ಕೊಪ್ಪಳ: ಜಾನುವಾರುಗಳನ್ನು ಕಾಲು&ಬಾಯಿ ರೋಗದಿಂದ ಮುಕ್ತಗೊಳಿಸಬೇಕು. ಹೀಗಾಗಿ ಎಲ್ಲ ರಾಸುಗಳಿಗೆ ಕಡ್ಡಾಯವಾಗಿ ಲಸಿಕೆ ಹಾಕಿ ಎಂದು ಎಡಿಸಿ ಸಿದ್ರಾಮೇಶ್ವರ ಪಶುಪಾಲನಾ ಅಧಿಕಾರಿಗಳಿಗೆ ನಿರ್ದೇಶಿಸಿದರು.
ನಗರದ ಡಿಸಿ ಕಚೇರಿ ಸಭಾಂಗಣದಲ್ಲಿ ಕಾಲು&ಬಾಯಿ ಲಸಿಕಾ ಅಭಿಯಾನ ಪೋಸ್ಟರ್ ಬಿಡುಗಡೆ ಮಾಡಿ ಮಾತನಾಡಿದರು.
ರಾಷ್ಟ್ರೀಯ ಜಾನುವಾರು ರೋಗಗಳ ನಿಯಂತ್ರಣ ಯೋಜನೆಯಡಿ ಜಿಲ್ಲೆ ಜಾನುವಾರುಗಳಿಗೆ ಕಾಲು&ಬಾಯಿ ರೋಗಕ್ಕೆ 7ನೇ ಸುತ್ತಿನ ಲಸಿಕೆ ಹಾಕಬೇಕಿದೆ. ಏ.21ರಿಂದ ಜೂನ್ 4ವರೆಗೆ ಲಸಿಕಾ ಅಭಿಯಾನ ನಡೆಯಲಿದೆ. ರೈತರಿಗೆ ಆರ್ಥಿಕ ಸಂಕಷ್ಟ ಉಂಟು ಮಾಡುವ ರೋಗದಿಂದ ರಾಜ್ಯ ಮುಕ್ತ ಮಾಡಬೇಕಿದೆ. ಜಿಲ್ಲೆಯಲ್ಲಿ ಅಭಿಯಾನ ಸಮರ್ಪಕವಾಗಿ ಅನುಷ್ಠಾನ ಮಾಡಿ. ಯಾವೊಂದು ಜಾನುವಾರು ಬಿಡದಂತೆ ಲಸಿಕೆ ಹಾಕಿ. ಈ ಬಗ್ಗೆ ರೈತರು, ಸಾರ್ವಜನಿಕರಿಗೆ ಅರಿವು ಮೂಡಿಸುವಂತೆ ಅಧಿಕಾರಿಗಳಿಗೆ ಸೂಚಿಸಿದರು.
ಲಸಿಕಾ ಅಭಿಯಾನ ಪೋಸ್ಟರ್ ಬಿಡುಗಡೆಗೊಳಿಸಿದರು. ಪಶುಪಾಲನಾ ಇಲಾಖೆ ಡಿಡಿ ಡಾ.ಪಿ.ಎಂ.ಮಲ್ಲಯ್ಯ, ಯಲಬುರ್ಗಾ ಸಹಾಯಕ ನಿರ್ದೇಶಕ ಡಾ.ಪ್ರಕಾಶ, ಕೊಪ್ಪಳ ಸಹಾಯಕ ನಿರ್ದೇಶಕ ಡಾ.ವಿನೋದ ಕುಮಾರ್, ಕುಕನೂರ ಸಹಾಯಕ ನಿರ್ದೇಶಕ ಡಾ.ಸುರೇಶ್ ಇತರರಿದ್ದರು.