ನೆಕ್ಕಿಲಾಡಿಯಲ್ಲಿ ಸಂಚಾರ ಗೊಂದಲ

ವಿಜಯವಣಿ ಸುದ್ದಿಜಾಲ ಉಪ್ಪಿನಂಗಡಿ

ಚತುಷ್ಪಥಗೊಂಡ ರಾ.ಹೆ 75ರ ನೆಕ್ಕಿಲಾಡಿಯಲ್ಲಿ ಜನರ ಸುರಕ್ಷತೆಗೆ ಪುತ್ತೂರಿನಿಂದ ಉಪ್ಪಿನಂಗಡಿಗೆ ಆಗಮಿಸುವ ವಾಹನಗಳು ನೇರವಾಗಿ ಚತುಷ್ಪಥ ರಾ.ಹೆ. ಪ್ರವೇಶಿಸುವುದನ್ನು ಬ್ಯಾರಿಕೇಡ್ ಅಳವಡಿಸಿ ತಡೆಯಲಾಗಿ, ಅನತಿ ದೂರದಲ್ಲಿರುವ ಅಂಡರ್ ಪಾಸ್ ಮೂಲಕವೇ ಸಂಚರಿಸಬೇಕಾಗಿದೆ. ಸಮರ್ಪಕ ಸೂಚನಾ ಫಲಕ ಅಳವಡಿಸದ ಕಾರಣ ಪುತ್ತೂರು-ಉಪ್ಪಿನಂಗಡಿ ನಡುವಣದ ವಾಹನ ಸವಾರರು ಎತ್ತ ಕಡೆ ಸಂಚರಿಸುವುದೆಂದು ತಿಳಿಯದೆ ಹೆದ್ದಾರಿಯಲ್ಲಿಯೇ ನಿಯಮ ಉಲ್ಲಂಘಿಸಿ ಸಂಚರಿಸುವಂಥ ಗೊಂದಲಮಯ ಸ್ಥಿತಿ ನಿರ್ಮಾಣವಾಗಿದೆ.

ಜನರ ಸುರಕ್ಷತೆಗಾಗಿ ಅಳವಡಿಸಿದ ಬ್ಯಾರಿಕೇಡ್ ಜನರನ್ನು ಅಪಘಾತಕ್ಕೆ ಸಿಲುಕಿಸುವ ಸ್ಥಿತಿಗೆ ತಂದೊಡ್ಡಿರುವ ಬಗ್ಗೆ ಸಾರ್ವಜನಿಕ ವಲಯದಿಂದ ಅಸಮಾಧಾನ ವ್ಯಕ್ತವಾಗಿದೆ.

ರಾ.ಹೆದ್ದಾರಿ ಪ್ರವೇಶ ನಿರ್ಬಂಧ

34 ನೆಕ್ಕಿಲಾಡಿಯಲ್ಲಿ ಚತುಷ್ಪಥ ರಾ.ಹೆ. ಹಾದು ಹೋಗುತ್ತಿದ್ದು, ಈ ಹೆದ್ದಾರಿಗೆ ತಾಗಿಕೊಂಡೇ ನೆಕ್ಕಿಲಾಡಿ-ಬೊಳುವಾರು ರಾಜ್ಯ ಹೆದ್ದಾರಿ ಕವಲೊಡೆದಿದೆ. ಈ ಮೊದಲು ಇಲ್ಲಿ ಪುತ್ತೂರು, ಬೊಳುವಾರು ಕಡೆಯಿಂದ ಬರುವ ವಾಹನಗಳು 34 ನೆಕ್ಕಿಲಾಡಿಯಲ್ಲಿ ನೇರವಾಗಿ ರಾ.ಹೆದ್ದಾರಿ ಪ್ರವೇಶಿಸಿ ಉಪ್ಪಿನಂಗಡಿ ಕಡೆಯಿಂದ ಬಿ.ಸಿ.ರೋಡ್ ಕಡೆಗೆ ಹೋಗುವ ರಾ.ಹೆದ್ದಾರಿ ಏಕಮುಖ ಪಥ ದಾಟಿ ಬಿ.ಸಿ.ರೋಡ್ ಕಡೆಯಿಂದ ಉಪ್ಪಿನಂಗಡಿ ಕಡೆಗೆ ಸಾಗುವ ಏಕಮುಖ ಪಥಕ್ಕೆ ಬಂದು ಉಪ್ಪಿನಂಗಡಿ ಕಡೆಗೆ ಸಾಗಬೇಕಿತ್ತು. ರಾ.ಹೆ.ಯಲ್ಲಿ ಅಪರಿಮಿತ ವೇಗದಲ್ಲಿ ವಾಹನ ಸಾಗುತ್ತಿದ್ದುದ್ದರಿಂದ ಪುತ್ತೂರು ಕಡೆಯಿಂದ ರಾಜ್ಯ ಹೆದ್ದಾರಿ ಮೂಲಕ ಬರುವ ವಾಹನಗಳು ನೇರವಾಗಿ ಹೆದ್ದಾರಿ ಪ್ರವೇಶಿಸುತ್ತಿರುವುದರಿಂದ ಬಹಳಷ್ಟು ಅಪಘಾತ ಸಂಭವಿಸಿತ್ತು. ಈಗ ಇಲ್ಲಿ ಬ್ಯಾರಿಕೇಡ್ ಅಳವಡಿಸಿದ್ದು, ಪುತ್ತೂರು ಕಡೆಯಿಂದ ಬರುವ ವಾಹನಗಳು ನೇರವಾಗಿ ರಾ.ಹೆದ್ದಾರಿ ಪ್ರವೇಶಿಸುವುದನ್ನು ನಿರ್ಬಂಧಿಸಲಾಗಿದೆ.

ಪುತ್ತೂರು ಕಡೆಯಿಂದ ಬರುವ ವಾಹನಗಳು ಉಪ್ಪಿನಂಗಡಿ ಕಡೆಗೆ ಸಾಗಬೇಕಾದರೆ 34 ನೆಕ್ಕಿಲಾಡಿಯಲ್ಲಿ ರಾಷ್ಟ್ರೀಯ ಹೆದ್ದಾರಿಗೆ ತಾಗಿಕೊಂಡಿರುವ ಸರ್ವೀಸ್ ರಸ್ತೆಯಲ್ಲಿ ಎಡಕ್ಕೆ ತಿರುಗಿ ಸುಮಾರು 200 ಮೀ. ನಷ್ಟು ಚಲಿಸಿ ಅಲ್ಲಿಂದ ಬಲಕ್ಕೆ ತಿರುವು ಪಡೆದು ಅಂಡರ್‌ಪಾಸ್ ಮೂಲಕ ಮತ್ತೊಂದು ಬದಿಗಿರುವ ಸರ್ವೀಸ್ ರಸ್ತೆಯಲ್ಲಿ ಬಲಕ್ಕೆ ತಿರುವು ಪಡೆದು ಸ್ವಲ್ಪ ದೂರ ಚಲಿಸಿ ಮತ್ತೆ ಬಿ.ಸಿ.ರೋಡ್ ಕಡೆಯಿಂದ ಉಪ್ಪಿನಂಗಡಿ ಕಡೆಗೆ ಸಾಗುವ ರಾಷ್ಟ್ರೀಯ ಹೆದ್ದಾರಿಯ ಪಥಕ್ಕೆ ಹೋಗಬೇಕಿದೆ.

ಈ ಬಗ್ಗೆ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಇಂಜಿನಿಯರ್ ನವೀನ್ ಅವರ ಗಮನಕ್ಕೆ ತರಲಾಗಿದ್ದು, ಈ ಬಗ್ಗೆ ಪರಿಶೀಲಿಸಿ ಕ್ರಮ ಕೈಗೊಳ್ಳುತ್ತೇವೆ ಎಂಬ ಭರವಸೆ ನೀಡಿದ್ದಾರೆ

ಸವಾರರಲ್ಲಿ ಗೊಂದಲ

ಸಾರ್ವಜನಿಕರ ಹಿತರಕ್ಷಣೆಗಾಗಿ ಅಳವಡಿಸಿರುವ ನಿಯಮ ಸರಿಯಿದ್ದರೂ ಇಲ್ಲಿ ಈ ಬದಲಿ ಮಾರ್ಗದ ಬಗ್ಗೆ ಗಮನ ಸೆಳೆಯುವಂಥ ಯಾವುದೇ ಸೂಚನಾ ಫಲಕ ಅಳವಡಿಸದೇ ಇದ್ದ ಕಾರಣ ವಾಹನ ಸವಾರರು ಇಲ್ಲಿ ಗೊಂದಲಕ್ಕೀಡಾಗುತ್ತಿದ್ದಾರೆ. ಇದರಿಂದ ಪುತ್ತೂರು ಕಡೆಯಿಂದ ಬರುವ ಕೆಲವು ವಾಹನ ಸವಾರರು ಈ ಮಾರ್ಗದ ಅರಿವಿಲ್ಲದೆ ನೇರವಾಗಿ ಉಪ್ಪಿನಂಗಡಿ ಕಡೆಯಿಂದ ಮಂಗಳೂರು ಕಡೆಗೆ ಹೋಗುವ ಏಕಮುಖ ರಾಷ್ಟ್ರೀಯ ಹೆದ್ದಾರಿಯಲ್ಲಿ ವಿರುದ್ಧ ದಿಕ್ಕಿನಲ್ಲಿ ಸಂಚರಿಸಿ ಗೊಂದಲಕ್ಕೀಡಾಗುತ್ತಿದ್ದಾರೆ.