ಸೇವೆ, ಶಕ್ತಿಯಲ್ಲಿ ಆಂಜನೇಯನ ರೂಪ ಅಶ್ವಿನ್​

ಅಗ್ನಿಶಾಮಕ ಅಧಿಕಾರಿ ವಿನಾಯಕ ಸಂತಸ | ಸಾಧಕ ಸಿಬ್ಬಂದಿಗೆ ಸನ್ಮಾನ

ವಿಜಯವಾಣಿ ಸುದ್ದಿಜಾಲ ಉಡುಪಿ
ಅಗ್ನಿಶಾಮಕ ಇಲಾಖೆಯಲ್ಲಿ ಕೆಲಸ ನಿರ್ವಹಿಸುವವರಿಗೆ ಹೆಚ್ಚಿನ ಮನೋಬಲ ಹಾಗೂ ದೈಹಿಕ ಶಕ್ತಿ ಉತ್ತಮವಾಗಿದ್ದರೆ ಮಾತ್ರ ಇನ್ನೊಬ್ಬರ ಜೀವ ರಕ್ಷಣೆ ಮಾಡಲು ಸಾಧ್ಯವಾಗುತ್ತದೆ. ಸೇವೆ ಹಾಗೂ ಶಕ್ತಿಯಲ್ಲಿ ಆಂಜನೇಯನ ರೂಪವೇ ಆಗಿರುವ ಅಶ್ವಿನ್​ ಸನಿಲ್​ ಎಲ್ಲ ಸಿಬ್ಬಂದಿಗೆ ಮಾದರಿ ಆಗಿದ್ದಾರೆ ಎಂದು ಉಡುಪಿ ಜಿಲ್ಲಾ ಅಗ್ನಿಶಾಮಕ ಅಧಿಕಾರಿ ವಿನಾಯಕ ಕಲ್ಗುಟ್ಕರ್​ ಸಂತಸ ವ್ಯಕ್ತಪಡಿಸಿದರು.

ಇತ್ತೀಚೆಗೆ ಡೆನ್ಮಾರ್ಕ್​ನಲ್ಲಿ ನಡೆದ ವರ್ಲ್ಡ್​ ಫೈರ್ ಫೈರ್ಟಸ್​ ಗೇಮ್ಸ್​ನಲ್ಲಿ ಭಾರತದ ಪರವಾಗಿ ಸ್ಪರ್ಧಿಸಿ ಎರಡು ಚಿನ್ನ ಹಾಗೂ ಒಂದು ಕಂಚಿನ ಪದಕ ಗಳಿಸಿದ ಇಲಾಖೆಯ ಪ್ರಮುಖ ಅಗ್ನಿಶಾಮಕ ಅಶ್ವಿನ್​ ಸನಿಲ್​ ಅವರನ್ನು ಉಡುಪಿ ಅಗ್ನಿಶಾಮಕ ಮತ್ತು ತುರ್ತು ಸೇವಾ ಇಲಾಖೆಯ ಸಿಬ್ಬಂದಿ ಪರವಾಗಿ ಶನಿವಾರ ಸನ್ಮಾನಿಸಿ ಮಾತನಾಡಿದರು.

ರಾಜ್ಯದ ಹೆಮ್ಮೆ

ಕ್ರೀಡಾ ವಿಭಾಗದಲ್ಲಿ ಸದಾ ಸಾಧನೆ ಮಾಡುತ್ತಿರುವ ಅಶ್ವಿನ್​ ಸನಿಲ್​, ಇಲಾಖೆಗಷ್ಟೇ ಅಲ್ಲದೆ ರಾಜ್ಯದ ಹೆಮ್ಮೆಯಾಗಿದ್ದಾರೆ. ಅವರ ಸಾಧನೆ ಒಲಿಂಪಿಕ್​ ಕ್ರೀಡಾಕೂಟಕ್ಕಿಂತಲೂ ದೊಡ್ಡಮಟ್ಟದ್ದಾಗಿದೆ. ಇಂತಹ ಸಿಬ್ಬಂದಿ ನಮ್ಮೊಡನೆ ಕೆಲಸ ಮಾಡುತ್ತಿರುವುದು ನಿಜಕ್ಕೂ ನನ್ನ ಸೌಭಾಗ್ಯವಾಗಿದೆ. ಅವರು ಕ್ರೀಡೆಯಲ್ಲಿ ಇನ್ನೂ ಹೆಚ್ಚು ಸಾಧನೆ ಮಾಡಲು ಇಲಾಖೆಯಿಂದ ಅಗತ್ಯ ಸಹಕಾರ ನೀಡಲಾಗುವುದು ಎಂದರು.

ಉಡುಪಿ ಸರ್ಕಾರಿ ವ್ಯಾಯಾಮ ಶಾಲೆಯ ದೈಹಿಕ ಶಿಕ್ಷಕ ಉಮೇಶ್​ ಮಟ್ಟು, ಸಹಾಯಕ ಅಗ್ನಿಶಾಮಕ ಠಾಣಾಧಿಕಾರಿ ರವೀಂದ್ರ, ಜ್ಯೇಷ್ಠಾ ಕನ್​ಸ್ಟ್ರಕ್ಷನ್​ನ ಮುಖ್ಯಸ್ಥ ಯೋಗೇಶ್​, ಹಿರಿಯ ಪ್ರಮುಖ ಅಗ್ನಿಶಾಮಕ ಕೇಶವ್​, ಅಗ್ನಿಶಾಮಕ ಚಾಲಕ ಅಲ್ವಿನ್​ ಹಾಗೂ ಸಿಬ್ಬಂದಿ ಉಪಸ್ಥಿತರಿದ್ದರು.

ಅಗ್ನಿಶಾಮಕ ಪ್ರಮುಖ ರಾಘವೇಂದ್ರ ಆಚಾರಿ ಕಾರ್ಯಕ್ರಮ ನಿರೂಪಿಸಿದರು.