ಡಿಜಿಟಲ್ ಜಗತ್ತಿನಲ್ಲಿ ಕನ್ನಡ ಕಣ್ಮರೆಯಾಗುವ ಆತಂಕ

ಶಿವಮೊಗ್ಗ: ಆಧುನಿಕ ಡಿಜಿಟಲ್ ಜಗತ್ತಿನಲ್ಲಿ ಕನ್ನಡ ಭಾಷೆಯನ್ನು ಕಳೆದುಕೊಳ್ಳುವ ಆತಂಕ ಕಾಡುತ್ತಿದೆ ಎಂದು ವಿಮರ್ಶಕ ಡಾ. ರಾಜೇಂದ್ರ ಚೆನ್ನಿ ಕಳವಳ ವ್ಯಕ್ತಪಡಿಸಿದರು.

ನಗರದ ಕಟೀಲ್ ಅಶೋಕ್ ಪೈ ಸ್ಮಾರಕ ಕಾಲೇಜಿನಲ್ಲಿ ಕನ್ನಡ ರಾಜ್ಯೋತ್ಸವ ಅಂಗವಾಗಿ ಭಾನುವಾರ ‘ಶ್ರಮಜೀವಿಗಳ ಕನ್ನಡ’ ವಿಚಾರ ಗೋಷ್ಠಿಯನ್ನು ವೆಬಿನಾರ್ ಮೂಲಕ ಉದ್ಘಾಟಿಸಿ ಮಾತನಾಡಿದರು.

ಸಾಹಿತ್ಯ ಕೃತಿಗಳಿಂದ ಕನ್ನಡ ಭಾಷೆ ಸೃಷ್ಟಿಯಾಗುವುದಿಲ್ಲ. ಬದಲಿಗೆ ಶ್ರಮದಲ್ಲಿ ತೊಡಗಿಕೊಳ್ಳುವವರು ಭಾಷೆಯನ್ನು ಉಳಿಸುತ್ತಿದ್ದಾರೆ. ಜತೆಗೆ ಅವರ ಕೆಲಸಗಳೇ ಭಾಷೆಯನ್ನು ಬೆಳೆಸುತ್ತಿದೆ. ಭಾಷೆಯನ್ನು ಕಟ್ಟಿಕೊಟ್ಟಂತಹ ಶ್ರಮಜೀವಿಗಳಿಗೆ ವಂದನೆ ಸಲ್ಲಿಸುವುದು ನಿಜವಾದ ಭಾಷಾ ಪ್ರೇಮವಾಗುತ್ತದೆ ಎಂದರು.

ತಂತ್ರಜ್ಞಾನ ಕೇವಲ ವಿಜ್ಞಾನಿಗಳು ಅಥವಾ ವಿಶ್ಲೇಷಕರಿಗೆ ಸೀಮಿತ ಎಂದು ಹಲವರು ಭಾವಿಸಿದ್ದಾರೆ. ಆದರೆ ಶ್ರಮಜೀವಿಗಳು ಕನ್ನಡ ಭಾಷೆ ಬಗ್ಗೆ ಬಹುದೊಡ್ಡ ಕಲ್ಪನೆ ಕಟ್ಟಿಕೊಡಲಿದ್ದು ವಿಭಿನ್ನತೆಯನ್ನು ಒಳಗೊಂಡಿರುವ ಕನ್ನಡ ಭಾಷೆಯನ್ನು ಚಾರಿತ್ರಿಕವಾಗಿ ಬೆಳೆಸುವ ಪ್ರಯತ್ನ ನಡೆಸಬೇಕಾಗಿದೆ ಎಂದು ಹೇಳಿದರು.

ವ್ಯಾಪಾರ-ವಹಿವಾಟು, ಹಣಕಾಸಿನ ಸಂದರ್ಭದಲ್ಲಿ ಕನ್ನಡ ಭಾಷೆ ಹೆಚ್ಚೆಚ್ಚು ಶ್ರೀಮಂತಗೊಳ್ಳುತ್ತಿದೆ. ಜಗತ್ತಿನ ಎಲ್ಲ ಶ್ರೇಷ್ಠ ಕೃತಿಗಳಲ್ಲಿ ಕನ್ನಡಕ್ಕೂ ಮಾನ್ಯತೆ ಸಿಕ್ಕಿದ್ದು ಜ್ಞಾನದ ಭಾಷೆಯಾಗಿ ಕನ್ನಡ ಬೆಳೆದಿದೆ ಎಂದರು.

ಸಹ್ಯಾದ್ರಿ ಕಲಾ ಕಾಲೇಜಿನ ಭಾಷಾ ಅಧ್ಯಯನ ಕೇಂದ್ರದ ಪ್ರಾಧ್ಯಾಪಕ ಡಾ. ಮಲ್ಲಿಕಾರ್ಜುನ ಮೇಟಿ ಮಾತನಾಡಿ, ಅನ್ಯಭಾಷೆಗಳಿಂದ ಕನ್ನಡ ಕುಲಗೆಟ್ಟಿದೆ. ಆದರೆ ಸಂಸ್ಕೃತದ ಜತೆಗಿರುವ ಕನ್ನಡಕ್ಕೆ ಯಾವುದೆ ಧಕ್ಕೆ ಬಂದಿಲ್ಲ. ಯಾಂತ್ರಿಕ ಸ್ಥಿತಿಗೆ ತಲುಪಿರುವ ಭಾಷೆಗಳು ಪರಿಕರಗಳಂತೆ ಕೆಲಸ ಮಾಡುವ ಚೈತನ್ಯ ಕಳೆದುಕೊಂಡಿವೆ. ಆದರೆ ಕನ್ನಡ ಮಾತ್ರ ಜೀವಂತ ಮತ್ತು ಚಲನಾಶೀಲ ಉದ್ಯಮವಾಗಿ ಜಗತ್ತಿನೆಲ್ಲೆಡೆ ಪಸರಿಸುತ್ತಿದೆ ಎಂದು ಅಭಿಪ್ರಾಯಪಟ್ಟರು.

ವಿಚಾರಗೋಷ್ಠಿಯಲ್ಲಿ 30ಕ್ಕೂ ಅಧಿಕ ಭಾಷಾ ಪ್ರೇಮಿಗಳು ಪಾಲ್ಗೊಂಡಿದ್ದರು.