ಕೊಪ್ಪಳ: ಭೂ ವ್ಯಾಜ್ಯಕ್ಕೆ ಸಂಬಂಧಿಸಿದಂತೆ ನ್ಯಾಯಾಲಯದ ಆದೇಶ ಪಾಲಿಸದ ಕಾರಣ ತಹಸೀಲ್ದಾರ್ ವಿಠ್ಠಲ್ ಚೌಗಲಾಗೆ ಧಾರವಾಡ ಹೈಕೋರ್ಟ್ ಚಾಟಿ ಬೀಸಿದೆ. ಆಜ್ಞೆ ಪಾಲಿಸದಿದ್ದಲ್ಲಿ ದಂಡ ವಿಧಿಸುವ ಎಚ್ಚರಿಕೆ ನೀಡಿದೆ. ಈ ಬೆನ್ನಲ್ಲೇ ಎಚ್ಚೆತ್ತ ತಹಸೀಲ್ದಾರ್ ಆದೇಶ ಪಾಲನೆ ಗೆ ಸಂಬಂಧಿಸಿದ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.
ಲತಾ ಅಳವಂಡಿಕರ್ ಎಂಬುವರ ಭೂ ವ್ಯಾಜ್ಯ ಸಂಬಂಧ ಕೊಪ್ಪಳ ನ್ಯಾಯಾಲಯ ನೀಡಿದ ತಡೆಯಾಜ್ಞೆ ವಿಷಯ ಪಹಣಿ ಕಾಲಂ 11ರಲ್ಲಿ ಆದೇಶದ ವಿಷಯ ನಮೂದಿಗೆ ಸೂಚಿಸಿದೆ. ಈ ಸಂಬಂಧ ಲತಾ ಸಲ್ಲಿಸಿದ್ದ ಅರ್ಜಿಯನ್ನು ತಹಸೀಲ್ದಾರ್ ತಿರಸ್ಕರಿಸಿದ್ದಾರೆ. ಕೋರ್ಟ್ ಆದೇಶ ಪ್ರಸ್ತಾಪಿತ ವಿಷಯಕ್ಕೆ ಸೀಮಿತ. ವಿಶೆಷ ತಹಸೀಲ್ದಾರ್ಗೆಂದು ಉಲ್ಲೇಖಿಸಿದ್ದು ತಮಗೆ ಅನ್ವಯ ಆಗದೆಂದು ಹಿಂಬರಹ ನೀಡಿದ್ದಾರೆ. ತಹಸೀಲ್ದಾರ್ ಆದೇಶ ಪ್ರಶ್ನಿಸಿ ಲತಾ ಹೈಕೋರ್ಟ್ ಮೆಟ್ಟಿಲೇರಿದ್ದರು.
ವಿಚಾರಣೆ ನಡೆಸಿದ ನ್ಯಾಯಾಲಯ ತಹಸೀಲ್ದಾರ್ ನಡೆಗೆ ಗರಂ ಆಗಿದೆ. ತಹಸೀಲ್ದಾರ್ ಖುದ್ದಾಗಿ ಹಾಜರಾಗಬೇಕು. ನಾಲ್ಕು ಸರ್ವೇ ನಂಬರ್ ಇದ್ದು, ತಲಾ ಒಂದಕ್ಕೆ 10 ಸಾವಿರ ರೂ.ನಂತೆ ದಂಡ ಹಾಕಲಾಗುವುದೆಂದು ಮೌಖಿಕವಾಗಿ ಎಚ್ಚರಿಕೆ ನೀಡಿದೆ. ಈ ಬೆನ್ನಲ್ಲೇ ಎಚ್ಚೆತ್ತ ತಹಸೀಲ್ದಾರ್ ಪಹಣಿಯ ಕಲಂ ನಂ.11ರಲ್ಲಿ ತಾತ್ಕಾಲಿಕ ತಡೆಯಾಜ್ಞೆ ನಮೂದಿಸಲು ಸಂಬಂಧಿಸಿದ ಅಧಿಕಾರಿಗಳಿಗೆ ಆದೇಶಿಸಿದ್ದಾರೆ.
ಪ್ರಕರಣ ವಿವರ
ಕೊಪ್ಪಳ ನಗರದ ಲತಾ ರಮೇಶ ಅಳವಂಡಿಕರ್ ಎಂಬುವರು ಭೂ ವ್ಯಾಜ್ಯ ಸಂಬಂಧ ಕೊಪ್ಪಳದ ಹಿರಿಯ ಶ್ರೇಣಿ ಸಿವಿಲ್ ನ್ಯಾಯಾಲಯದಲ್ಲಿ ದಾವೆ ಹೂಡಿದ್ದಾರು. ಅಳವಂಡಿ ಗ್ರಾಮದಲ್ಲಿನ ವಿವಿಧ 4 ಸರ್ವೇ ನಂಬರ್ ನಲ್ಲಿನ ಒಟ್ಟು ಸುಮಾರು 12 ಎಕರೆ ಭೂಮಿಯ ವಿವಾದಕ್ಕೆ ಸಂಬಂಧಿಸಿದಂತೆ ತಮ್ಮ ಪಾಲಿನ ಹಕ್ಕಿಗಾಗಿ ಕೋರ್ಟ್ ಮೆಟ್ಟಿಲೇರಿದ್ದಾರೆ. ಮೂಲ ಮಾಲೀಕ ವಾಮನ್ರಾವ್ ನಿಧನರಾಗಿದ್ದು, ಮಕ್ಕಳಾದ ಶಂಕರ್, ರಮೇಶ ಪಾಲಿನ ಆಸ್ತಿ ಹಕ್ಕು ಸಂಬಂಧ ದಾವೆ ಹೂಡಿದ್ದಾರೆ. ಪ್ರಕರಣದಲ್ಲಿ ನ್ಯಾಯಾಲಯ ಮಾಡಿದ ಮಧ್ಯಂತರ ಆದೇಶ ನಮೂದಿಗೆ ತಹಸೀಲ್ದಾರ್ ತಿರಸ್ಕರಿಸಿದ್ದರು.