ಜಿಲ್ಲೆಯಲ್ಲಿ ಹೆಚ್ಚಿದ ಜಾನುವಾರು ಕಳವು ಪ್ರಕರಣ

ಜಾನುವಾರು ಕಳವು ಸಂಬಂಧ ದೂರು ನೀಡಲು ಪೊಲೀಸ್ ಠಾಣೆಗೆ ತೆರಳಿದರೆ ಸಾಕ್ಷಿ ಇಲ್ಲದೆ ಪ್ರಕರಣ ದಾಖಲಿಸುವುದಿಲ್ಲವೆಂದು ಪೊಲೀಸರು ಹೇಳುತ್ತಾರೆ. ಸಿಸಿ ದೃಶ್ಯಾವಳಿಯನ್ನು ಸಾಬೀತುಪಡಿಸಿದ ನಂತರವೇ ಪ್ರಕರಣ ದಾಖಲಿಸುವ ಪ್ರಕ್ರಿಯೆ ಇದೆ. ಎಲ್ಲ ಪ್ರಕರಣಗಳಲ್ಲೂ ಸಿಸಿ ಕ್ಯಾಮರಾ ದೃಶ್ಯಾವಳಿ ಇರುವುದಿಲ್ಲ. ಆದ್ದರಿಂದ ಸಮಸ್ಯೆಗೆ ಬೇರೆ ಮಾರ್ಗ ಕಂಡುಕೊಳ್ಳಬೇಕೆಂಬ ಆಗ್ರಹ ಕೇಳಿಬಂದಿತ್ತು.

ಜಾನುವಾರುಗಳಿಗೆ ಕಿವಿಯೊಲೆ ಹಾಗೂ ವಿಮೆ ಮಾಡಿಸುವಂತೆ ಅಧಿಕಾರಿಗಳು ರೈತರಿಗೆ ಸೂಚನೆ ನೀಡಿದ್ದಾರೆ. ಪಶು ಸಂಗೋಪನಾ ಇಲಾಖೆಯಿಂದ ನೀಡಲಾಗುವ ಕಿವಿಯೊಲೆಯಿಂದ ಹಸು ಎಲ್ಲೇ ಇದ್ದರೂ ಪತ್ತೆ ಮಾಡಬಹುದು. ಅದರಲ್ಲಿ 12 ಡಿಜಿಟ್ ಸಂಖ್ಯೆ, ಬಾರ್ ಕೋಡ್ ಇರುವುದರಿಂದ ರಾಸು ಎಲ್ಲೇ ಇದ್ದರೂ ಪತ್ತೆಯಾಗುತ್ತದೆ. ಆದ್ದರಿಂದ ಎಲ್ಲರೂ ಕಡ್ಡಾಯವಾಗಿ ಓಲೆ ಹಾಕಿಸಬೇಕೆಂದು ಅಧಿಕಾರಿಗಳು ಮನವಿ ಮಾಡಿದ್ದಾರೆ. ಜತೆಗೆ ವಿಮೆ ಇದ್ದರೂ ಅನುಕೂಲವಾಗುತ್ತದೆ. ಹಸು ಕಳುವಾದರೆ ವಿಮೆ ಮೊತ್ತ ಪಾವತಿಯಾಗುವುದಿಲ್ಲ. ಒಂದು ವೇಳೆ ಅನಾರೋಗ್ಯ ಅಥವಾ ಮತ್ತಿತರ ಕಾರಣಗಳಿಂದ ಮೃತಪಟ್ಟರೆ 15 ಸಾವಿರ ರೂ. ವರೆಗೆ ಪರಿಹಾರ ದೊರೆಯುತ್ತದೆ. ಕುರಿ, ಮೇಕೆಗಳಿಗೆ 7 ಸಾವಿರ ರೂ. ಹಾಗೂ ಹುಟ್ಟಿನಿಂದ 6 ತಿಂಗಳ ಒಳಗಿನ ಪ್ರಾಣಿಗಳಿಗೆ 5 ಸಾವಿರ ರೂ.ತನಕ ಪರಿಹಾರ ದೊರೆಯಲಿದೆ. ರಾಸುಗಳಿಗೆ ವಿಮೆ ಹಾಗೂ ಕಿವಿಯೊಲೆ ಎರಡೂ ಇದ್ದರೆ ಅದರ ಮಾರುಕಟ್ಟೆ ಮೌಲ್ಯ ಎಷ್ಟಿರುತ್ತದೋ ಅಷ್ಟು ಹಣವನ್ನು ಸರ್ಕಾರದಿಂದ ಕೊಡಿಸುವ ಅವಕಾಶವಿದೆ.

ರಾಸುಗಳ ನಿಖರ ಪತ್ತೆ ಹಚ್ಚುವ ಉದ್ದೇಶದಿಂದ ಪ್ರಸ್ತುತ ಕಿವಿಯೊಲೆ ಹಾಕಲಾಗುತ್ತಿದೆಯಾದರೂ ಅಕ್ರಮವಾಗಿ ಕಸಾಯಿ ಖಾನೆಗೆ ಸಾಗಿಸುವವರು ಅದನ್ನು ಕಿತ್ತು ಹಾಕುವ, ಬಹಳ ದಿನಗಳಾದ ಬಳಿಕ ಅದೇ ಬಿದ್ದು ಹೋಗುವ ಸಾಧ್ಯತೆಯಿದೆ. ಆದ್ದರಿಂದ ಕೇಂದ್ರ ಸರ್ಕಾರ ರಾಷ್ಟ್ರೀಯ ಜಾನುವಾರು ಮಿಷನ್ ಯೋಜನೆಯಡಿ (ಎನ್‌ಎಲ್‌ಎಂ) ಮಝಲ್ ಮ್ಯಾಪಿಂಗ್‌ಗೆ ಮುಂದಾಗಿದೆ. ಅಂದರೆ ಜಾನುವಾರುಗಳ ಮುಖದ ಭಾಗವನ್ನು ಸ್ಕಾೃನ್ ಮಾಡಿ ದತ್ತಾಂಶವನ್ನು ಸಂಗ್ರಹಿಸಿಟ್ಟುಕೊಳ್ಳಲಾಗುತ್ತದೆ. ಕಿವಿಯೊಲೆಗಿಂತ ಈ ಪ್ರಕ್ರಿಯೆ ಪರಿಣಾಮಕಾರಿ ಆಗಲಿದೆ. ಪ್ರಾಯೋಗಿಕವಾಗಿ ರಾಜ್ಯದ ಎರಡು ಜಿಲ್ಲೆಗಳಲ್ಲಿ ಈ ಯೋಜನೆ ಜಾರಿಗೊಳಿಸಿದ್ದು ಮುಂದಿನ ವರ್ಷದಿಂದ ಹಾಸನದಲ್ಲೂ ಜಾರಿಯಾಗಲಿದೆ.