ಹೊಸಕೋಟೆ : ಪ್ರತಿಯೊಬ್ಬರಿಗೂ ವಿದ್ಯುತ್ ಅತ್ಯವಶ್ಯಕ. ಆದರೆ ವಿದ್ಯುತ್ ಪ್ರಯೋಜನ ಪಡೆಯಬಹುದೇ ಹೊರತು ಅದನ್ನು ಮುಟ್ಟಿ ಬಲವಂತದ ಬಳಕೆ ಮಾಡುವುದು ನಿಷೇದ ಎಂದು ಬೆಸ್ಕಾಂನ ಎಇಇ ಪುಟ್ಟಸ್ವಾಮಿ ತಿಳಿಸಿದರು.
ಬೆಸ್ಕಾಂನಿಂದ ನಗರದಲ್ಲಿ ಹಮ್ಮಿಕೊಂಡಿದ್ದ ಸಾರ್ವಜನಿಕ ಜಾಗೃತಿ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ವಿದ್ಯುತ್ ಸುರಕ್ಷತೆ ಬಗ್ಗೆ ಎಲ್ಲರೂ ತಿಳಿಯಬೇಕು. ಮೊದಲು ವಿದ್ಯುತ್ ತಂತಿಗಳಿಂದ ದೂರವಿರಿ, ವಿದ್ಯುತ್ ಸ್ವಿಚ್ ಹಾಗೂ ವಿದ್ಯುತ್ ಉಪಕರಣಗಳನ್ನು ಮಕ್ಕಳಿಂದ ದೂರವಿಡಿ. ಮನೆಯಲ್ಲಿ ಬಳಸುವ ಯಾವುದೇ ವಿದ್ಯುತ್ ಚಾಲಿತ ಉಪಕರಣಗಳಿಗೆ ಮೂರು ಪಿನ್ಗಳ ಸಾಕೆಟ್/ಪ್ಲಗ್ಗಳನ್ನು ಬಳಸಿ. ಮನೆಯ ವಿದ್ಯುತ್ ಸಂಪರ್ಕದ ವೈರಿಂಗ್ ಕೆಲಸಗಳನ್ನು ಸರ್ಕಾರಿ ಲೈಸನ್ಸ್ ಹೊಂದಿದ ವಿದ್ಯುತ್ ಗುತ್ತಿಗೆದಾರರಿಂದ ಮಾಡಿಸಿ. ಮನೆ ಅಥವಾ ಯಾವುದೇ ವಿದ್ಯುತ್ ಸಂಪರ್ಕ ಪಡೆಯುವಾಗ ಗ್ರೌಂಡಿಂಗ್ ವ್ಯವಸ್ಥೆ ಮಾಡಿದೆಯೇ ಎಂದು ಪರಿಶೀಲಿಸಿ. ವಿದ್ಯುತ್ ಸಂಪರ್ಕಕ್ಕೆ ಬೇಕಾದ ಎಲ್ಲ ಉಪಕರಣಗಳನ್ನು ಐಎಸ್ಐ ಪ್ರಮಾಣ ಪತ್ರ ಇದೆಯೇ ಎಂದು ಪರಿಶೀಲಿಸಿ. ಯಾವುದೇ ಕಾರಣಕ್ಕೂ ಕಟ್ಟಡಗಳನ್ನು ವಿದ್ಯುತ್ ತಂತಿಗಳ ಸಮೀಪ ನಿರ್ಮಿಸಬೇಡಿ ಎಂದರು.
ತುಂಡಾಗಿರುವ ವಿದ್ಯುತ್ ತಂತಿಗಳನ್ನು ಮುಟ್ಟಬೇಡಿ, ವಿದ್ಯುತ್ ಸ್ವಿಚ್ ಹಾಗೂ ಉಪಕರಣಗಳನ್ನು ಒದ್ದೆಯ ಕೈಗಳಿಂದ ಮುಟ್ಟಬೇಡಿ, ವಿದ್ಯುತ್ ಕಂಬಗಳಿಗೆ ಬ್ಯಾನರ್ ಅಥವಾ ಜಾಹೀರಾತು ಲಕ ಕಟ್ಟಬೇಡಿ, ವಿದ್ಯುತ್ ಕಂಬಗಳಿಗೆ ತಂತಿ ಕಟ್ಟಿ ಒದ್ದೆ ಬಟ್ಟೆಗಳನ್ನು ಒಣಹಾಕಬೇಡಿ. ವಿದ್ಯುತ್ ಕಂಬಗಳಿಂದ ಅಕ್ರಮ ಸಂಪರ್ಕ ಪಡೆಯಬೇಡಿ ಎಂದು ಸಾರ್ವಜನಿಕರಿಗೆ ಅರಿವಿ ಮೂಡಿಸುವ ಸೈನ್ ಬೋರ್ಡ್ಗಳನ್ನು ಪ್ರದರ್ಶನ ಮಾಡುತ್ತಾ ಇಂದು ನಗರದಾದ್ಯಂತ ಸಾರ್ವಜನಿಕರಿಗೆ ಜಾಗೃತಿ ಮೂಡಿಸಲಾಯಿತು ಎಂದು ಹೇಳಿದರು.