ರಾಜಧಾನಿಯಲ್ಲಿನ 3-4 ವರ್ಷಗಳಲ್ಲಿ ಸಮಗ್ರ ಪರಿಹಾರ

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ರಾಜಧಾನಿಯಲ್ಲಿ ಸಂಚಾರ ಸಿಕ್ಕಿನ ಸಮಸ್ಯೆ ಹೆಚ್ಚಾಗಿದ್ದು, 104 ಕಿಮೀ ಬಿಜಿನೆಸ್​ ಕಾರಿಡಾರ್​, ಸುರಂಗ ಮಾರ್ಗ ಹಾಗೂ 130 ಕಿಮೀ ಮೇಲ್ಸೇತುವೆ ಯೋಜನೆಗಳ ಮೂಲಕ 3&-4 ವರ್ಷದಲ್ಲಿ ಪರಿಹಾರ ಕಂಡುಕೊಳ್ಳುವ ಗುರಿ ಹೊಂದಲಾಗಿದೆ ಎಂದು ಡಿಸಿಎಂ ಡಿ.ಕೆ. ಶಿವಕುಮಾರ್​ ತಿಳಿಸಿದ್ದಾರೆ.

ಜಿಬಿಎ ಪ್ರಾಧಿಕಾರದ ದೃಷ್ಟಿಕೋನ, ಕಾನೂನು ಚೌಕಟ್ಟು ಹಾಗೂ ಹೊಂದಾಣಿಕೆ ಕುರಿತು ಚರ್ಚಿಸಲು ಬೆಂಗಳೂರು ಪಾಲಿಟಿಕಲ್​ ಆ್ಯಕ್ಷನ್​ ಕಮಿಟಿ ಮತ್ತು ಮೌಂಟ್​ ಕಾರ್ಮೆಲ್​ ಕಾಲೇಜು ಸಂಯುಕ್ತ ಆಶ್ರಯದಲ್ಲಿ ಬುಧವಾರ ಹಮ್ಮಿಕೊಂಡಿದ್ದ "ಜಿಬಿಎ& ಬೆಂಗಳೂರಿನ ಉತ್ತಮ ಆಡಳಿತದೆಡೆ' ಸಂವಾದ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಉತ್ತಮ ಶಿಕ್ಷಣ ಹಾಗೂ ಉದ್ಯೋಗವನ್ನರಸಿ ಗ್ರಾಮೀಣ ಜನರು ನಗರಗಳತ್ತ ಬರುತ್ತಾರೆ. ಬೆಂಗಳೂರಿನಲ್ಲಿ ಅಂತಹ ವಲಸಿಗರೇ ತುಂಬಿದ್ದಾರೆ. ಸರ್ಕಾರವು ಇಲ್ಲಿ ಏಕೀಕೃತ ಮತ್ತು ಪರಿಣಾಮಕಾರಿ ಆಡಳಿತ ನೀಡಲು ಬದ್ಧವಾಗಿದೆ. ಈ ನಿಟ್ಟಿನಲ್ಲಿ 368 ಹೊಸ ವಾರ್ಡ್​ಗಳನ್ನು ರಚಿಸಲಾಲಾಗಿದೆ. ಅದಕ್ಕೆ ಶೀಘ್ರದಲ್ಲೇ ಮತ್ತೊಂದು ವಾರ್ಡ್​ ಸೇರ್ಪಡೆಯಾಗಲಿದೆ ಎಂದು ಮಾಹಿತಿ ನೀಡಿದರು.

ಜಿಬಿಎ ಮುಖ್ಯ ಆಯುಕ್ತ ಎಂ. ಮಹೇಶ್ವರ ರಾವ್​ ಮಾತನಾಡಿ, ನಗರದಲ್ಲಿ ಸುಸಜ್ಜಿತ ರಸ್ತೆ, ಸ್ವಚ್ಛತೆ, ಫುಟ್​ಪಾತ್​ಗಳ ಸುಧಾರಣೆ ಪ್ರಮುಖ ಆದ್ಯತೆಯಾಗಿದೆ. ಎಲ್ಲ ಅಧಿಕಾರಿಗಳು ಈ ವಿಚಾರದಲ್ಲಿ ಬದ್ಧತೆಯಿಂದ ಕಾರ್ಯ ನಿರ್ವಹಿಸಲು ಪಣ ತೊಟ್ಟಿದ್ದಾರೆ ಎಂದರು.

ಶಾಸಕ ರಿಜ್ವಾನ್​ ಅರ್ಷದ್​ ಸಂವಾದದಲ್ಲಿ ಭಾಗವಹಿಸಿದ್ದರು. ಬಿಎಂಆರ್​ಸಿಎಲ್​ ವ್ಯವಸ್ಥಾಪಕ ನಿರ್ದೇಶಕ ಡಾ. ಜೆ.ರವಿಶಂಕರ್​, ಬಿಎಸ್​ಡಬ್ಲ್ಯುಎಂಎಲ್​ ಸಿಇಒ ಕರೀಗೌಡ, ಡಿಸಿಪಿ ಡಾ.ಅನೂಪ್​ ಶೆಟ್ಟಿ, ಪಶ್ಚಿಮ ಪಾಲಿಕೆ ಆಯುಕ್ತ ಡಾ. ಕೆವಿರಾಜೇಂದ್ರ ಮತ್ತಿತರರಿದ್ದರು.

ಪರ್ಯಾಯ ಪರಿಹಾರವಿಲ್ಲ

ಸುರಂಗ ಮಾರ್ಗಕ್ಕೆ ಸಾಕಷ್ಟು ವಿರೋಧವಿದೆ ಎಂಬುದು ಗೊತ್ತಿದೆ. ಎಲ್ಲರನ್ನೂ ತೃಪ್ತಿಪಡಿಸಲು ಆಗುವುದಿಲ್ಲ. ಟೀಕೆ ಇದ್ದೇ ಇರುತ್ತದೆ. ಸಾರ್ವಜನಿಕ ಸಾರಿಗೆ ಉತ್ತಮ ಆಯ್ಕೆಯೆಂಬುದು ನಿಜ. ಹೊಸದಾಗಿ ಸಾವಿರ ಬಸ್​ಗಳನ್ನು ಸೇರಿಸಲು ನಾನು ಸಿದ್ಧ. ಆಗ ಜನರೆಲ್ಲರೂ ಬಸ್​ನಲ್ಲೇ ಪ್ರಯಾಣ ಮಾಡುತ್ತಾರಾ? ಸುರಂಗ ಮಾರ್ಗದ ಹೊರತಾಗಿ ಪರ್ಯಾಯ ಪರಿಹಾರ ಏನಿದೆ ಎಂದು ಡಿಸಿಎಂ ಪ್ರಶ್ನಿಸಿದರು.

ಒಂದೇ ಒಂದು ಕೆಲಸ ಮಾಡದ ಬಿಜೆಪಿ ನಾವು ಬೆಂಗಳೂರಿನಲ್ಲಿ 104 ಕಿ.ಮೀ. ಉದ್ದದ "ಬೆಂಗಳೂರು ಬಿಜಿನೆಸ್​ ಕಾರಿಡಾರ್​' ಯೋಜನೆ ರೂಪಿಸಿದ್ದೇವೆ. 40 ಕಿ.ಮೀ. ಟನಲ್​ ರಸ್ತೆ ನಿರ್ಮಿಸಲಾಗುವುದು. ಆದರೆ ಬಿಜೆಪಿ ನಾಲ್ಕು ವರ್ಷಗಳ ಅಧಿಕಾರದಲ್ಲಿದ್ದಾಗ ಒಂದೇ ಒಂದು ಕೆಲಸ ಮಾಡಿದ್ದರೆ ಹೇಳಿ, ನಾನು ಇಲ್ಲೇ ನನ್ನ ಹೆಸರು ಬದಲಾಯಿಸಿಕೊಂಡು ಹೋಗುತ್ತೇನೆ ಎಂದು ಡಿ.ಕೆ. ಶಿವಕುಮಾರ್​ ಸವಾಲು ಹಾಕಿದರು.