ಹುಬ್ಬಳ್ಳಿ: ಗೋವಾದಲ್ಲಿ ಇತ್ತೀಚೆಗೆ ಏರ್ಪಡಿಸಿದ್ದ ಪ್ರತಿಷ್ಠಿತ ಸಹಿಷ್ಣುತಾ ಕ್ರೀಡಾಕೂಟ (ಎಂಡುರನ್ಸ್ ಸ್ಪೋರ್ಟಿಂಗ್ ಇವೆಂಟ್ಸ್) ಐರನ್ಮ್ಯಾನ್ 70.3 ಗೋವಾ ಆವೃತ್ತಿಯಲ್ಲಿ ಹುಬ್ಬಳ್ಳಿಯ ನಾಲ್ವರು ಉತ್ತಮ ಸಾಧನೆ ತೋರಿದ್ದಾರೆ.
ಐರನ್ ಮ್ಯಾನ್ 70.3 ಸ್ಪರ್ಧೆಯಲ್ಲಿ ನಗರದ ನಿಕೇತ ಹೊನ್ನಳ್ಳಿ ಅವರು ಹುಬ್ಬಳ್ಳಿಯಿಂದ ಭಾಗಿಯಾದವರ ಪೈಕಿ ಅತ್ಯುತ್ತಮ ಸಾಧನೆ ಮಾಡಿದ್ದಾರೆ.
ಐರನ್ಮ್ಯಾನ್ 70.3 ಎಂಬುದು ವಿಶ್ವದ ಅತ್ಯಂತ ಸವಾಲಿನ ದೀರ್ಘ -ದೂರದ ಟ್ರಯಾಥ್ಲಾನ್ ಪ್ರಕಾರಗಳಲ್ಲಿ ಒಂದಾಗಿದ್ದು, ಇದರಲ್ಲಿ ಒಟ್ಟು 70.3 ಮೈಲು (113 ಕಿ.ಮೀ) ದೂರ ವಿವಿಧ ಕ್ರೀಡೆಗಳಲ್ಲಿ ಕ್ಷಮತೆ ಪರೀಕ್ಷಿಸಲಾಗುತ್ತದೆ. ಇದರಲ್ಲಿ 1.9 ಕಿ.ಮೀ ಮುಕ್ತ ಜಲರಾಶಿಯಲ್ಲಿ ಈಜು, 90 ಕಿ.ಮೀ ಸೈಕ್ಲಿಂಗ್ ಮತ್ತು 21.1 ಕಿ.ಮೀ ಹಾಫ್ ಮ್ಯಾರಥಾನ್ ಓಟ ಸೇರಿವೆ. ಈ ಮೂರೂ ವಿಭಾಗಗಳನ್ನು ಎಂಟು ತಾಸು ನಿಗದಿತ ಸಮಯದೊಳಗೆ ಕ್ರೀಡಾಪಟುಗಳು ಪೂರ್ಣಗೊಳಿಸಬೇಕಾಗುತ್ತದೆ.
ನಿಕೇತ ಹೊನ್ನಳ್ಳಿ ಅವರು ಈ ಸವಾಲನ್ನು 7 ತಾಸಿನಲ್ಲಿ ಪೂರ್ಣಗೊಳಿಸಿ ಹುಬ್ಬಳ್ಳಿಯಿಂದ ಹೋದವರಲ್ಲಿ ಮೊದಲಿಗರಾಗಿದ್ದಾರೆ. ಹುಬ್ಬಳ್ಳಿಯ ಸುಬ್ರಮಣಿ ಜೆ., ಅಂಕಿತ ಯೋಗಿ ಹಾಗೂ ಹಾದಿರ್ಕ ಯೋಗಿ ಅವರು ನಂತರದ ಸ್ಥಾನ ಪಡೆದಿದ್ದಾರೆ.
2026ರ ಈ ಕೂಟದಲ್ಲಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ 62 ದೇಶಗಳ ಸುಮಾರು 1500ಕ್ಕೂ ಹೆಚ್ಚು ಜನರು ಪಾಲ್ಗೊಂಡಿದ್ದರು. ಇದು ಏಷ್ಯಾದ ಅತ್ಯಂತ ಜನಪ್ರಿಯ ಸಹಿಷ್ಣುತಾ ಕ್ರೀಡಾಕೂಟದಲ್ಲಿ ಒಂದಾಗಿದೆ.
ವರ್ಲ್ಡ್ ಟ್ರಯಥ್ಲಾನ್ ಕಾರ್ಪೋರೇಷನ್ (ಡಬ್ಲೂಟಿಸಿ), ಸ್ಥಳಿಯ ಸಂಘಟಕ ಮತ್ತು ರೇಸ್ ನಿರ್ದೇಶಕ ದೀಪಕರಾಜ್ ನೇತೃತ್ವದಲ್ಲಿ ಕಾರ್ಯಕ್ರಮ ನಡೆಯಿತು.
ಯುವಕರಲ್ಲಿ ಧೈರ್ಯ, ಪರಿಶ್ರಮ, ಶಿಸ್ತು ಮತ್ತು ಸಹಿಷ್ಣುತೆಯನ್ನು ಹೆಚ್ಚಿಸಲು ನೆರವಾಗುವ ಇಂತಹ ಕಾರ್ಯಕ್ರಮಗಳು ಇತರರಿಗೆ ಸ್ಪೂರ್ತಿದಾಯಕವಾಗಿವೆ. ಯುವಕರು ಇಂತಹ ಸ್ಪರ್ಧೆಗಳ ಬಗ್ಗೆ ಗಮನ ಹರಿಸಬೇಕು ಎಂದು ಉದ್ಯಮಿ, ನಿಕೇತ ತಂದೆ ನಿಲೇಶ ಹೊನ್ನಳ್ಳಿ ಅಭಿಪ್ರಾಯಪಡುತ್ತಾರೆ.