ಹೊಸಪೇಟೆ: ಸಂಸದರ ಮೊದಲನೇ ಅನುದಾನದಲ್ಲಿ ಸ್ಥಳೀಯ ನಾಗರಿಕರಿಗೆ ನೆಮ್ಮದಿಯ ವಾತಾವಾರಣ ಕಲ್ಪಿಸಲು, ನಗರ ಸೌಂದರ್ಯದ ಉದ್ದೇಶದಿಂದ ಉದ್ಯಾನಗಳ ಅಭಿವೃದ್ಧಿ ಕಾಮಗಾರಿಗೆ ಚಾಲನೆ ನೀಡಲಾಗಿದೆ ಎಂದು ಸಂಸದ ಈ.ತುಕಾರಾಂ ಹೇಳಿದರು.
ಇದನ್ನೂ ಓದಿ:ಗ್ರಾಮೀಣ ರಸ್ತೆಗಳ ಅಭಿವೃದ್ಧಿಗೆ ಆದ್ಯತೆ
ನಗರದ ವಿವಿಧ ವಾರ್ಡ್ಗಳಲ್ಲಿ ಶನಿವಾರ 4 ಕೋಟಿ ರೂ. ವೆಚ್ಚದಲ್ಲಿ ಪಾರ್ಕ್ ಹಾಗೂ ಪಾದಚಾರಿ ಮಾರ್ಗ ಅಭಿವೃದ್ಧಿ ಕಾಮಗಾರಿಗಳಿಗೆ ಭೂಮಿ ಪೂಜೆ ನೆರವೇರಿಸಿ ಮಾತನಾಡಿದರು.
ಕೇಂದ್ರ ಸರ್ಕಾರದ ಅನುದಾನದಲ್ಲಿ ಉದ್ಯಾನಗಳ ಅಭಿವೃದ್ಧಿ ಕೈಗೆತ್ತಿಕೊಳ್ಳಲಾಗಿದೆ. ಮಕ್ಕಳು, ಮಹಿಳೆಯರು, ವಯೋವೃದ್ಧರು, ನಿವೃತ್ತ ನೌಕರರು ಹಾಗೂ ಒತ್ತಡದ ಬದುಕಿನಲ್ಲಿ ಕಾರ್ಯನಿರ್ವಹಿಸುತ್ತಿರುವವರಿಗೆ ವಾಯುವಿಹಾರಕ್ಕೆ ಉದ್ಯಾನ ಸಹಕಾರಿಯಾಗಲಿವೆ. ಪಾರ್ಕ್ಗಳಲ್ಲಿ ಮಕ್ಕಳಿಗೆ ಆಟಿಕೆ ವಸ್ತುಗಳು, ಆಸನಗಳು, ವಿದ್ಯುತ್ ದೀಪ, ಶುದ್ಧ ಕುಡಿಯುವ ನೀರಿನ ವ್ಯವಸ್ಥೆ, ಪಿರಮಿಡ್ ಮಾದರಿಯಲ್ಲಿ ಪರಗೋಲು ಸಹಿತ ಉದ್ಯಾನ ನಿರ್ಮಿಸಲು ಅಧಿಕಾರಿಗಳಿಗೆ ಸೂಚಿಸಲಾಗಿದೆ ಎಂದರು.
ಜೆ.ಪಿ.ನಗರ, ವಿದ್ಯಾನಗರ, ಬಸವೇಶ್ವರ ಬಡಾವಣೆ, ರಾಜಾಜಿ ನಗರ, ಎಂ.ಪಿ.ಪ್ರಕಾಶ ನಗರದ ಪಾರ್ಕ್ಗಳ ಅಭಿವೃದ್ಧಿ ಹಾಗೂ ಮೂರಂಗಡಿ ವೃತ್ತದಿಂದ ಹಂಪಿ ರಸ್ತೆಯ ಮೂಲಕ ಎಂ.ಪಿ.ಪ್ರಕಾಶ ನಗರ ಕ್ರಾಸ್ ವರೆಗೆ ಮತ್ತು ಮಲ್ಲಿಗೆ ಹೊಟೇಲ್ ಮುಂಭಾಗದಿಂದ ಪತ್ತಿಕೊಂಡ ಎನ್ಕ್ಲೇವ್ವರೆಗೆ ಪಾದಚಾರಿ ಮಾರ್ಗ ಅಭಿವೃದ್ಧಿ ಕಾಮಗಾರಿಗಳಿಗೆ ಭೂಮಿ ಪೂಜೆ ನೆರವೇರಿಸಿದರು.