ಮುಳಬಾಗಿಲು: ಈ ಹಿಂದಿನ ಶಾಸಕನಂತೆ ನಾನಲ್ಲ, ಅಧಿಕಾರಿಗಳು ಮತ್ತು ಸರ್ಕಾರಿ ನೌಕರರು ಪ್ರಾಮಾಣಿಕವಾಗಿ ಕರ್ತವ್ಯ ನಿರ್ವಹಿಸಬೇಕು. ಸಾರ್ವಜನಿಕರ ಕೆಲಸ ಕಾರ್ಯಗಳಿಗೆ ತಡೆ ಒಡ್ಡಿ ಕೆಲಸ ಮಾಡಿಕೊಡಲು ಕೈಒಡ್ಡಿ ಲೋಕಾಯುಕ್ತಕ್ಕೆ ಸಿಕ್ಕಿಹಾಕಿಕೊಂಡಾಗ ನಿಮ್ಮ ಕುಟುಂಬವನ್ನು ಬೀದಿಗೆ ಹಾಕಿಕೊಳ್ಳಬೇಡಿ ಎಂದು ಶಾಸಕ ಸಮೃದ್ಧಿ ವಿ.ಮಂಜುನಾಥ್ ಎಚ್ಚರಿಕೆ ನೀಡಿದರು.
ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿ ಆವರಣದ ಕೋಮುಲ್ ಶಿಬಿರ ಕಚೇರಿಯ ಸಭಾಂಗಣದಲ್ಲಿ ಸೋಮವಾರ ತಾಲೂಕು ಪಂಚಾಯಿತಿಯಿಂದ ಹಮ್ಮಿಕೊಂಡಿದ್ದ ವಿವಿಧ ಇಲಾಖೆಗಳ ಪ್ರಗತಿ ಪರಿಶೀಲನೆ ಸಭೆಯಲ್ಲಿ ಮಾತನಾಡಿದ ಅವರು, ಎಚ್ಚರಿಕೆ ನೀಡಿದರೂ ಹಲವು ಅಧಿಕಾರಿಗಳು ಲೋಕಾಯುಕ್ತ ಪೊಲೀಸರ ಕೈಗೆ ಸಿಕ್ಕಿ ಬಿದ್ದಿದ್ದಾರೆ. ಈಗ ಸಿಕ್ಕಿಬಿದ್ದಿರುವ 3 ಇಲಾಖೆಗಳ ಜತೆಗೆ ಇನ್ನು 7 ಇಲಾಖೆಗಳು ಅಧಿಕಾರಿಗಳು ಮತ್ತು ಸಿಬ್ಬಂದಿ ಬಲಿಯಾಗಲಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿದೆ, ನೀವು ಜಾಣರಾಗಿದ್ದರೆ ಜನರೇನು ದಡ್ಡರೇ, ನೀವು ಪಿಡಿಸಿದರೆ ಅಥವಾ ಬ್ರೋಕರ್ಗಳ ಮೂಲಕ ಭ್ರಷ್ಟಾಚಾರಕ್ಕೆ ಯತ್ನಿಸಿದರೂ ಅವರೊಟ್ಟಿಗೆ ನೀವು ಲಾಕ್ ಆಗುವುದು ಖಚಿತ ಎಂದರು.
ನಾನೇನಾದರೂ ಭ್ರಷ್ಟರ ವಿರುದ್ಧ ಕ್ರಮಕ್ಕೆ ಮುಂದಾದರೆ ಅಂಥವರೆಲ್ಲರೂ ನನ್ನ ಮೇಲೆ ದೂರು ಎಳೆದುಕೊಂಡು ಕೊತ್ತೂರು ಬಳಿ ಹೋಗಿ ಸರ್ಕಾರದ ಮೂಲಕ ತಡೆ ಮಾಡಿಕೊಂಡು ಬರುತ್ತಾರೆ. ಅಂಥವರನ್ನು ಇಲ್ಲಿಂದ ಯಾವ ರೀತಿ ಜಾಗ ಖಾಲಿ ಮಾಡಿಸಬೇಕೆಂಬುದು ಗೊತ್ತಿದೆ. ಆ ರೀತಿ ತೊಂದರೆ ತೆಗೆದುಕೊಳ್ಳಬೇಡಿ ಸಿಕ್ಕಿರುವ ಸರ್ಕಾರಿ ಉದ್ಯೋಗಕ್ಕೆ ನ್ಯಾಯ ಕೊಡಿ ಎಂದರು.
ಸಮಾಜ ಕಲ್ಯಾಣ ಇಲಾಖೆ ಹಾಸ್ಟೆಲ್ಗಳಿಗೆ ಆಹಾರ ಪದಾರ್ಥಗಳು ಸರಬರಾಜು ಆಗದೆ ಇರುವ ಬಗ್ಗೆ ಇದುವರೆಗೂ ಗಮನಕ್ಕೆ ತಂದಿಲ್ಲ. ಸರ್ಕಾರಿ ಶಾಲೆಗಳ ದುರಸ್ತಿಗೆ 8 ಕೋಟಿ ರೂ. ಅನುದಾನ ಬೇಕಾಗಿದ್ದು, ತಕ್ಷಣಕ್ಕೆ ಸ್ವಲ್ಪ ಅನುದಾನವನ್ನು ಕೊಡಲಾಗಿದೆ. ಸರ್ಕಾರಕ್ಕೆ ಎಲ್ಲ ಸಮಸ್ಯೆಗಳ ಬಗ್ಗೆ ಪತ್ರ ಬರೆದು ಗಮನ ಸೆಳೆಯಲಾಗಿದ್ದು, ಹಂತ ಹಂತವಾಗಿ ಬಗೆಹರಿಸಲಾಗುವುದು ಎಂದರು.
ನಂಗಲಿಯಲ್ಲಿ ಖಾಸಗಿ ವಿದ್ಯಾಸಂಸ್ಥೆಗೆ ಇನ್ಫೋಸಿಸ್ ಸಂಸ್ಥೆ ಸಿಎಸ್ಆರ್ ಅನುದಾನದಲ್ಲಿ ಶಾಲಾ ಕಟ್ಟಡ ಕಟ್ಟಿಕೊಟ್ಟಿದ್ದು, ಈ ಶಾಲೆಯಲ್ಲಿ ವಿದ್ಯಾರ್ಥಿಗಳಿಂದ ಡೊನೇಷನ್ ಪಡಿಯಲಾಗುತ್ತಿದ್ದು, ಈ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಶ್ನೆಗಳು ಉದ್ಭವವಾಗಿದ್ದರೂ ಅಧಿಕಾರಿಗಳು ಏಕೆ ಸುಮ್ಮನಿದ್ದೀರಿ ಎಂದು ಶಾಸಕರು ಪ್ರಶ್ನಿಸಿದರು.
ತಾಲೂಕಿನಲ್ಲಿ ನಕಲಿ ವೈದ್ಯರು ಅಕ್ರಮವಾಗಿ ಕ್ಲಿನಿಕ್ ನಡೆಸುತ್ತಿದ್ದರೆ ಇನ್ನೊಂದೆಡೆ ಮೆಡಿಕಲ್ ಸ್ಟೋರ್ಗಳು ಒಬ್ಬರ ಹೆಸರಿನಲ್ಲಿ ನಡೆಸುವರು ಮತ್ತೊಬ್ಬರು ವೈದ್ಯರ ಚೀಟಿ ಇಲ್ಲದೆ ಡ್ರಗ್ಸ್ ನೀಡುತ್ತಾರೆ. ಯಾವ ಮಟ್ಟಕ್ಕೆ ಆಡಳಿತ ಕುಸಿದಿದೆ ನೀವು ಮಾಡುವ ಕೆಲಸಕ್ಕೆ ನಾನು ಕೆಟ್ಟ ಹೆಸರು ಪಡೆಯಲು ಸಾಧ್ಯವಿಲ್ಲ, ವರ್ಷಕ್ಕೆ 4 ರಾಷ್ಟ್ರೀಯ ಹಬ್ಬಗಳು ಮತ್ತು ಜಯಂತ್ರಿಗೆ ಮಾತ್ರ ಅಧಿಕಾರಿಗಳಿಂದ ಸಂಪನ್ಮೂಲ ಭರಿಸಲು ಸೂಚನೆ ನೀಡಿದ್ದೇನೆ ಹೊರತು ಬೇರೆ ಯಾವುದೇ ಹೊರೆ ನಿಮ್ಮ ಮೇಲೆ ಹಾಕಿಲ್ಲ ಎಂದರು.
ತಹಸೀಲ್ದಾರ್ ವಿ.ಗೀತಾ, ತಾಪಂ ಆಡಳಿತಾಧಿಕಾರಿ ಟಿ.ಕೆ.ರಮೇಶ್, ಇಒ ಡಾ.ಕೆ.ಸರ್ವೇಶ್, ನಗರಸಭೆ ಪೌರಾಯುಕ್ತ ವಿ.ಶ್ರೀಧರ್, ಬಿಇಒ ಕೆ.ಎನ್.ರಾಮಚಂದ್ರಪ್ಪ ಇದ್ದರು.
ಮೂರನೇ ಕಣ್ಣು ಗಮನಿಸುತ್ತಿದೆ
ಶಾಲೆಗಳಲ್ಲಿ ಕೆಲ ಶಿಕ್ಷಕರು ಇರುವುದೇ ಇಲ್ಲ, ರಿಯಲ್ ಎಸ್ಟೇಟ್, ಬಡ್ಡಿ ವ್ಯವಹಾರ ಮತ್ತಿತರ ಚಟುವಟಿಕೆಗಳಲ್ಲಿ ಇರುತ್ತಾರೆ. ಬಾಲಾಜಿ ಭವನ ಹೋಟೆಲ್ ಬಳಿ ಗುಂಪು ಸೇರಿ ಸಮೃದ್ಧಿ ಈ ತರ, ಕೊತ್ತೂರು ಆ ತರ ಎಂದು ಮಾತನಾಡಿಕೊಳ್ಳುವುದನ್ನು ನನ್ನ ಇಂಟೆಲಿಜೆನ್ಸಿ ಅವರು ಫೋನ್ ಮೂಲಕ ನನಗೆ ಕರೆ ಮಾಡಿ ಕೇಳಿಸುತ್ತಾರೆ. ಎಲ್ಲ ಕಡೆ ನನ್ನ ಮಾಹಿತಿದಾರರು ಇರುತ್ತಾರೆ. ನೀವು ಕಣ್ಣು ಮುಚ್ಚಿಕೊಂಡು ವ್ಯವಹಾರ ಮಾಡುವುದನ್ನೆಲ್ಲಾ ನನ್ನ ಮೂರನೇ ಕಣ್ಣು ಗಮನಿಸುತ್ತದೆ ಎಂದು ಶಾಸಕ ಸಮೃದ್ಧಿ ಮಂಜುನಾಥ್ ತಿಳಿಸಿದರು.