ರಾಯಚೂರು: ಕರೊನಾ ಸೋಂಕು ಭೀತಿ ಹಿನ್ನೆಲೆಯಲ್ಲಿ ರಾಜ್ಯದ ಜನತೆಗೆ ಕೇರಳ ಸರ್ಕಾರದ ಮಾದರಿಯಲ್ಲಿ ವಿಶೇಷ ಪ್ಯಾಕೇಜ್ ಘೋಷಣೆ ಮಾಡುವಂತೆ ಒತ್ತಾಯಿಸಿ ಸಿಪಿಐಎಂ ಪಕ್ಷದ ಜಿಲ್ಲಾ ಸಮಿತಿ ಪದಾಧಿಕಾರಿಗಳು ನಗರದ ಡಿಸಿ ಕಚೇರಿ ಸ್ಥಾನಿಕ ಅಧಿಕಾರಿ ಆಸೀಫ್ ಮೂಲಕ ಮುಖ್ಯಮಂತ್ರಿಗೆ ಮನವಿ ಸಲ್ಲಿಸಿದರು.
ಈಗಾಗಲೇ ಕೇರಳ ಸರ್ಕಾರ 20 ಸಾವಿರ ಕೋಟಿ ರೂ. ಪ್ಯಾಕೇಜನ್ನು ಘೋಷಣೆ ಮಾಡಿದ್ದು. ಅದೇ ಮಾದರಿಯಲ್ಲಿ ರಾಜ್ಯ ಸರ್ಕಾರ ಕರೊನಾ ಸಮಸ್ಯೆ ಎದುರಿಸಲು ಸಿದ್ಧತೆ ಮಾಡಿಕೊಳ್ಳಲು ಕೋರಿದರು. ರಾಜ್ಯದಲ್ಲಿ ದಿನೇ ದಿನೆ ಸೋಂಕಿನ ಪ್ರಮಾಣ ಹೆಚ್ಚುತ್ತಿದ್ದು, ಕೈಗೊಳ್ಳುತ್ತಿರುವ ಜಾಗೃತಿ ಸಾಲುತ್ತಿಲ್ಲ. ಹಾಗಾಗಿ, ಕೆಮ್ಮು, ಜ್ವರ, ನೆಗಡಿ ಲಕ್ಷಣಗಳಿರುವವರ ತಪಾಸಣೆಗೆ ಹೆಚ್ಚಿನ ಕೇಂದ್ರಗಳನ್ನು ಆರಂಭಿಸಿ, ಅಗತ್ಯ ಔಷಧ ಒದಗಿಸಬೇಕು, ಉಚಿತ ತಪಾಸಣೆಗೆ ಅವಕಾಶ, ಆರೈಕೆ, ವೆಂಟಿಲೇಟರ್ ಅಳವಡಿಕೆಗೆ ಹೆಚ್ಚಿನ ಧನ ಸಹಾಯ ನೀಡಬೇಕು, ಜನಧನ್ ಖಾತೆ ಮತ್ತು ಬಿಪಿಎಲ್ ಫಲಾನುಭವಿಗಳಿಗೆ ಕೂಡಲೇ 5 ಸಾವಿರ ರೂ. ನಗದು ವರ್ಗಾವಣೆ, ಸಾಮಾಜಿಕ ಭದ್ರತಾ ಮಾಸಿಕ ಪಡೆಯುವವರಿಗೆ ಮೂರು ತಿಂಗಳ ಮುಂಗಡ ಹಣ ಸಂದಾಯ ಮಾಡಬೇಕು, ಎಲ್ಲ ಪಡಿತರ, ಕಾರ್ಮಿಕ ಕುಟುಂಬಗಳಿಗೆ 2 ತಿಂಗಳ ಪಡಿತರ ವಿತರಿಸಬೇಕು, ಮಾಸ್ಕ್, ಸ್ಯಾನಿಟೈಸರ್ ಸೇರಿ 18 ಅಗತ್ಯ ವಸ್ತುಗಳನ್ನು ಅದರೊಟ್ಟಿಗೆ ವಿತರಿಸಲು ಕ್ರಮ ವಹಿಸಬೇಕು ಎಂದು ಆಗ್ರಹಿಸಿದರು. ಪಕ್ಷದ ಜಿಲ್ಲಾ ಕಾರ್ಯದರ್ಶಿ ಕೆ.ಜಿ.ವೀರೇಶ, ಸದಸ್ಯರಾದ ಡಿ.ಎಸ್.ಶರಣಬಸವ ನಾಗೇಂದ್ರ, ಎಚ್.ಪದ್ಮಾ ಇತರರಿದ್ದರು.