ಕೋಟಿ ರೂ. ವೆಚ್ಚದಲ್ಲಿ ನಗರವನ ನಿರ್ಮಾಣ

ಕೆ. ಕೆಂಚಪ್ಪ, ಮೊಳಕಾಲ್ಮೂರು

ದೇಶಿ ತಳಿಗಳ ಗಿಡ, ಮರ ಪರಿಚಯಿಸುವ ಸದುದ್ಧೇಶದಿಂದ ಪಟ್ಟಣದ ಹೊರ ವಲಯದ ಅರಣ್ಯ ಪ್ರದೇಶದ 60 ಎಕರೆ ವಿಸ್ತೀರ್ಣದಲ್ಲಿ ಬರೋಬ್ಬರಿ ಒಂದು ಕೋಟಿ ರೂ. ಮೊತ್ತದಲ್ಲಿ ಕಾಡು ಸಂಪತ್ತು ಸೇರಿ ಎಲ್ಲ ರೀತಿಯ ಮೂಲ ಸೌಕರ್ಯಗಳುಳ್ಳ ನಗರವನ ನಿರ್ಮಾಣ ಕಾರ್ಯ ಶುರುವಾಗಿದೆ.

ಕೇಂದ್ರ ಹಾಗೂ ರಾಜ್ಯ ಸರ್ಕಾರದ ಸಹಭಾಗಿತ್ವದಲ್ಲಿ ದೇಶಿ ಗಿಡ-ಮರಗಳನ್ನು ಬೆಳೆಸಿ ಜನರಿಗೆ ಅವುಗಳ ಪರಿಚಯ ಮಾಡಿಕೊಡುವುದು ಪ್ರಮುಖ ಉದ್ದೇಶವಾಗಿದೆ. ಮಕ್ಕಳಾದಿಯಾಗಿ ಜನರು ವಿಶ್ರಾಂತಿ ಪಡೆಯಲು ಒಂದು ಸುಂದರ ನಗರವನ ನಿರ್ವಿುಸುವ ಮಹತ್ವಪೂರ್ಣ ಯೋಜನೆ ಇದಾಗಿದೆ. 3-5 ವರ್ಷದೊಳಗೆ ಪೂರ್ಣಗೊಳಿಸಲು ಕಾಲಮಿತಿ ನಿಗದಿಪಡಿಸಲಾಗಿದೆ.

ಮೊಳಕಾಲ್ಮೂರಿನ ಸಾಲುಮರದ ತಿಮ್ಮಕ್ಕ ಉದ್ಯಾನವನ ಸಮೀಪದ ಹಿರೇ ಅಡವಿಯಲ್ಲಿ ನಿರ್ವಣಕ್ಕೆ ಈಗಾಗಲೇ ಚಾಲನೆ ಕೊಡಲಾಗಿದೆ. ಸುತ್ತಲೂ ಕಾಂಪೌಂಡ್, ದ್ವಾರ ಮಂಟಪ, ನಾನಾ ತಳಿಯ ಸಸ್ಯಗಳನ್ನು ಬೆಳೆಸಲು ಗುಂಡಿಗಳನ್ನು ತೋಡಲಾಗುತ್ತಿದೆ.

ಒಂದು ಸಣ್ಣ ಕೆರೆ ನಿರ್ವಣ(ಗೋಕಟ್ಟೆ), ವಿಶೇಷವಾಗಿ ಕರ್ನಾಟಕದ ಮಲೆನಾಡಿನಲ್ಲಿ ಲಭ್ಯವಿರುವ ಬಿದಿರು, ರಾಂಪತ್ರೆ, ಬಿರಾನ್, ಗೇರು, ಮಡಾನ್, ಕಾಫೀ ಗಿಡ, ಗೋಡಂಬಿ ಇನ್ನೂ ಹಲವು ಪ್ರಭೇದಗಳ ನೆಡುತೋಪು, ರಾಶಿವನ, ನಕ್ಷತ್ರವನ ಹಾಗೂ ಔಷಧೀಯ ಸಸ್ಯಗಳುಳ್ಳ ಧನ್ವಂತ್ರಿ ವನ, ಜಪಾನ್ ಮಾದರಿಯ ಮೀಯೊವಾಕಿ ಸಸ್ಯಕ್ಷೇತ್ರ. ಪರಗೋಲ, ಹೀಗೆ ಹಲವು ಬಗೆಯ ವನ ಸಂಪತ್ತನ್ನು ಇಲ್ಲಿ ಬೆಳೆಸಲಾಗುತ್ತದೆ.

ಮಕ್ಕಳಿಗೆ ಅಗತ್ಯ ಆಟಿಕೆಗಳು, ಹಿರಿಯರಿಗೆ ಕುಳಿತು ವಿಶ್ರಾಂತಿ ಪಡೆಯಲು ಕುರ್ಚಿಗಳು, ಶುದ್ಧ ಕುಡಿಯುವ ನೀರು, ಶೌಚಗೃಹ ಸೇರಿ ಒಟ್ಟಾರೆಯಾಗಿ ಜನರನ್ನು ಆಕರ್ಷಿಸುವ ರೀತಿಯಲ್ಲಿ ನಗರವನ ನಿರ್ವಣವಾಗಲಿದೆ.