ಗಂಗಾವತಿ: ಲೈಂಗಿಕ ಕಿರುಕುಳದ ವಿರುದ್ಧ ಮಹಿಳೆಯರು ಜಾಗೃತರಾಗಬೇಕಿದ್ದು, ಮಹಿಳಾ ರಕ್ಷಣೆಗೆ ಪೂರಕವಾದ ಪೋಸ್ಕೋ ಕಾಯ್ದೆ ಬಗ್ಗೆ ತಿಳಿವಳಿಕೆ ಅಗತ್ಯ ಎಂದು ಸಂಚಾರಿ ಠಾಣೆ ಪಿಎಸೈ ಶಾರದಮ್ಮ ಹೇಳಿದರು.
ನಗರದ ಎಸ್ಕೆಎನ್ಜಿ ಸರ್ಕಾರಿ ಪದವಿ ಕಾಲೇಜಿನಲ್ಲಿ ಲೈಂಗಿಕ ಕಿರುಕುಳ ವಿರೋಧಿ ಮತ್ತು ಆಂತರಿಕ ಗುಣಮಟ್ಟ ಭರವಸೆ ಕೋಶದಡಿಯಲ್ಲಿ ಶನಿವಾರ ಹಮ್ಮಿಕೊಂಡಿದ್ದ ಲೈಂಗಿಕ ಕಿರುಕುಳ ವಿರುದ್ಧದ ಪ್ರತಿರೋಧ ಮತ್ತು ಜಾಗೃತಿ ಕಾರ್ಯಾಗಾರದಲ್ಲಿ ಮಾತನಾಡಿದರು.
ಲೈಂಗಿಕ ಕಿರುಕುಳದ ಹೆಚ್ಚು ಸಂದರ್ಭಗಳಲ್ಲಿ ಮಹಿಳೆಗೆ ಮಾತ್ರ ಬುದ್ದಿವಾದ ಹೇಳುವ ಸಮಾಜದ ತಿಳಿವಳಿಕೆ ಇನ್ನೂ ಬದಲಾಗಿಲ್ಲ. ಬದಲಾಯಿಸುವ ಹಾಗೆ ಮಹಿಳೆಯರು ಬದಲಾಗಬೇಕಾಗಿದೆ. ಪೋಸ್ಕೋ ಕಾಯ್ದೆಯಲ್ಲಿ ಮಹಿಳೆಯರ ರಕ್ಷಣೆಗೆ ಅನೇಕ ಕಾನೂನುಗಳಿವೆ. ಅವುಗಳ ತಿಳಿವಳಿಕೆ ಮತ್ತು ಜಾಗತಿ ಇಂದಿನ ಅಗತ್ಯಗಳಲ್ಲಿ ಒಂದಾಗಿದೆ ಎಂದರು.
ಪ್ರಾಂಶುಪಾಲೆ ಡಾ.ಮುಮ್ತಾಜ್ ಬೇಗಂ ಮಾತನಾಡಿ, ಹೆಣ್ಣನ್ನು ದೇಹ ಮೀಮಾಂಸೆಯ ನೆಲೆಯಲ್ಲಿ ಕಾಣಲಾಗುತ್ತಿದೆ. ಹೆಣ್ಣಿನ ಪ್ರಾಮುಖ್ಯತೆ ಗೌಣಗೊಳಿಸುತ್ತಾ ಬಂದಿರುವ ಇತಿಹಾಸ ನಮ್ಮ ಮುಂದಿದೆ ಎಂದರು.