ಮುಳಗುಂದ: ಸಮೀಪದ ಹರ್ತಿ ಗ್ರಾಮದ ಶ್ರೀ ಬಸವೇಶ್ವರ ಜಾತ್ರಾ ಮಹೋತ್ಸವವು ಸೆ. 11ರಂದು ಅದ್ದೂರಿಯಿಂದ ಜರುಗಲಿದೆ.
ಜಾತ್ರೆ ಅಂಗವಾಗಿ ಸೆ. 7ರಂದು ಬೆಳಗ್ಗೆ 9 ಗಂಟೆಗೆ ರಥದ ಕಳಸಾರೋಹಣ, ರಾತ್ರಿ 8.30ಕ್ಕೆ ಸಲ್ಲುವ ಗೋಧೋಳಿ ಲಗ್ನದ ಶುಭಮೂಹೂರ್ತದಲ್ಲಿ ಶ್ರೀ ಪಾರ್ವತಿ- ಪರಮೇಶ್ವರ ದೇವರ ವಿವಾಹ ಸಮಾರಂಭ ನೆರವೇರಲಿದೆ.
ಸೆ. 11ರಂದು ಬೆಳಗ್ಗೆ 7 ಗಂಟೆಗೆ ಬಸವಣ್ಣ ದೇವರಿಗೆ ಅಭಿಷೇಕ ಹಾಗೂ ಅರ್ಚನೆ ಕಾರ್ಯಕ್ರಮ ನಂತರ ಸಾರ್ವಜನಿಕರಿಗೆ ದರ್ಶನ ಹಾಗೂ ಸೇವಾ ಕಾರ್ಯ, ನಂತರ 10 ಗಂಟೆಗೆ ವೀರಭದ್ರದೇವರ ಅಗ್ನಿಪ್ರವೇಶ ಕಾರ್ಯಕ್ರಮ ನಡೆಯಲಿದೆ. ನಂತರ ಹೊಸಳ್ಳಿಯ ಅಭಿನವ ಬೂದೀಶ್ವರ ಶ್ರೀಗಳ ಸಾನ್ನಿಧ್ಯದಲ್ಲಿ ಮಹಾದಾಸೋಹ. ಸಂಜೆ 4 ಗಂಟೆಗೆ ಗ್ರಾಮದೇವತೆಗೆ ಉಡಿ ತುಂಬುವ ಹಾಗೂ ಕಾಯಿ ಕರ್ಪರದ ಸೇವಾ ಕಾರ್ಯ ನಡೆಯಲಿದೆ.
ಸೆ. 11ರಂದು ಭಜನೆ, ಜಾಂಜ್ ಮೇಳ, ಕರಡಿ ಮಜಲು ಮೇಳಗಳೊಂದಿಗೆ ಸಂಜೆ 5 ಗಂಟೆಗೆ ಬಸವಣ್ಣ ದೇವರ ಮಹಾರಥೋತ್ಸವವು ನಂದಿ ಧ್ವಜ ಪಲ್ಲಕ್ಕಿ ಮೆರವಣಿಗೆಯೊಂದಿಗೆ ಜರುಗುವುದು.
ಸೆ. 12ರಂದು ಲಘುರಥೋತ್ಸವ (ಕಡುಬಿನ ಕಾಳಗ) ವು ಸಕಲ ವಾದ್ಯ ವೈಭವಗಳೊಂದಿಗೆ ನೆರವೇರಲಿದೆ ಎಂದು ದೇವಸ್ಥಾನ ಟ್ರಸ್ಟ್ ಕಮೀಟಿ ಕಾರ್ಯದರ್ಶಿ ಬಿ.ಟಿ. ಸೋಮರಡ್ಡಿ ತಿಳಿಸಿದ್ದಾರೆ.