ಮನೆಗಳ ಮೇಲೆ ವಿದ್ಯುತ್ ತಂತಿ ಅಳವಡಿಕೆಗೆ ವಿರೋಧ

9 ತಿಂಗಳ ಹಿಂದೆ ಅರಸನಘಟ್ಟ ಗ್ರಾಮಸ್ಥರು ನೀಡಿದ ನಾಲ್ಕು ಎಕರೆ ಜಾಗದಲ್ಲಿ 66/11 ಕೆವಿ ವಿದ್ಯುತ್ ಪವರ್ ಸ್ವೇಷನ್ ಆರಂಭಿಸಲಾಗಿದೆ. ಅಲ್ಲಿಂದ ಕಾಶಿಪುರ, ಅಮೃತಾಪುರ, ಕೊಂಡಾಪುರ ಸೇರಿ ಮುಂದಿನ ಗ್ರಾಮಗಳಿಗೆ ವಿದ್ಯುತ್ ಸಂಪರ್ಕ ನೀಡಲು ವಿದ್ಯುತ್ ಪವರ್ ಲೈನ್ 11 ಕೆವಿ ತಂತಿಯನ್ನು ಕೆಲ ಮನೆಗಳ ಮೇಲೆ ಪ್ರಾಥಮಿಕ ಲೈನ್ ಹಾದು ಹೋಗಿರುವ ಕಂಬಕ್ಕೆ ಜೋಡಣೆ ಮಾಡಲು ಮುಂದಾಗಿದ್ದಾರೆ. ಇದು ಗ್ರಾಮಸ್ಥರಲ್ಲಿ ಭೀತಿ ಸೃಷ್ಟಿಸಿದೆ ಎಂದು ಗ್ರಾಮದ ಎ.ಡಿ. ಗಿರೀಶ್ ಹೇಳಿದರು.

ಈಗಾಗಲೇ ವಿದ್ಯುತ್ ಕಂಬಗಳಿಂದ ವಿದ್ಯುತ್ ಪ್ರವಹಿಸಿ ಸಾಕಷ್ಟು ಅನಾಹುತ ಜರುಗಿವೆ. ಇದರ ಜತೆ 11 ಕೆವಿ ಲೈನ್ ಆಕಸ್ಮಿಕವಾಗಿ ಮನೆಗಳ ಮೇಲೆ ಬಿದ್ದಲ್ಲಿ ಇಡಿ ಊರೇ ಭಸ್ಮವಾಗಲಿದೆ. ಗ್ರಾಮದ ಹೊರಭಾಗದಲ್ಲಿ ಕಂಬಗಳನ್ನು ಹಾಕಿ ವಿದ್ಯುತ್ ತಂತಿ ಅಳವಡಿಸಬೇಕೆಂದು ಒತ್ತಾಯಿಸಿದರು.

ಗ್ರಾಮದ ನವೀನ್ ಮಾತನಾಡಿ, ಗ್ರಾಮದಲ್ಲಿ ರಸ್ತೆಯ ನಡುವೆ, ಶಾಲೆ, ಮನೆ ಮೇಲೆ ವಿದ್ಯುತ್ ತಂತಿ ಹಾದು ಹೋಗುವಂತೆ ಅವೈಜ್ಞಾನಿವಾಗಿ ಕಂಬ ಹಾಕಲಾಗಿದೆ. ರಸ್ತೆಗಳ ತಿರುವಿನಲ್ಲಿ ವಿದ್ಯುತ್ ಕಂಬಗಳನ್ನು ಅಳವಡಿಸಿದ್ದರಿಂದ ಹೊಳಲ್ಕೆರೆ, ಚಿಕ್ಕಜಾಜೂರಿಗೆ ಸಂಚರಿಸುವ ಶಾಲಾ ವಾಹನಗಳು, ಟ್ರಾೃಕ್ಟರ್, ಲಾರಿ, ಎತ್ತಿನ ಗಾಡಿಗಳು ಸಾಕಷ್ಟು ಬಾರಿ ಕಂಬಕ್ಕೆ ಡಿಕ್ಕಿ ಹೊಡೆದಿವೆ. ಸಂಬಂಧಿಸಿದ ಇಂಜಿನಿಯರ್ ಹಾಗೂ ಗುತ್ತಿಗೆದಾರರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದರು.

ತಾಪಂ ಮಾಜಿ ಸದಸ್ಯ ತಿಪ್ಪೇಸ್ವಾಮಿ, ಎ. ಏಕಾಂತ, ಎ.ಒ. ಗಿರೀಶ್, ಸಂಜಯ್, ಸುಧಾಕರ್, ವಿಶ್ವ, ಶಿವಣ್ಣ, ಮಲ್ಲಿಕಾರ್ಜುನ್, ಶಿವಕುಮಾರ್, ಅನಂದ್, ಡಿ.ಸಿ. ಮೋಹನ್, ರಾಜಪ್ಪ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.