ಸಾಮಾನ್ಯ ಪಟೇಲ್ ಕುಟುಂಬದಲ್ಲಿ ಹುಟ್ಟಿದರೂ ನಮ್ಮ ತಂದೆ ಎಚ್.ಡಿ.ದೇವೇಗೌಡರ ಏಳಿಗೆ, ನಮ್ಮ ಕುಟುಂಬದ ಬೆಳವಣಿಗೆಯಲ್ಲಿ ತಾಯಿ ಚೆನ್ನಮ್ಮ ಪಾತ್ರ ಪ್ರಮುಖವಾಗಿದೆ ಎಂದು ಅಮ್ಮನನ್ನು ನೆನೆದು ಎಚ್.ಡಿ.ರೇವಣ್ಣ ಬಿಕ್ಕಿ ಬಿಕ್ಕಿ ಅತ್ತರು.
ಕಷ್ಟದಲ್ಲಿದ್ದವರಿಗೆ ಕೈಲಾದ ಸಹಾಯ ಮಾಡುತ್ತಿದ್ದರು, ಮನೆಗೆ ಯಾರೇ ಬರಲಿ ಊಟ ಹಾಕುತ್ತಿದ್ದರು. ಆ ದೇವತೆಯನ್ನು ಕಳೆದು ಕೊಂಡ ದುಃಖ ತಡೆಯಲಾಗುತ್ತಿಲ್ಲ ಎಂದು ಗುರುವಾರ ಸುದ್ದಿಗೋಷ್ಠಿಯಲ್ಲಿ ಕಣ್ಣೀರಿಟ್ಟರು.
ನಮ್ಮ ತಂದೆ 1962ರಲ್ಲಿ ಹೊಳೆನರಸೀಪುರದಲ್ಲಿ 10 ರೂ. ಬಾಡಿಗೆ ಮನೆಯಲ್ಲಿದ್ದರು. ಪಡುವಲಹಿಪ್ಪೆಯಲ್ಲಿ ಒಡವೆ ಅಡಮಾನ ಇಟ್ಟು 1500 ರೂ.ಗೆ 12 ಎಕರೆ ಜಮೀನು ಖರೀದಿ ಮಾಡಿ,ಮನೆ ನಿರ್ಮಿಸಿದ್ದರು. ಆ ಕಾರಣಕ್ಕೆ ಮೂರು ಕಡೆಗೂ ಪಾರ್ಥಿವ ಶರೀರ ಕೊಂಡೊಯ್ಯಲಾಯಿತು. ಅಪ್ಪಟ ದೈವಭಕ್ತರಾಗಿದ್ದ ತಾಯಿ ಕುಲದೇವರು ರಂಗನಾಥಸ್ವಾಮಿ ಪಾದದಡಿ ಇರಬೇಕೆಂದು ಅಲ್ಲಿ ಅಂತ್ಯಕ್ರಿಯೆ ಮಾಡಿದ್ದೇವೆ. ತಂದೆ ಪಡುವಲಹಿಪ್ಪೆಯಲ್ಲಿ ಮಾಡೋಣ ಎಂದರು. ಆದರೆ, ಕುಮಾರಸ್ವಾಮಿ ಇಲ್ಲೇ ಮಾಡೋಣ ಎಂದು ಹಠ ಹಿಡಿದರು. ಅದಕ್ಕಾಗಿ ಅವರು ಮೊದಲೇ ಅಲ್ಲಿ ಜಾಗ ಖರೀದಿ ಮಾಡಿದ್ದರು. ಹಾಗಾಗಿ ಮಾವಿನಕೆರೆ ಬೆಟ್ಟದ ರಂಗನಾಥಸ್ವಾಮಿ ಸನ್ನಿಧಾನದ ತಟದಲ್ಲಿ ಅಂತ್ಯಕ್ರಿಯೆ ಮಾಡಿದೆವು ಎಂದು ವಿವರಿಸಿದರು.
2001ರಲ್ಲಿ ಆ್ಯಸಿಡ್ ದಾಳಿ ನಡೆಯದಿದ್ದರೆ ಇನ್ನೂ 10 ವರ್ಷ ಬದುಕಿರುತ್ತಿದ್ದರು. ಆಗ ರೇವಣ್ಣನನ್ನು ಮುಗಿಸಲೇಬೇಕು ಎಂದು ದುರುಳರು ಸಂಚು ರೂಪಿಸಿದ್ದರು. ಅಂದು ಶಿವರಾತ್ರಿಯಂದು ನಾನು ಮಹದೇಶ್ವರ ಬೆಟ್ಟಕ್ಕೆ ಹೋಗಿದ್ದೆ, ಇಲ್ಲದಿದ್ದರೆ ನನ್ನ ಮೇಲೆ ದಾಳಿ ನಡೆಯುತ್ತಿತ್ತು. ನನ್ನ ಬದಲಿಗೆ ತಾಯಿ ನೋವು ತಿಂದರು ಎಂದರು.