ಕಾಂಗ್ರೆಸ್​ ಪಿಂಚ್ ​ಕಮಲ ಪಡೆಯ ಪಂಚ್

ಕರೊನಾ ನಿರ್ವಹಣೆ ವಿಚಾರದಲ್ಲಿ ಆಡಳಿತ-ಪ್ರತಿಪಕ್ಷಗಳ ಕಿತ್ತಾಟ ತಾರಕಕ್ಕೇರಿದ್ದು, ಗುರುವಾರ ಮತ್ತೊಂದು ಸುತ್ತಿನ ಪರಸ್ಪರ ವಾಗ್ದಾಳಿ ನಡೆದಿದೆ. ಪ್ರತಿಪಕ್ಷ ನಾಯಕ ಸಿದ್ದರಾಮಯ್ಯ, ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್ ಜಂಟಿ ಸುದ್ದಿಗೋಷ್ಠಿ ಕರೆದು ಕರೊನಾ ನಿರ್ವಹಣೆ ವಿಚಾರದಲ್ಲಿ ಸುಮಾರು 2 ಸಾವಿರ ಕೋಟಿ ರೂ. ಹಗರಣವಾಗಿದೆ ಎಂದು ಆರೋಪಿಸಿ ಚಿವುಟಿದ್ದಾರೆ. ಅದಕ್ಕೆ ಪ್ರತಿಯಾಗಿ ತಕ್ಷಣ ಸುದ್ದಿಗೋಷ್ಠಿ ಕರೆದ ಡಿಸಿಎಂ ಅಶ್ವತ್ಥನಾರಾಯಣ ಹಾಗೂ ಆರು ಸಚಿವರು ಸಮಜಾಯಿಷಿಯ ಪಂಚ್ ನೀಡಿದ್ದಾರೆ.

ಬೆಂಗಳೂರು: ಕರೊನಾ ಹೆಸರಿನಲ್ಲಿ ರಾಜ್ಯ ಸರ್ಕಾರ 4 ತಿಂಗಳಲ್ಲಿ 4,167 ಕೋಟಿ ರೂ. ಖರ್ಚು ಮಾಡಿದೆ. ಅದರಲ್ಲಿ 2 ಸಾವಿರ ಕೋಟಿ ರೂ. ಸಚಿವರು ಹಾಗೂ ಅಧಿಕಾರಿಗಳ ಜೇಬಿಗೆ ಹೋಗಿದ್ದು, ಕೂಡಲೇ ಸರ್ಕಾರ ಹೈಕೋರ್ಟ್ ಹಾಲಿ ನ್ಯಾಯಾಧೀಶರಿಂದ ತನಿಖೆ ನಡೆಸಬೇಕು ಹಾಗೂ ಅಧಿವೇಶನ ಕರೆಯಬೇಕೆಂದು ವಿಧಾನಸಭೆ ವಿರೋಧ ಪಕ್ಷದ ನಾಯಕ ಸಿದ್ದರಾಮಯ್ಯ ಆಗ್ರಹಿಸಿದ್ದಾರೆ. ಪಕ್ಷದ ಕಚೇರಿಯಲ್ಲಿ ಕೆಪಿಸಿಸಿ ಅಧ್ಯಕ್ಷ ಡಿ.ಕೆ. ಶಿವಕುಮಾರ್ ಜತೆ ಜಂಟಿ ಸುದ್ದಿಗೋಷ್ಠಿ ನಡೆಸಿದ ಅವರು, ಕರೊನಾ ನಿರ್ವಹಣೆ ಹೆಸರಿನಲ್ಲಿ ರಾಜ್ಯ ಸರ್ಕಾರ ಭ್ರಷ್ಟಾಚಾರ ನಡೆಸಿದೆ. ಸರ್ಕಾರ ಪ್ರತಿ ಪೈಸೆ ಖರ್ಚಿಗೂ ಜನರಿಗೆ ಲೆಕ್ಕ ಕೊಡಬೇಕು ಎಂದರು.

ಡಿಸಿಎಂ, ಆರೋಗ್ಯ ಸಚಿವರು 3 ದಿನಗಳ ಹಿಂದೆ ಸುದ್ದಿಗೋಷ್ಠಿ ನಡೆಸಿ, ಕರೊನಾ ಉಪಕರಣಗಳ ಖರೀದಿಗೆ 324 ಕೋಟಿ ರೂ. ಮಾತ್ರ ಖರ್ಚು ಮಾಡಲಾಗಿದೆ ಎಂದಿದ್ದಾರೆ. ದುಬಾರಿ ದರಗಳಿಗೆ ಒಪ್ಪಂದ ಮಾಡಿಕೊಂಡಿದ್ದಾರೆ. ಕೆಲ ಸಾಮಗ್ರಿಗಳು ಬರಬೇಕಿದ್ದರೂ ಒಪ್ಪಂದದಿಂದಾಗಿ ಹಣ ಪಾವತಿಸ ಬೇಕಾಗುತ್ತದೆ. ಸಚಿವರು ಆರೋಗ್ಯ ಇಲಾಖೆಯಲ್ಲಿ ಪಾವತಿಸಿದ ಹಣದ ಬಗ್ಗೆ ಮಾತ್ರ ಹೇಳಿದ್ದು, ಪಾವತಿಸಬೇಕಾದ್ದರ ಬಗ್ಗೆ ಬಾಯ್ಬಿಟ್ಟಿಲ್ಲ ಎಂದರು.

ಮುಚ್ಚಿಟ್ಟಿದ್ದು ಏಕೆ?: ಆರೋಗ್ಯ ಇಲಾಖೆ ಅಪರ ಮುಖ್ಯ ಕಾರ್ಯದರ್ಶಿಯ ಅರೆಬರೆ ಉತ್ತರ ಬಿಟ್ಟರೆ ಈ ವರೆಗೆ ಬೇರೆ ಇಲಾಖೆಗಳಿಗೆ ಬರೆದ ಪತ್ರಗಳಿಗೆ ಉತ್ತರ ಬಂದಿಲ್ಲ. ಸರ್ಕಾರ ಪ್ರಾಮಾಣಿಕವಾಗಿದ್ದರೆ, ಮುಚ್ಚಿಡುವ ಯತ್ನವೇಕೆೆ? ನಾನು ಮಾಹಿತಿ ಸಂಗ್ರಹಿಸಿದರೆ ಸುಳ್ಳು ಎನ್ನುತ್ತೀರಿ. ಹಾಗಾದರೆ ನೀವೇ ಸತ್ಯ ಬಹಿರಂಗ ಮಾಡಿ ಎಂದು ಆಡಳಿತ ಪಕ್ಷಕ್ಕೆ ಸಿದ್ದರಾಮಯ್ಯ ಸವಾಲು ಎಸೆದಿದ್ದಾರೆ.

ಹೇಳುವುದೊಂದು...

ಬಿ.ಎಲ್. ಸಂತೋಷ್ ಸ್ವದೇಶಿ, ಸ್ವಾವಲಂಬನೆ ಎಂದು ಭಾಷಣ ಮಾಡುತ್ತಾರೆ. ಅವರದೇ ಸರ್ಕಾರ ಚೀನಾದಿಂದ 3 ಲಕ್ಷ ಪಿಪಿಇ ಕಿಟ್ ಖರೀದಿಸಿದೆ. ದೇಶದ ಸೈನಿಕರು ಸತ್ತರೂ ಇವರು ಅವರಿಂದ ಕಿಟ್ ಖರೀದಿಸುತ್ತಾರೆ. ಇವರು ಹೇಳುವುದೊಂದು, ಮಾಡುವುದೊಂದು ಎಂದು ಸಿದ್ದರಾಮಯ್ಯ ಲೇವಡಿ ಮಾಡಿದರು.

ಸಿದ್ದರಾಮಯ್ಯ-ಡಿಕೆಶಿ ಪ್ರಶ್ನೆಗಳು

•  85 ಲಕ್ಷ ಜನರಿಗೆ ಲಾಕ್​ಡೌನ್ ಸಂದರ್ಭ ಆಹಾರದ ಪ್ಯಾಕೆಟ್​ನೀಡಿದ್ದು, 5 ಲಕ್ಷ ಕಾರ್ವಿುಕರನ್ನು ರೈಲು-ಬಸ್ಸುಗಳಲ್ಲಿ ಆಹಾರದ ಪೊಟ್ಟಣ ನೀಡಿ ಊರಿಗೆ ಕಳಿಸಲಾಗಿದೆ, 2.8 ಲಕ್ಷ ಆಹಾರದ ಕಿಟ್ ಶಾಸಕರೆಲ್ಲರಿಗೆ ನೀಡಲಾಗಿದೆ ಎಂಬ ಮಾಹಿತಿ ಇದೆ. ಆದರೆ, ಇವುಗಳ ಖರ್ಚೆಷ್ಟು ಎಂಬ ಮಾಹಿತಿ ನೀಡಿಲ್ಲ.
• 50 ಸಾವಿರ ವೆಂಟಿಲೇಟರ್ ಪಿಎಂ ಕೇರ್ಸ್​ನಿಂದ ತಲಾ 4 ಲಕ್ಷ ರೂ.ನಂತೆ ಒಟ್ಟು 2 ಸಾವಿರ ಕೋಟಿ ರೂ.ಗಳಲ್ಲಿ ಖರೀದಿಸಿ ಕೇಂದ್ರ ನೀಡುತ್ತಿದೆ. ತಮಿಳುನಾಡು ಸರ್ಕಾರ ತಲಾ 4.78 ಲಕ್ಷ ರೂ.ಗೆ 100 ವೆಂಟಿಲೇಟರ್ ಖರೀದಿಸಿದೆ. ರಾಜ್ಯ ಕನಿಷ್ಠ 5.6ರಿಂದ 18.2 ಲಕ್ಷ ರೂ. ವರೆಗೆ ಕೊಟ್ಟು ಖರೀದಿಸಿದೆ.
• 330 ರೂ. ಬೆಲೆಯ ಪಿಪಿಇ ಕಿಟ್​ಗೆ 2,117.53 ರೂ. ನೀಡಿ ಮಹಾರಾಷ್ಟ್ರದ ಪ್ಲಾಸ್ಟ್ ಸರ್ಜಿ ಕಂಪನಿಯಿಂದ ಖರೀದಿಸಲಾಗಿದೆ. ್ಝಳ್ಳಾರಿ ವಿಮ್ಸ್ ಮೆಡಿಕಲ್ ಕಾಲೇಜು- ಆಸ್ಪತ್ರೆಯಲ್ಲಿ ಪಿಪಿಇ ಕಿಟ್ ಒಂದಕ್ಕೆ 1200 ರೂ. ವರೆಗೆ ನೀಡಲಾಗಿದೆ.
• ಮಾಸ್ಕ್​ಗೆ 50-60 ರೂ. ಇದ್ದರೂ ಸುಮಾರು ಹತ್ತು ಲಕ್ಷ ಮಾಸ್ಕ್ 126 ರಿಂದ 150 ರೂ. ವರೆಗೆ ನೀಡಿ ಖರೀದಿಸಲಾಗಿದೆ.
• ಉತ್ತಮ ಗುಣಮಟ್ಟದ ಥರ್ಮಲ್ ಸ್ಕಾ್ಯನರ್ ಒಂದಕ್ಕೆ 2-3 ಸಾವಿರ ರೂ. ಇದ್ದರೂ ಆರೋಗ್ಯ ಇಲಾಖೆ 5945 ರೂ.ಗೆ ಖರೀದಿಸಿದೆ. ಇದನ್ನೇ ಸಮಾಜ ಕಲ್ಯಾಣ ಇಲಾಖೆ 9 ಸಾವಿರ ರೂ. ನೀಡಿ ಖರೀದಿಸಿದೆ.
• 500 ಎಂಎಲ್ ಸ್ಯಾನಿಟೈಸರ್​ಗೆ 80-100 ರೂ. ಇದ್ದರೂ 250 ರೂ. ನೀಡಲಾಗಿದೆ. ಸಮಾಜ ಕಲ್ಯಾಣ ಇಲಾಖೆ ಇದಕ್ಕೇ 600 ರೂ. ನೀಡಿದೆ.
• ಹೆಚ್​ಎಫ್​ಎನ್​ಸಿ ಥೆರಪಿ 300 ಡಿವೈಸ್​ಗಳನ್ನು ಕೇರಳದಲ್ಲಿ 2,86,961.18 ರೂ.ಗೆ ಖರೀದಿಸಿದ್ದರೆ ಕರ್ನಾಟಕದಲ್ಲಿ 4,36,800 ರೂ.ಗೆ ಖರೀದಿಸಲಾಗಿದೆ. ್ಝ ಎಸ್.ಎಂ. ಫಾರ್ವಸ್ಯೂಟಿಕಲ್ ಪ್ರೖೆವೇಟ್ ಲಿ. ಕಲಬುರಗಿ ಮತ್ತು ರಾಮನಗರ ಜಿಲ್ಲೆಗಳಿಗೆ ಸರಬರಾಜು ಮಾಡಿದ ಸ್ಯಾನಿಟೈಸರ್ ಕಳಪೆ ಎಂಬುದು ಸರ್ಕಾರದ ಇಲಾಖೆ ಪರೀಕ್ಷಾ ವರದಿಯಲ್ಲಿದೆ.

ಸರ್ಕಾರದ ಖರ್ಚುಗಳ ವಿವರ...

ಸಲಕರಣೆಗಳ ಖರೀದಿ: 506 ಕೋಟಿ ರೂ. ತುರ್ತು ಅಗತ್ಯ, ಬಾಧಿತರಿಗೆ ಪರಿಹಾರ: 1,611.11 ಕೋಟಿ ರೂ. ಕರೊನಾ ನಿರ್ವಹಣೆಗೆ ಮಾರ್ಚ್​ನಿಂದ ಈವರೆಗೆ ಒಟ್ಟು ವೆಚ್ಚ: 2,118.27 ಕೋಟಿ ರೂ. (ಜಿಲ್ಲಾ ಆಡಳಿತ, ಆರೋಗ್ಯ, ವೈದ್ಯಕೀಯ ಶಿಕ್ಷಣ, ಪೊಲೀಸ್, ಕಾರಾಗೃಹ, ಬಿಬಿಎಂಪಿ ಖರ್ಚು-ವೆಚ್ಚಗಳು ಒಟ್ಟು ವ್ಯಯವಾದ ಮೊತ್ತ)

ಇಲಾಖೆವಾರು ವಿಂಗಡಣೆ:

• ಕಂದಾಯ ಇಲಾಖೆ ಖರ್ಚು- 159 ಕೋಟಿ ರೂ.: ಜಿಲ್ಲಾಧಿಕಾರಿಗಳಿಗೆ ಈವರೆಗೆ ಬಿಡುಗಡೆ ಮಾಡಿದ ಮೊತ್ತ 232 ಕೋಟಿ ರೂ., ಇದರಲ್ಲಿ ಕ್ವಾರಂಟೈನ್​ಗೆ 35, ಅಗತ್ಯ ವಸ್ತುಗಳಿಗೆ 68, ವಲಸಿಗರಿಗೆ ವಸತಿ, ಊಟೋಪಚಾರಕ್ಕೆ 56 ಕೋಟಿ ರೂ. ಸೇರಿ 159 ಕೋಟಿ ರೂ. ಖರ್ಚಾಗಿದೆ.
• ಆರೋಗ್ಯ ಇಲಾಖೆ- 290 ಕೋಟಿ ರೂ.: 28 ಹೆಚ್ಚು ವಿಶೇಷತೆ ಸಹಿತ 108 ವೆಂಟಿಲೇಟರ್, 5.5 ಲಕ್ಷ ವಿವಿಧ ಸ್ತರದ ಪಿಪಿಇ ಕಿಟ್, 25,000 ಲೀಟರ್ ಸ್ಯಾನಿಟೈಸರ್, 11.6 ಲಕ್ಷ ಮಾಸ್ಕ್, 30,000 ಸರ್ಜಿಕಲ್ ಗ್ಲೌಸ್ ಖರೀದಿ ಖರ್ಚು ಒಳಗೊಂಡಿದೆ.
• ವೈದ್ಯಕೀಯ ಶಿಕ್ಷಣ ಇಲಾಖೆ- 33 ಕೋಟಿ ರೂ.: ತಲಾ 13.6 ಲಕ್ಷ ರೂ. ವೆಚ್ಚದ 140 ಐಸಿಯು ವೆಂಟಿಲೇಟರ್ ಸೇರಿ 10 ವಿವಿಧ ಪರಿಕರಗಳ ಖರೀದಿ.
• ಸಮಾಜ ಕಲ್ಯಾಣ ಇಲಾಖೆ- 10 ಕೋಟಿ ರೂ.: ಚಮ್ಮಾರರಿಗೆ ತಲಾ 5,000 ರೂ. ಪರಿಹಾರ ಹಾಗೂ ವಸತಿ ನಿಲಯಗಳಲ್ಲಿ ವಾಸವಿದ್ದ ನಿರಾಶ್ರಿತರಿಗೆ ದಿನಬಳಕೆ ವಸ್ತುಗಳ ಪೂರೈಕೆ.
• ಕಾರ್ವಿುಕ ಇಲಾಖೆ- 892 ಕೋಟಿ ರೂ.: 16,32,328 ಕಾರ್ವಿುಕರಿಗೆ ತಲಾ 5,000 ರೂ.ನಂತೆ ಬ್ಯಾಂಕ್ ಖಾತೆಗೆ ನಗದು ನೇರ ವರ್ಗಾವಣೆಗೆ 816.16 ಕೋಟಿ ರೂ., ಸಿದ್ಧ ಆಹಾರಕ್ಕೆ 25.27 ಕೋಟಿ, ಒಣಹಣ್ಣುಗಳಿಗೆ 46.88 ಕೋಟಿ, ಶಿಕ್ಷಣ, ಮಾಹಿತಿ ಹಾಗೂ ಸಂವಹನಕ್ಕೆ 4.2 ಕೋಟಿ ರೂ. ವೆಚ್ಚವಾಗಿದೆ. ಒಟ್ಟು 85,10,803 ಸಿದ್ಧ ಆಹಾರ ಪೊಟ್ಟಣ ವಿತರಿಸಿದ್ದರೆ, ರೈಲ್ವೆ ಮೂಲಕ ಸ್ವಗ್ರಾಮಕ್ಕೆ ತೆರಳಿದವರಿಗೆ 3,60,817 ಆಹಾರ ಪೊಟ್ಟಣಗಳನ್ನು ಪೂರೈಸಲಾಗಿದೆ. 5.58 ಲಕ್ಷ ಪಡಿತರ ಕಿಟ್ ಹಂಚಲಾಗಿದೆ.

ಕರೊನಾ ನಿರ್ವಹಣೆಯಲ್ಲಿ ನಯಾಪೈಸೆಯೂ ದುರ್ಬಳಕೆಯಾಗಿಲ್ಲ. ಪರಿಕರಗಳ ಖರೀದಿಯೂ ಸೇರಿ ಈವರೆಗೆ ಖರ್ಚಾಗಿರುವುದೇ 2,118.27 ಕೋಟಿ ರೂ. ಮಾತ್ರ. ಇನ್ನು 2000 ಕೋಟಿ ರೂ. ಅಕ್ರಮ ಎಲ್ಲಿಂದ? ಎಂದು ಸರ್ಕಾರ ಸ್ಪಷ್ಟಪಡಿಸಿದೆ. ಪ್ರತಿಪಕ್ಷದ ಆರೋಪದ ಬೆನ್ನಿಗೇ ಸುದ್ದಿಗೋಷ್ಠಿ ಕರೆದ ಡಿಸಿಎಂ ಡಾ. ಅಶ್ವತ್ಥನಾರಾಯಣ್, ಸಚಿವರಾದ ಆರ್. ಅಶೋಕ್, ಬಿ. ಶ್ರೀರಾಮುಲು, ಬಸವರಾಜ ಬೊಮ್ಮಾಯಿ, ಡಾ.ಕೆ. ಸುಧಾಕರ್, ಶಿವರಾಮ ಹೆಬ್ಬಾರ್ ಕಾಂಗ್ರೆಸ್​ನ ಆರೋಪ ಸುಳ್ಳಿನ ಕಂತೆ ಎಂದು ದಾಖಲೆ ಸಹಿತ ವಾಗ್ದಾಳಿ ನಡೆಸಿದರು. ದೀರ್ಘಾವಧಿ ಆಡಳಿತ ನಡೆಸಿ, ಸಾವಿರಾರು ಹಗರಣಗಳನ್ನೆಸಗಿ ಲೂಟಿ ಹೊಡೆದವರು, ತುರ್ತು ಆರೋಗ್ಯ ಪರಿಸ್ಥಿತಿಗೆ ಸ್ಪಂದಿಸುವ ಬದಲಿಗೆ ಜನರಲ್ಲಿ ವಿಷಬೀಜ ಬಿತ್ತಿ, ದಿಕ್ಕು ತಪ್ಪಿಸಲು ಮುಂದಾಗಿದ್ದಾರೆ ಎಂದು ಹರಿಹಾಯ್ದರು. ಈಗ ಜನರ ಜೀವ-ಜೀವನ ರಕ್ಷಣೆಯೇ ಮುಖ್ಯ. ಪ್ರತಿಪಕ್ಷಗಳು ಸೇರಿ ಎಲ್ಲರನ್ನೂ ವಿಶ್ವಾಸಕ್ಕೆ ಪಡೆದುಕೊಂಡು ಹೋಗೋಣ ಎಂಬುದು ಸಿಎಂ ಬಿ.ಎಸ್.ಯಡಿಯೂರಪ್ಪ ಅವರ ಇಚ್ಛೆ. ಆದರೆ ಪ್ರತಿಪಕ್ಷ ಇದನ್ನು ದುರ್ಬಳಕೆ ಮಾಡಿಕೊಂಡಿದೆ ಎಂದು ಕಿಡಿಕಾರಿದರು. ಆರೋಗ್ಯ ಇಲಾಖೆ ಈಗಾಗಲೇ ಎಲ್ಲ ಲೆಕ್ಕಪತ್ರ ಕೊಟ್ಟ ಬಳಿಕವೂ ಮತ್ತೆ ಸರ್ಕಾರದ ಮೇಲೆ ದಾಖಲೆರಹಿತ ಆಪಾದನೆ ಹೊರಿಸಲಾಗಿದೆ. ಮಾನವೀಯತೆ, ಪ್ರಾಮಾಣಿಕತೆಯಿಂದ ಕೆಲಸ ಮಾಡುತ್ತಿರುವ ಸರ್ಕಾರಕ್ಕೆ ಬೆನ್ನು ತಟ್ಟುವುದು ಬೇಡ, ಬೆನ್ನಿಗೆ ಇರಿಯುವ ಕೆಲಸ ಮಾಡಬಾರದು ಎಂದು ಸಚಿವರು ಕುಟುಕಿದರು.

https://www.vijayavani.net/all-liquor-stores-are-open-in-karntaka/