ಮೈಸೂರು: ರಾಜ್ಯದಲ್ಲೀಗ ಗ್ರಾಮ ಪಂಚಾಯಿತಿ ಚುನಾವಣೆಯದ್ದೇ ಸದ್ದು. ಮುಂಬರುವ ಚುನಾವಣೆಗೆ ದಿಕ್ಸೂಚಿ ಎಂದೇ ಬಿಂಬಿತವಾಗಿರುವ ಲೋಕಲ್ ವಾರ್ ತಳಮಟ್ಟದಲ್ಲಿ ಪಕ್ಷಗಳ ಸಂಘಟನೆಯ ಶಕ್ತಿ ಪ್ರದರ್ಶನದ ವೇದಿಕೆಯೂ ಹೌದು. ಈ ಚುನಾವಣೆಯಲ್ಲಿ ಪಕ್ಷಗಳ ಚಿಹ್ನೆ ಬಳಕೆ ಇಲ್ಲವಾದರೂ ಬೆಂಬಲಿತ ಎಂಬ ಅಸ್ತ್ರವಂತೂ ವರ್ಕೌಟ್ ಆಗುತ್ತಿದೆ. ಇಂತಹ ಮಹತ್ವದ ಚುನಾವಣೆಯ ಮತದಾನದಲ್ಲಿ ಬಳಕೆಯಾಗುವ ಶಾಯಿ ಎಲ್ಲಿಯದ್ದು ಗೊತ್ತಾ?
ಗ್ರಾಪಂ ಚುನಾವಣೆಗೆ ಅಗತ್ಯವಿರುವ ಶಾಯಿಯನ್ನು ಮೈಸೂರು ಬಣ್ಣ ಮತ್ತು ಅರಗು ಕಾರ್ಖಾನೆಯು(ಮೈಲ್ಯಾಕ್) ಪೂರೈಸುತ್ತಿದೆ. 5 ಎಂಎಲ್ ಶಾಯಿಯುಳ್ಳ 99,000 ಫಿಯಲ್ಸ್ಗೆ ರಾಜ್ಯ ಚುನಾವಣಾ ಆಯೋಗದಿಂದ ಬೇಡಿಕೆ ಬಂದಿದೆ. 6,580 ಪ್ಯಾಕೆಟ್ ಸೀಲಿಂಗ್ ವ್ಯಾಕ್ಸ್ಗೂ ಬೇಡಿಕೆ ಇದೆ. ಒಟ್ಟು 1.15 ಕೋಟಿ ರೂ. ವಹಿವಾಟು ಆಗುತ್ತಿದೆ.
ಗುಣಮಟ್ಟದ, ಅಳಿಸಲಾಗದ ಶಾಯಿ ಉತ್ಪಾದನೆಯಲ್ಲಿ ಪ್ರಪಂಚದಲ್ಲೇ ಮೈಲ್ಯಾಕ್ ಮುಂಚೂಣಿಯಲ್ಲಿದೆ ಎಂಬುದು ಮತ್ತೊಂದು ಹೆಮ್ಮೆ ಎಂದು ಮೈಲ್ಯಾಕ್ ಅಧ್ಯಕ್ಷ ಫಣೀಶ್ ತಿಳಿಸಿದ್ದಾರೆ. (ದಿಗ್ವಿಜಯ ನ್ಯೂಸ್)