ಕುಂಟುತ್ತ ಸಾಗಿದ ಮಾರುಕಟ್ಟೆ : ಸುರತ್ಕಲ್‌ನಲ್ಲಿ ಕಟ್ಟಡ ನಿರ್ಮಾಣ ವಿಳಂಬ ಕಾಮಗಾರಿ ಅವಧಿ ವಿಸ್ತರಣೆ ಸಾಧ್ಯತೆ

ಮೊದಿನ್ ಬಾವಾ ಶಾಸಕರಾಗಿದ್ದ 2017ರ ಹೊತ್ತಿಗೆ ಸುರತ್ಕಲ್ ಜಂಕ್ಷನ್‌ನಲ್ಲಿ ಹೊಸ ಮಾರುಕಟ್ಟೆ ನಿರ್ಮಿಸುವ ಪ್ರಸ್ತಾವಕ್ಕೆ ಸರ್ಕಾರದಿಂದ ಹಸಿರು ನಿಶಾನೆ ಸಿಕ್ಕಿತ್ತು. ಒಟ್ಟು 61 ಕೋಟಿ ರೂ. ವೆಚ್ಚದ ಯೋಜನೆ ಇದ್ದಾಗಿದ್ದು, 2018ರಲ್ಲಿ ಕಾಮಗಾರಿ ನಡೆಸಲು ಸರ್ಕಾರಿ ಆದೇಶ ಹೊರಬಿದ್ದಿತ್ತು. ಬೆಂಗಳೂರಿನ ಬಾಲಾಜಿ ಕೃಪಾ ಪ್ರಾಜೆಕ್ಟ್ ಸಂಸ್ಥೆ 2018ರಲ್ಲೇ ಕಾಮಗಾರಿ ಆರಂಭಿಸಿತ್ತು. 2019ರ ಹೊತ್ತಿಗೆ ಜಗತ್ತಿಗೆ ಕರೊನಾ ಮಹಾಮಾರಿ ಬಾಧಿಸಿದ ಸಂದರ್ಭದಲ್ಲಿ ಮಾರುಕಟ್ಟೆ ಕಾಮಗಾರಿ ಸಂಪೂರ್ಣ ಸ್ಥಗಿತಗೊಂಡಿತ್ತು. ಕರೊನಾದ ಬಳಿಕ ಕೇಂದ್ರ ಸರ್ಕಾರ ಹೊಸದಾಗಿ ಪರಿಚಯಿಸಿದ ಜಿಎಸ್‌ಟಿ ನೀತಿ ಸುರತ್ಕಲ್ ಮಾರುಕಟ್ಟೆ ನಿರ್ಮಾಣ ಕಾರ್ಯ ಅರ್ಧದಲ್ಲೇ ಸ್ಥಗಿತಗೊಳ್ಳುವಂತೆ ಮಾಡಿತ್ತು.

ಒಟ್ಟು 33 ಸಾವಿರ ಚದರ ಮೀಟರ್ ವಿಸ್ತೀರ್ಣದಲ್ಲಿ ಮಾರುಕಟ್ಟೆ ಕಟ್ಟಡ ನಿರ್ಮಾಣವಾಗುತ್ತಿದೆ. ಪರಿಷ್ಕೃತ ಟೆಂಡರ್‌ನನ್ವಯ ಮುಂದಿನ ಒಂದೂವರೆ ವರ್ಷದೊಳಗೆ(2026ರ ಆರಂಭದಲ್ಲಿ ಜೂನ್‌ನೊಳಗೆ) ಮರು ಕಾಮಗಾರಿ ಪೂರ್ಣಗೊಳ್ಳಬೇಕಿದೆ. ಪರಿಷ್ಕೃತ ದರ ಪಟ್ಟಿಯಲ್ಲಿ ಇದು ಒಟ್ಟು 81 ಕೋ. ರೂ. ವೆಚ್ಚದ ಪ್ರಾಜೆಕ್ಟ್ ಆಗಿದೆ. ಮೊದಲ ಹಂತದಲ್ಲಿ 16 ಕೋ.ರೂ. ಕಾಮಗಾರಿ ಮುಗಿದಿದ್ದರೆ, ಎರಡನೇ ಹಂತದಲ್ಲಿ 65 ಕೋ.ರೂ. ಕಾಮಗಾರಿ ನಡೆಯಬೇಕಿದೆ. ಆದರೆ ಟೆಂಡರ್ ಅವಧಿ ಮೀರಿ ಕಾಮಗಾರಿಯ ಅವಧಿ ವಿಸ್ತರಣೆಗೊಳ್ಳುವ ಸಾಧ್ಯತೆ ತಳ್ಳಿಹಾಕುವಂತಿಲ್ಲ.