ಗೀತೆಯಿಂದ ಧಾರ್ಮಿಕ ಪ್ರಜ್ಞೆ ಜಾಗೃತ...

ಸುಗುಣೇಂದ್ರ ಶ್ರೀ ಆಶೀರ್ವಚನ

ಗೀತಾಂಬುಧಿ ಕಾವ್ಯಶಿಲ್ಪ ಕೃತಿ ಬಿಡುಗಡೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಭಗವದ್ಗೀತೆಯ ಪಠಣೆಯಿಂದ, ಆರಾಧನೆಯಿಂದ ಸದಾ ಧಾರ್ಮಿಕ ಪ್ರಜ್ಞೆ ಜಾಗೃತವಾಗಿರುತ್ತದೆ. ಇದಕ್ಕೆ ವಿಜ್ಞಾನಿಯಾಗಿರುವ, ಸಾಮಾನ್ಯ ಕಾರ್ಯಕರ್ತನಾಗಿದ್ದ ಕವಿರಾಜ ಅವರೇ ನಿದರ್ಶನ. ಗೀತೆಯ ಅನುಸರಣೆಯಿಂದ ಅವರು ಕವಿಯಾಗಿ, ಕೃತಿ ರಚಿಸಿರುವುದು ಸಂತಸ ತಂದಿದೆ ಎಂದು ಪರ್ಯಾಯ ಪುತ್ತಿಗೆ ಮಠದ ಸುಗುಣೇಂದ್ರ ತೀರ್ಥ ಶ್ರೀಪಾದರು ನುಡಿದರು.

ಗೀತಾ ಪರ್ಯಾಯ

ಶ್ರೀಕೃಷ್ಣನ ಸೇವಾ ಕೈಂಕರ್ಯದ ಚತುರ್ಥ ಪರ್ಯಾಯ ಇದಾಗಿದ್ದು, ವಿಶ್ವಗೀತಾ ಪರ್ಯಾಯ ಎಂದೇ ಆಚರಿಸಲಾಗುತ್ತಿದೆ. ಕೋಟಿ ಗೀತಾ ಅಭಿಯಾನ ಮುಂದುವರಿದಿದೆ. ಈ ಸಂದರ್ಭದಲ್ಲಿ ಭಗವದ್ಗೀತೆಯ ಪ್ರೇರಣೆಯಿಂದ ರಚಿತವಾದ ಮೂರ್ನಾಲ್ಕು ಪುಸ್ತಕ ಬಿಡುಗಡೆ ಮಾಡಲಾಗಿದೆ. ಈಗ ಗೀತೆಯ ಕುರಿತಾಗಿ ಇರುವ ಇನ್ನೊಂದು ಕಾವ್ಯ ಕೃತಿಯನ್ನು ಶ್ರೀಕೃಷ್ಣನಿಗೆ ಸಮರ್ಪಿಸಿದ್ದೇವೆ ಎಂದರು.

ಪರ್ಯಾಯ ಕಿರಿಯ ಯತಿ ಸುಶ್ರೀಂದ್ರ ಶ್ರೀ ಸಾನ್ನಿಧ್ಯ ವಹಿಸಿದ್ದರು. ವಿದುಷಿ ಸುಮೇಧಾ ಆಚಾರ್ಯ, ಕುಮಾರಿ ಪ್ರಸನ್ನಾ ಬಳಗದವರು ಪ್ರಾರ್ಥನೆ ಹಾಗೂ ಗೀತಾಂಬುಧಿ ಧ್ಯೇಯಗೀತೆ ಹಾಡಿದರು. ಸುಗುಣಮಾಲಾ ಪತ್ರಿಕೆಯ ಸಂಪಾದಕ ಮಹಿತೋಷ ಆಚಾರ್ಯ ಸ್ವಾಗತಿಸಿದರು. ಮಠದ ಸಾಂಸ್ಕೃತಿಕ ಕಾರ್ಯಕ್ರಮಗಳ ಸಂಚಾಲಕ ರಮೇಶ ಭಟ್​ ವಂದಿಸಿದರು. ರಾಘವೇಂದ್ರ ಭಟ್​ ಕಾರ್ಯಕ್ರಮ ನಿರೂಪಿಸಿದರು.