7,57,955 ರೂಪಾಯಿ ಮೌಲ್ಯದ ಚಿನ್ನಾಭರಣ ವಶ

ನ. 29ರಂದು ನವಲಗುಂದ ಪಟ್ಟಣದ ಜಗದೀಶ ವಿರೂಪಾಕ್ಷಪ್ಪ ಮುಳ್ಳೂರ ಎಂಬುವರ ಮನೆಯಲ್ಲಿ ಕಳ್ಳತನ ನಡೆದಿತ್ತು. ಮನೆಯ ಅಲ್ಮೇರಾದಲ್ಲಿದ್ದ ಸುಮಾರು 7,57,955 ರೂಪಾಯಿ ಮೌಲ್ಯದ ಚಿನ್ನಾಭರಣ ದೋಚಲಾಗಿತ್ತು.

ಪ್ರಕರಣ ಭೇದಿಸಲು ಎಸ್​ಪಿ ಗುಂಜನ್​ ಆರ್ಯ ಅವರು ನವಲಗುಂದ ಸಿಪಿಐ ರವಿಕುಮಾರ ಕಪ್ಪತನವರ ಹಾಗೂ ನವಲಗುಂದ ಪಿಎಸ್​ಐ ಜನಾರ್ದನ ಬಿ. ನೇತೃತ್ವದ 2 ತಂಡಗಳನ್ನು ರಚಿಸಿದ್ದರು. ಕಾರ್ಯಾಚರಣೆ ನಡೆಸಿದ ತಂಡಗಳು, ನವಲಗುಂದ ಪಟ್ಟಣದ ಕಿರಣಕುಮಾರ ಶರಣಪ್ಪ ಕುಂಬಾರ ಎಂಬಾತನನ್ನು ಹುಬ್ಬಳ್ಳಿಯಲ್ಲಿ ವಶಕ್ಕೆ ಪಡೆದು ವಿಚಾರಣೆ ನಡೆಸಿದ್ದರು. ಆತ ಕಳ್ಳತನ ಮಾಡಿರುವ ತಪ್ಪೊಪ್ಪಿಗೆ ಹೇಳಿಕೆ ನೀಡಿದ್ದಲ್ಲದೆ, ತನ್ನೊಂದಿಗೆ ಸಲೀಂಅಹ್ಮದ್​ ಮೋದಿನಸಾಬ ಬೈಲಹುಲಿ ಕೂಡ ಭಾಗಿಯಾಗಿರುವುದನ್ನು ಖಚಿತಪಡಿಸಿದ್ದ. ಆತನನ್ನೂ ವಶಕ್ಕೆ ಪಡೆದು 7,57,955 ರೂಪಾಯಿ ಮೌಲ್ಯದ ಚಿನ್ನಾಭರಣ ಮತ್ತು ಕಳ್ಳತನಕ್ಕೆ ಬಳಸಿದ್ದ ದ್ವಿಚಕ್ರ ವಾಹನವನ್ನು ಜಪ್ತಿ ಮಾಡಿದ್ದಾರೆ.

ಪ್ರಕರಣ ಭೇದಿಸಲು ನವಲಗುಂದ ಠಾಣೆಯ ಅಧಿಕಾರಿ- ಸಿಬ್ಬಂದಿಗೆ ಹುಬ್ಬಳ್ಳಿ ಶಹರ ಠಾಣೆಯ ಅಧಿಕಾರಿಗಳು ನೆರವು ನೀಡಿದ್ದಾರೆ. ಕಾರ್ಯಾಚರಣೆಯಲ್ಲಿದ್ದ ತಂಡಗಳಿಗೆ ಎಸ್​ಪಿ ಗುಂಜನ್​ ಆರ್ಯ ವಿಶೇಷ ಬಹುಮಾನ ಘೋಷಿಸಿದ್ದಾರೆ.