ಕೊಪ್ಪಳ: ದೇಶದಲ್ಲಿ ನಡೆಯುತ್ತಿರುವ ಮಹಿಳೆಯರ ಮೇಲಿನ ದೌರ್ಜನ್ಯ, ಅತ್ಯಾಚಾರ ಹಾಗೂ ಕೊಲೆಗಳನ್ನು ಖಂಡಿಸಿ ಒಳ್ಳೆಯ ಸಮಾಜ ಕಟ್ಟಲು ಮಹಿಳೆಯರು ಟೊಂಕ ಕಟ್ಟಿ ನಿಲ್ಲಬೇಕಿದೆ ಎಂದು ಡಬ್ಲೂಐಎಂ ರಾಷ್ಟ್ರೀಯ ನಾಯಕಿ ಪ್ರೊ.ಸೈಯದಾ ಸಾದಿಯ ಹೇಳಿದರು.
ನಗರದಲ್ಲಿ ಬುಧವಾರ ಆಯೋಜಿಸಿದ್ದ ವಿಮೆನ್ ಇಂಡಿಯಾ ಮೂವ್ಮೆಂಟ್ (ಡಬ್ಲೂಐಎಂ) ಸದಸ್ಯತ್ವ ಕಾರ್ಯಕ್ರಮದಲ್ಲಿ ಮಾತನಾಡಿದರು. ಮಹಿಳೆಯರು ದಮನಿತರ ಧ್ವನಿಯಾಗಿ ದೇಶದ ರಾಜಕೀಯದಲ್ಲಿ ಭಾಗವಹಿಸಬೇಕಿದೆ. ಹೋರಾಟ, ಪ್ರತಿಭಟನೆಗಳಿಂದ ತಮ್ಮ ಹಕ್ಕು ಪಡೆಯಲು ಸಾಧ್ಯ ಎಂದರು.
ದೇಶದಲ್ಲಿ ಹಿಜಾಬ್, 2&ಬಿ ಮೀಸಲಾತಿ, ಜಾತಿ ಗಣತಿ, ಎನ್ಆರ್ಸಿ ಹೋರಾಟದಲ್ಲಿ ಪಾಲ್ಗೊಂಡಿದ್ದ ಜೆಎನ್ಯು ವಿದ್ಯಾರ್ಥಿಗಳು ಜೈಲಿನಲ್ಲಿದ್ದಾರೆ. ಅವರಿಗೆ ನ್ಯಾಯ ಕೊಡಿಸುವವರು ಯಾರು ? ಕಾಂಗ್ರೆಸ್ ಹಾಗೂ ಸೆಕ್ಯುಲರ್ ಪಕ್ಷಗಳು ಮಾತಾನಾಡುತ್ತಿಲ್ಲ ಯಾಕೆ ?ಹಲವಾರು ನಾಯಕರು ಜೈಲಿನಲ್ಲಿದ್ದು, ಅವರ ಬಗ್ಗೆ ಮಾತನಾಡುವವರು ಯಾರು ? ದಲಿತರು, ಹಿಂದುಳಿದವರು, ರೈತರಿಗೆ ಕೇಂದ್ರದ ಬಿಜೆಪಿ ಆಡಳಿತ ಮಾರಕವಾಗಿದೆ. ದಿನನಿತ್ಯ ಮಹಿಳೆಯರ ಮೇಲೆ ದೌರ್ಜನ್ಯ, ರೇಪ್, ಕೊಲೆಗಳನ್ನು ಮಾಡುವವರ ಮೇಲೆ ಕಠಿಣ ಕಾನೂನು ರೂಪಿಸುವಲ್ಲಿ ಹಾಗೂ ಮಹಿಳೆಯರಿಗೆ ಸಂಪೂರ್ಣ ಸುರಕ್ಷತೆ ನೀಡುವಲ್ಲಿ ಕಾಂಗ್ರೆಸ್ ಮತ್ತು ಬಿಜೆಪಿ ಸರ್ಕಾರಗಳು ವಿಫಲವಾಗಿವೆ. ಆದ್ದರಿಂದ ಮಹಿಳೆಯರು ಪರ್ಯಾಯ ರಾಜಕೀಯ ಶಕ್ತಿಯಾಗಿ ಹೊರ ಹೊಮ್ಮಬೇಕಾಗಿದೆ ಎಂದು ಹೇಳಿದರು.
ಡಬ್ಲೂಐಎಂ ಜಿಲ್ಲಾಧ್ಯಕ್ಷೆ ಸುಹಾನಾ ನಾಜ್, ಪ್ರಮುಖರಾದ ಉಮ್ಮೆ ರುಮಾನ, ಸೈಯದ್ ಸಲೀಂ ಖಾದ್ರಿ, ಶಾಕಿರ ಬೇಗಂ ಇತರರಿದ್ದರು.