ಕರ್ನಾಟಕ ಬ್ಯಾಂಕ್: ಕ್ಯಾಪಿಟಲ್ ಗೇನ್ಸ್ ಅಕೌಂಟ್ ಸ್ಕೀಮ್ ಪ್ರಾರಂಭ

ಮಂಗಳೂರು: ಕರ್ನಾಟಕ ಬ್ಯಾಂಕ್ ಗ್ರಾಹಕರ ಅನುಕೂಲಕ್ಕಾಗಿ ಮತ್ತು ಸರಿಯಾದ ತೆರಿಗೆ ಯೋಜನೆಯನ್ನು ರೂಪಿಸಲು "ಕ್ಯಾಪಿಟಲ್ ಗೇನ್ಸ್ ಅಕೌಂಟ್ ಸ್ಕೀಮ್' (ಸಿಜಿಎಎಸ್) ಅನ್ನು ಪ್ರಾರಂಭಿಸಿದೆ. ಲಭ್ಯವಿರುವ ಬಂಡವಾಳ ಲಾಭವನ್ನು ತೆರಿಗೆ ಕಾಯ್ದೆಯನ್ವಯ ನಿಯಮಾನುಸಾರ ಹೂಡಿಕೆ ಮಾಡುವವರೆಗೆ ಬ್ಯಾಂಕ್‌ನಲ್ಲಿ ಸುರಕ್ಷಿತವಾಗಿ ಠೇವಣಿ ಇಡಲು ಈ ಯೋಜನೆ ಸಹಾಯ ಮಾಡುತ್ತದೆ.

ಬಂಡವಾಳ ಆಸ್ತಿಗಳ ಮಾರಾಟದಿಂದ ಲಾಭ ಗಳಿಸಿ ನಿಗದಿತ ಅವಧಿಯೊಳಗೆ ಮರುಹೂಡಿಕೆ ಮಾಡಲು ಸಾಧ್ಯವಾಗದ ತೆರಿಗೆದಾರರಿಗಾಗಿ ಈ ಯೋಜನೆ ರೂಪಗೊಂಡಿದೆ. ನಿಯಮಿತ ಸಮಯದೊಳಗೆ ಸಿಜಿಎಎಸ್ ಖಾತೆಗೆ ಹಣವನ್ನು ಜಮೆ ಮಾಡುವುದರಿಂದ, ಆದಾಯ ತೆರಿಗೆ ಕಾಯ್ದೆಯಡಿ ಸಿಗುವ ತೆರಿಗೆ ವಿನಾಯಿತಿ ಮತ್ತು ಪ್ರಯೋಜನಗಳನ್ನು ಗ್ರಾಹಕರು ಪಡೆದುಕೊಳ್ಳಬಹುದು. ಈ ಯೋಜನೆಯನ್ನು ಒದಗಿಸಲು ಅನುಮತಿ ಪಡೆದ ಅಧಿಕೃತ ಬ್ಯಾಂಕ್‌ಗಳಲ್ಲಿ ಕರ್ನಾಟಕ ಬ್ಯಾಂಕ್ ಕೂಡ ಒಂದಾಗಿದೆ. ಸರ್ಕಾರವು ಹೆಚ್ಚಿನ ಬ್ಯಾಂಕ್‌ಗಳಿಗೆ ಈ ಸೇವೆ ನೀಡಲು ಅನುಮತಿ ನೀಡಿರುವುದರಿಂದ, ತೆರಿಗೆದಾರರು ಅಧಿಕೃತ ಬ್ಯಾಂಕಿಂಗ್ ಮಾರ್ಗಗಳ ಮೂಲಕ ತಮ್ಮ ಬಂಡವಾಳ ಲಾಭವನ್ನು ಸುಲಭವಾಗಿ ಮತ್ತು ದಕ್ಷತೆಯಿಂದ ನಿರ್ವಹಿಸಲು ಅನುಕೂಲವಾಗಿದೆ.

ಈ ಯೋಜನೆಯಡಿಯಲ್ಲಿ ಗ್ರಾಹಕರು ಎರಡು ರೀತಿಯ ಖಾತೆಗಳನ್ನು ತೆರೆಯಬಹುದು. ಕ್ಯಾಪಿಟಲ್ ಗೇನ್ಸ್ ಅಕೌಂಟ್- ಎ (ಉಳಿತಾಯ ಠೇವಣಿ ಖಾತೆ). ಇದರಲ್ಲಿ ಸುಲಭವಾಗಿ ಹಣ ಜಮೆ ಮಾಡಲು ಮತ್ತು ಹಿಂಪಡೆಯಲು ಅವಕಾಶವಿದೆ. ಕ್ಯಾಪಿಟಲ್ ಗೇನ್ಸ್ ಅಕೌಂಟ್- ಬಿ (ನಿಗದಿತ ಠೇವಣಿ ಖಾತೆ). ಇದರಲ್ಲಿ ದೀರ್ಘಾವಧಿಯವರೆಗೆ ಹಣವನ್ನು ಠೇವಣಿ ಇಡಲು ಸಾಧ್ಯವಾಗುತ್ತದೆ. ಆದಾಯ ತೆರಿಗೆ ಕಾಯ್ದೆಯಡಿ ವಸತಿ ಮನೆ ಖರೀದಿ ಅಥವಾ ನಿರ್ಮಾಣದಂತಹ ಹೂಡಿಕೆಗಳನ್ನು ಮಾಡಲು ಯೋಜಿಸುತ್ತಿರುವ ಗ್ರಾಹಕರಿಗೆ ಈ ಸ್ಕೀಮ್ ಅತ್ಯುತ್ತಮವಾಗಿದೆ.

ಈ ಯೋಜನೆಯ ಲಾಭ ಪಡೆಯಲು ಇಚ್ಛಿಸುವ ಗ್ರಾಹಕರು ಖಾತೆ ತೆರೆಯುವ ವಿಧಾನ, ಅಗತ್ಯ ದಾಖಲೆಗಳು ಮತ್ತು ನಮೂದಿತ ನಿಯಮಗಳ ವಿವರಗಳಿಗಾಗಿ ತಮ್ಮ ಸಮೀಪದ ಕರ್ನಾಟಕ ಬ್ಯಾಂಕ್ ಶಾಖೆಗೆ ಭೇಟಿ ನೀಡಬಹುದು ಎಂದು ಬ್ಯಾಂಕಿನ ಪ್ರಕಟಣೆ ತಿಳಿಸಿದೆ.

"