ಕಾನೂನು ಬಾಹಿರ ಕೃತ್ಯಗಳ ತಡೆಗೆ ಬೇಕು ದಿಟ್ಟ ನಿಲುವು

ಮೊಳಕಾಲ್ಮೂರು: ವಿದ್ಯಾರ್ಥಿನಿಯರು ಬಾಲ್ಯ ವಿವಾಹ ಹಾಗೂ ಲೈಂಗಿಕ ದೌರ್ಜನ್ಯಗಳಂತಹ ಕಾನೂನುಬಾಹಿರ ಕೃತ್ಯಗಳಿಗೆ ಕಡಿವಾಣ ಹಾಕಲು ದಿಟ್ಟ ನಿಲುವುಗಳನ್ನು ತೆಗೆದುಕೊಳ್ಳಬೇಕು ಎಂದು ಸಿವಿಲ್​ ನ್ಯಾಯಾಧೀಶ ಬಿ.ಆರ್​. ಪುನೀತ್​ ಹೇಳಿದರು.

ಪಟ್ಟಣದ ಬಾಲಕಿಯರ ಸರ್ಕಾರಿ ಪ್ರೌಢಶಾಲೆಯಲ್ಲಿ ಶುಕ್ರವಾರ ತಾಲೂಕು ಕಾನೂನು ಸೇವಾ ಸಮಿತಿ, ವಕೀಲರ ಸಂಘದಿಂದ ಹಮ್ಮಿಕೊಂಡಿದ್ದ ಮಕ್ಕಳ ರಕ್ಷಣೆ, ಕಾನೂನು ಅರಿವು ಕಾರ್ಯಕ್ರಮದಲ್ಲಿ ಮಾತನಾಡಿ, ಜಿಲ್ಲೆಯಲ್ಲಿ ಬಾಲ್ಯ ವಿವಾಹ ಹಾಗೂ ಲೈಂಗಿಕ ದೌರ್ಜನ್ಯ ಪ್ರಕರಣಗಳು ಹೆಚ್ಚಾಗುತ್ತಿವೆ. ಇದರಿಂದಾಗಿ ಹೆಣ್ಣುಮಕ್ಕಳ ಭವಿಷ್ಯ, ಕನಸುಗಳು ಹಾಳಾಗುವ ಅಪಾಯಕಾರಿ ಬೆಳವಣಿಗೆ ಬಗ್ಗೆ ಉಚ್ಚ ನ್ಯಾಯಾಲಯ ಎಚ್ಚರಿಸಿದೆ ಎಂದರು.

ಕಾನೂನುಬಾಹಿರ ಚಟುವಟಿಕೆಗಳಿಗೆ ಕಡಿವಾಣ ಹಾಕಲು ಕಾನೂನು ಸೇವಾ ಸಮಿತಿ ಸಂಕಲ್ಪ ತೊಟ್ಟಿದೆ. ಹೆಣ್ಣುಮಕ್ಕಳಿಗೆ ಅನ್ಯಾಯವಾದಲ್ಲಿ ಅದನ್ನು ವಿರೋಧಿಸಲು ಮುಂದಾಗಬೇಕು. ಅಗತ್ಯವಾದಲ್ಲಿ ಪೊಲೀಸರ ಸಹಕಾರ ಪಡೆದು ಆರೋಪಿಗಳ ವಿರುದ್ಧ ಕ್ರಮಕ್ಕೆ ಮುಂದಾಗುವ ದಿಟ್ಟತನ ಬೆಳಸಿಕೊಂಡಲ್ಲಿ ನಿಮ್ಮ ಜೀವನ ಸಾರ್ಥಕವಾಗಲಿದೆ. ಗ್ರಾಮೀಣ ಪ್ರದೇಶದಲ್ಲಿ ಬಾಲ್ಯ ವಿವಾಹ ಒಂದು ಪಿಡುಗಾಗಿದೆ. ಅದರ ಸಂಪೂರ್ಣ ನಿಮೂರ್ಲನೆಗೆ ಕಾನೂನು ವ್ಯವಸ್ಥೆ ಬಲವಾಗಿದೆ. ಹೆಣ್ಣು ಮಕ್ಕಳಿಗೆ ಉನ್ನತ ಶಿಣ ಕೊಡಿಸಿ ಉದ್ಯೋಗ ಮಾಡುವ ಆತ್ಮಸ್ಥೆರ್ಯ ತುಂಬಬೇಕು ಎಂದರು.

ಪ್ರಭಾರ ಮುಖ್ಯಶಿಕ್ಷಕ ನಾಗರಾಜ್​, ಸರ್ಕಾರಿ ಅಭಿಯೋಜಕ ಮಹಮದ್​ ಶಂಶಿರ್​ಆಲಿ, ವಕೀಲರಾದ ಕೆ.ಎಂ. ರಾಮಾಂಜಿನಿ, ವೆಂಕಟೇಶ, ಶಿಕ್ಷಕರಾದ ಜಿ.ಟಿ. ಗುರುಸ್ವಾಮಿ, ಜಗಳೂರು ಪಾಪಣ್ಣ, ಎಸ್​.ಎಲ್​. ಸವಿತಾ, ಶಿವಗಂಗಮ್ಮ, ಮನೋಹರರೆಡ್ಡಿ, ಪುರುಷೋತ್ತಮರೆಡ್ಡಿ, ಎನ್​.ಕೆ. ತಿಪ್ಪಮ್ಮ, ನಾಗರತ್ನ, ರೂಪ, ಕಾವೇರಿ ಇತರರು ಇದ್ದರು.