ಮುಳಬಾಗಿಲು: ಮುಳಬಾಗಿಲಿನ ಪುರಾಣ ಪ್ರಸಿದ್ಧ ಆಂಜನೇಯಸ್ವಾಮಿ ದರ್ಶನ ಪಡೆದರೆ ಎಂತಹ ಕಷ್ಟಗಳು ತಂತಾನೆ ದೂರವಾಗುತ್ತದೆ. ಇಂದು ಆಂಜನೇಯ ಸ್ವಾಮಿ ದರ್ಶನ ವೇಳೆ ವಿಶಿಷ್ಟ ಸಂಕೇತ ಲಭಿಸಿದೆ ಎಂದು ಕೋಲಾರ ಶಾಸಕ ಕೊತ್ತೂರು ಜಿ.ಮಂಜುನಾಥ್ ಹೇಳಿದರು.
ನಗರದ ಆಂಜನೇಯಸ್ವಾಮಿ ದೇವಾಲಯದಲ್ಲಿ ದೇವರ ದರ್ಶನ ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಕಳೆದ15 ವರ್ಷಗಳಿಂದ ಮುಕ್ಕೋಟಿ ದ್ವಾದಶಿ ಸೇರಿ ವಿಶೇಷ ಪೂಜಾ ದಿನಗಳಲ್ಲಿ ದೇವಾಲಯವನ್ನು ವಿಶೇಷ ಅಲಂಕಾರ ಮಾಡಿಕೊಂಡು ಬರಲಾಗುತ್ತಿದ್ದು, ಈಗ ಜೆಡಿಎಸ್ ಶಾಸಕರಾಗಿರುವ ಸಮೃದ್ಧಿ ವಿ.ಮಂಜುನಾಥ್ ಸಹ ಭಾಜನರಾಗಿದ್ದಾರೆ. ಪಕ್ಷಗಳು ಬೇರೆಯಾದರು ನಾವು ದೇವಾಲಯದ ವಿಷಯದಲ್ಲಿ ಒಂದಾಗಿ ಕಾರ್ಯನಿರ್ವಹಿಸುತ್ತೇವೆ. ಇಂದು ದೇವರು ಇನ್ನೂ ಬೇರೆ ದೇವಾಲಯದ ಅಭಿವೃದ್ಧಿ ಕೆಲಸಗಳನ್ನು ಕೈಗೊಳ್ಳಬೇಂಬ ಮುನ್ಸೂಚನೆ ನೀಡಿದ್ದು, ಸಮೃದ್ಧಿ ಮಂಜುನಾಥ್ ಸಹ ಈ ಕಾರ್ಯ ಮುಂದುವರಿಸಲಿದ್ದಾರೆ. ಆಂಜನೇಯ ಸ್ವಾಮಿ ಮಹಿಮೆ ವಿಶ್ವಕ್ಕೆ ಸಾರಲಿದೆ ಎಂದರು.
ಆಂಜನೇಯ ಸ್ವಾಮಿ ದೇವಾಲಯದಲ್ಲಿ ಗೋವು ಶಾಲೆಗೆ ಭೇಟಿ ನೀಡಿ ದೇಶೀಯ ಗೋವುಗಳ ಸಂರಕ್ಷಣೆ ಮಾಡುತ್ತಿರುವುದು ಶ್ಲಾಘನೀಯ. ದೇವಾಲಯ ಎಲ್ಲ ರೀತಿಯಲ್ಲೂ ಅಭಿವೃದ್ಧಿನಗೊಳ್ಳಬೇಕು. ಇದನ್ನು ದೇವರೇ ಮಾಡಿಸಿಕೊಳ್ಳುತ್ತಾನೆ ಎಂದರು.
ಬದಲಾವಣೆ ಇಲ್ಲ: ರಾಜಕೀಯವಾಗಿ ಸಂಕ್ರಾಂತಿ ನಂತರ ಕೆಲವರು ಕಾಂಗ್ರೆಸ್ಗೆ ಸೇರ್ಪಡೆಯಾಗುತ್ತಾರೆ ಎಂಬ ವದಂತಿ ಬಗ್ಗೆ ಕೊತ್ತೂರು ಮಂಜುನಾಥ್ ಪ್ರತಿಕ್ರಿಯಿಸಿ ಸದ್ಯಕ್ಕೆ ಅಂತ ಪರಿಸ್ಥಿತಿ ಉದ್ಭವವಾಗಿಲ್ಲ. ಅವರವರ ಪಕ್ಷಗಳಲ್ಲಿಯೇ ಇರುತ್ತಾರೆ. ಸಂಕ್ರಾಂತಿಯ ನಂತರ ತಾಲೂಕಿನ ಯಾವ ರಾಜಕೀಯ ಬದಲಾವಣೆಯೂ ಆಗುವುದಿಲ್ಲ ಎಂದು ಶಾಸಕರು ಸ್ಪಷ್ಟನೆ ನೀಡಿದರು.