ವಿಜಯವಾಣಿ ಸುದ್ದಿಜಾಲ ಧಾರವಾಡ
ನೈಸರ್ಗಿಕವಾಗಿ ದೊರೆಯುವ ಸಂಪನ್ಮೂಲ ಬಳಸಿ ಕರಕುಶಲ ವಸ್ತುಗಳನ್ನು ಸಿದ್ಧಪಡಿಸಿ ಅವುಗಳಿಗೆ ಮಾರುಕಟ್ಟೆ ಕಲ್ಪಿಸುವವರೆಗೂ ಮಹಿಳಾ ಉದ್ಯಮಿಗಳಿಗೆ ಸಹಕಾರ ಒದಗಿಸಲು ಇಕೋ ಗ್ರೀನ್ ಸಂಸ್ಥೆಯೊಂದಿಗೆ ರಾಜ್ಯದಲ್ಲಿ ವೇದಾ ಸಂಸ್ಥೆ ಕಾರ್ಯ ಮಾಡುತ್ತಿದೆ. ಇದೀಗ ಜಿಲ್ಲೆಯಲ್ಲಿ ಮಾರ್ಚ್ನಲ್ಲಿ ತರಬೇತಿ ಆರಂಭಿಸಲಾಗುವುದು ಎಂದು ವೇದಾ ಸಂಸ್ಥೆ ಮುಖ್ಯಸ್ಥೆ ರತಿ ಶ್ರೀನಿವಾಸ ಹೇಳಿದರು.
ನಗರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಇಕೋ ಗ್ರೀನ್ ದೇಶದ 17 ರಾಜ್ಯಗಳಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದು, ಮಹಿಳಾ ಉದ್ಯಮಿ ಅಥವಾ ಗುಂಪುಗಳಿಗೆ, ರೈತರಿಗೆ ಬಾಳೆ ನಾರಿನ ಚಾಪೆ, ತೆಂಗಿನ ಚಿಪ್ಪಿನ ಕರಕುಶಲ ಯೋಜನೆ, ಬಯೋಚಾರ್ ತಯಾರಿಕೆ, ಖಸ್ ಕೃಷಿ ಯೋಜನೆ, ಪೇಪರ್ ಬ್ಯಾಗ್ ಸಿದ್ಧಪಡಿಸುವ ಕರಕುಶಲತೆ ಹಾಗೂ ತಂತ್ರಜ್ಞಾನವನ್ನು ತರಬೇತಿ ಮೂಲಕ ನೀಡುವ ಕಾರ್ಯ ಮಾಡುತ್ತಿದೆ. ಇದೀಗ ಕರ್ನಾಟಕದಲ್ಲಿ ವೇದಾ ಸಂಸ್ಥೆ ಜೊತೆಗೂಡಿದೆ ಎಂದರು.
ಖಸ್ ಎಂಬ ಹುಲ್ಲು ಮತ್ತು ಅದರ ಬೇರು ಔಷಧೀಯ ಮೌಲ್ಯ, ಪರಿಮಳದಲ್ಲಿ ಸಮೃದ್ಧವಾಗಿದೆ. ತೈಲ, ಸೌಂದರ್ಯವರ್ಧಕಗಳು, ಸಾಬೂನು, ಶಾಂಪೂ ಅಂತಹ ಉತ್ಪನ್ನಗಳನ್ನು ತಯಾರಿಸಲಾಗುತ್ತದೆ. ಇಂತಹ ಹಲವು ಕೃಷಿ ಉತ್ಪನ್ನ, ನೈಸರ್ಗಿಕ ಸಂಪನ್ಮೂಲ ಬಳಸಿ ವಸ್ತುಗಳನ್ನು ತಯಾರಿಸಿ ಅವರಿಗೆ ಮಾರುಕಟ್ಟೆ ಸಹ ಸೃಷ್ಟಿಸಲು ಮುಂದಾಗಿದ್ದೇವೆ. ಈ ಕುರಿತು ಮಾರ್ಚ್ ಮೊದಲ ವಾರದಲ್ಲಿ ಧಾರವಾಡದಲ್ಲಿ ಆಸಕ್ತ ಮಹಿಳಾ ಉದ್ಯಮಿ, ಗುಂಪುಗಳಿಗೆ ತರಬೇತಿ ನೀಡಲು ಯೋಜನೆ ರೂಪಿಸಲಾಗಿದೆ ಎಂದರು.
ಉದ್ಯಮಿಗಳಾದ ಜ್ಯೋತಿ ಹಿರೇಮಠ, ಭಾರತಿ ಉಪಾಧ್ಯಾಯ, ತರಬೇತುದಾರ ಬಾಬು, ಪ್ರಕಾಶ ಹೂಗಾರ, ಇತರರು ಇದ್ದರು.