ದೇಸಿ ತಳಿಯ ಹಣ್ಣಿಗೆ ಭಾರಿ ಬೇಡಿಕೆ! Kekkarale fruit

ಪ್ರಕೃತಿಯ ಮಡಿಲಲ್ಲಿ ಆಯಾ ಋತುಮಾನಕ್ಕೆ ತಕ್ಕಂತೆ ಸಿಗುವ ಹಣ್ಣುಗಳ ಸೇವನೆ ಆರೋಗ್ಯಕ್ಕೆ ವರದಾನ. ಅದರಂತೆ, ಸದ್ಯ ನ್ಯಾಮತಿ ತಾಲೂಕಿನ ಕೆಂಚಿಕೊಪ್ಪ ಗ್ರಾಮದ ಎರೆಹೊಲಗಳಲ್ಲಿ ಬೆಳೆಯುವ ಕೆಕ್ಕರಲೆ ಹಣ್ಣು ಮಾರುಕಟ್ಟೆಗೆ ಲಗ್ಗೆ ಇಟ್ಟಿದ್ದು, ಗ್ರಾಹಕರು ಇದರ ರುಚಿಗೆ ಮನಸೋಲುತ್ತಿದ್ದಾರೆ.

ಹಿಂಗಾರು ಹಂಗಾಮಿನ ಜೋಳದ ಜತೆಗೆ ಮಿಶ್ರ ಬೆಳೆಯಾಗಿ ಬೆಳೆಯುವ ಈ ಹಣ್ಣು ಹತ್ತಾರು ದಶಕಗಳ ಇತಿಹಾಸ ಹೊಂದಿದೆ. ಯಾವುದೇ ರಾಸಾಯನಿಕ ಗೊಬ್ಬರ, ಔಷಧ ಅಥವಾ ಹೆಚ್ಚಿನ ನೀರಿನ ಹಂಗಿಲ್ಲದೆ ಕೇವಲ ಇಬ್ಬನಿಯ ತೇವಾಂಶದಲ್ಲಿ ಬೆಳೆಯುತ್ತದೆ. ರೈತರು ಪ್ರತಿವರ್ಷ ಮಾಗಿದ ಹಣ್ಣಿನಿಂದಲೇ ಬೀಜ ಸಂಗ್ರಹಿಸಿ ಮುಂದಿನ ವರ್ಷದ ಬಿತ್ತನೆಗೆ ಬಳಸುವ ಮೂಲಕ ತಳಿ ಸಂರಕ್ಷಣೆ ಮಾಡುತ್ತಿದ್ದಾರೆ.

ನ್ಯಾಮತಿ ಪಟ್ಟಣದ ಕಿತ್ತೂರು ರಾಣಿ ಚನ್ನಮ್ಮ ವೃತ್ತವೇ ಈ ಹಣ್ಣಿನ ಪ್ರಮುಖ ವ್ಯಾಪಾರ ಕೇಂದ್ರ. ರೈತ ಕುಟುಂಬಗಳು ಮುಂಜಾನೆಯೇ ಹೊಲದಿಂದ ಹಣ್ಣುಗಳನ್ನು ತಂದು ರಸ್ತೆ ಬದಿಯಲ್ಲಿ ಮಾರಾಟ ಮಾಡುತ್ತಿವೆ. ಗಾತ್ರಕ್ಕೆ ಅನುಗುಣವಾಗಿ ಒಂದು ಹಣ್ಣಿಗೆ 20 ರಿಂದ 100 ರೂಪಾಯಿವರೆಗೆ ದರವಿದ್ದು, ಮಧ್ಯವರ್ತಿಗಳ ಕಾಟವಿಲ್ಲದೆ ರೈತರಿಗೆ ನೇರ ಆದಾಯ ಸಿಗುತ್ತಿದೆ. ನ್ಯಾಮತಿ ಮಾತ್ರವಲ್ಲದೆ ಹೊನ್ನಾಳಿ, ದಾವಣಗೆರೆ ಹಾಗೂ ಶಿವಮೊಗ್ಗದ ಗ್ರಾಹಕರು ಈ ಹಣ್ಣನ್ನು ಹುಡುಕಿಕೊಂಡು ಬರುತ್ತಿದ್ದಾರೆ. ಬೆಂಗಳೂರಿನಲ್ಲಿರುವ ಸಂಬಂಧಿಕರಿಗೂ ಇಲ್ಲಿಂದ ಹಣ್ಣು ರವಾನೆಯಾಗುತ್ತಿದೆ. ಅಲ್ಲದೇ ಹಣ್ಣು ಮಾಗುವವರೆಗೂ ಪ್ರಾಣಿ ಹಾಗೂ ಕಳ್ಳರ ಕಾಟದಿಂದ ತಪ್ಪಿಸಲು ರೈತರು ಹೊಲದಲ್ಲೇ ವಾಸ್ತವ್ಯ ಹೂಡಿ ಕಾವಲು ಕಾಯುತ್ತಾರೆ.

ಕೆಕ್ಕರಲ ಹಣ್ಣಿನ ಸಿಪ್ಪೆ ಹಾಗೂ ಬೀಜ ತೆಗೆದು, ಅದಕ್ಕೆ ಬೆಲ್ಲದ ಪುಡಿ, ತೆಂಗಿನ ತುರಿ ಹಾಗೂ ಸ್ವಲ್ಪ ಶುಂಠಿ ಮಿಶ್ರಣ ಮಾಡಿ ಸವಿಯುವುದು ಈ ಭಾಗದ ಸಂಪ್ರದಾಯ. ಈ ಮಿಶ್ರಣವು ಹಣ್ಣಿನ ರುಚಿಯನ್ನು ದುಪ್ಪಟ್ಟು ಮಾಡುತ್ತದೆ ಎಂದು ಗ್ರಾಹಕರು ಹೇಳುತ್ತಾರೆ.