ಮೇವಿಲ್ಲದೆ ಜಾನುವಾರುಗಳು ನಿತ್ರಾಣ

ಕಾಡಂಚಿನ ಗ್ರಾಮಗಳಲ್ಲಿ ಮೇವಿನ ಜತೆಗೆ ಜಾನುವಾರುಗಳಿಗೆ ಕುಡಿಯುವ ನೀರೂ ದೊರಕದಂತಾಗಿದ್ದು ಜೀವನೋಪಾಯಕ್ಕೆ ಹೈನುಗಾರಿಕೆಯನ್ನೇ ಅವಲಂಬಿಸಿದ ಬಡಕುಟುಂಬಗಳು ಇದೀಗ ತೀವ್ರ ಸಂಕಷ್ಟಕ್ಕೆ ಸಿಲುಕುವಂತಾಗಿದೆ. ತಾಲೂಕಿನ ಮಂಗಲ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಗ್ರಾಮಗಳು ಬಂಡೀಪುರ ಕಾಡಂಚಿನಲ್ಲಿದ್ದರೂ ಜಾನುವಾರುಗಳನ್ನು ಕಾಡಿನೊಳಗೆ ಹೋಗಲು ಬಿಡದ ಪರಿಣಾಮ ಮೇವಿನ ಕೊರತೆ ಎದುರಾಗಿದೆ. ಸಮರ್ಪಕ ಮಳೆಬೀಳದ ಕಾರಣ ಕೆರೆಕಟ್ಟೆಗಳಲ್ಲಿ ನೀರಿಲ್ಲದೆ ಜಾನುವಾರುಗಳು ದಾಹದಿಂದ ಬಳಲುತ್ತಿವೆ. ಇತ್ತ ಬಫರ್ ವಲಯದ ಕೆರೆಗಳಲ್ಲಿಯೂ ನೀರಿಲ್ಲದೆ ಬತ್ತಿಹೋಗಿವೆ. ಹುಲಿಗಿನಮೊರಡಿ ವೆಂಕಟರಮಣಸ್ವಾಮಿ ಬೆಟ್ಟದ ತಪ್ಪಲಿಗೆ ಹೋಗುವ ಕಿಲಗೆರೆ ಗ್ರಾಮದಲ್ಲಿನ ಜಾನುವಾರುಗಳಿಗೆ ಸಮರ್ಪಕ ಮೇವು-ನೀರು ದೊರಕದೆ ದಿನೇ ದಿನೆ ಬಡಕಲಾಗುತ್ತಿವೆ. ಬೆಳಗ್ಗೆ ಮೇಯಲು ಹೋದ ಎಷ್ಟೋ ರಾಸುಗಳು ಮನೆಗಳಿಗೆ ಹಿಂದುರಗದೆ ಅಲ್ಲಿಯೇ ಸಾಯುತ್ತಿವೆ. ಕೂಡಲೇ ಪಶುವೈದ್ಯರನ್ನು ಕರೆಸಿ ಅವುಗಳಿಗೆ ಗ್ಲೂಕೋಸ್ ಹಾಗೂ ಔಷಧ ಕೊಡಿಸಿ ಮನೆಯಲ್ಲಿಯೇ ಹೆಚ್ಚಿನ ಮೇವು ನೀಡಬೇಕಾಗುತ್ತಿದೆ. ಇದರಿಂದ ನಿತ್ರಾಣವಾದ ಜಾನುವಾರುಗಳಿಗೆ ಚಿಕಿತ್ಸೆ ಕೊಡಿಸುವುದು ಹೈನುಗಾರರಿಗೆ ದುಬಾರಿಯಾಗಿ ಪರಿಣಮಿಸುತ್ತಿದೆ.

ಕಳೆದ ವರ್ಷ ಸಮರ್ಪಕ ಮಳೆ ಬಿಳದೆ ಜಾನುವಾರುಗಳ ಮೇವಿಗೆ ಮೂಲವಾದ ಜೋಳ, ಮುಸುಕಿನಜೋಳ, ರಾಗಿ, ಹುರುಳಿ, ನೆಲಗಡಲೆ ಮುಂತಾದ ಬೆಳೆಗಳನ್ನು ಬೆಳೆಯಲು ಸಾಧ್ಯವಾಗಿಲ್ಲ. ಪರಿಣಾಮ ತಾಲೂಕಿನ ರೈತರು ಹಾಗೂ ಜಾನುವಾರು ಮಾಲೀಕರಲ್ಲಿ ಮೇವಿನ ಸಂಗ್ರಹ ಇಲ್ಲದಂತಾಗಿದೆ. ಸುತ್ತಮುತ್ತಲೂ ಗೋಮಾಳಗಳಲ್ಲಿ ಮೇವಿಲ್ಲದ ಪರಿಣಾಮ ಜಾನುವಾರುಗಳ ಮೇವಿಗೆ ತೀವ್ರ ತತ್ವಾರವುಂಟಾಗಿದೆ. ಇಷ್ಟಾದರೂ ಸರ್ಕಾರ ಹಾಗೂ ಜಿಲ್ಲಾಡಳಿತ ಜಾನುವಾರುಗಳಿಗೆ ಮೇವು ಪೂರೈಸಲು ಗೋಶಾಲೆ ಆರಂಭಿಸಿಲ್ಲ. ಅಲ್ಲದೆ ಜಾನುವಾರುಗಳಿಗೆ ಮೇವು ಪೂರೈಸಲು ಕ್ರಮಕೈಗೊಂಡಿಲ್ಲ. ಇದರಿಂದ ಜಾನುವಾರು ಮಾಲೀಕರು ದುಬಾರಿ ಬೆಲೆ ತೆತ್ತು ಮುಸುಕಿನ ಜೋಳದ ಕಡ್ಡಿ ಹಾಗೂ ಭತ್ತದ ಹುಲ್ಲುಗಳನ್ನು ಖರೀದಿಸುತ್ತಿದ್ದಾರೆ.

ತಾಲೂಕಿನಲ್ಲಿ ಜಾನುವಾರು ಮೇವಿಗೆ ತತ್ವಾರವಾಗಿದ್ದರೂ ಮಧ್ಯವರ್ತಿಗಳು ಕೇರಳ ಹಾಗೂ ತಮಿಳುನಾಡಿಗೆ ಮೇವು ಸಾಗಿಸುವ ಮೂಲಕ ಹಣ ಮಾಡಿಕೊಳ್ಳುತ್ತಿದ್ದಾರೆ. ಮುಸುಕಿನ ಜೋಳದ ಕಡ್ಡಿ ಹಾಗೂ ಭತ್ತದ ಹುಲ್ಲಿನ ಬೆಲೆ ತೀವ್ರ ಪ್ರಮಾಣದಲ್ಲಿ ಏರಿಕೆಯಾಗಿದೆ. ಕ್ವಿಂಟಾಲ್‌ಗೆ 3.5 ರಿಂದ 4.5 ಸಾವಿರಕ್ಕೇರಿದ್ದರೆ ಹಿಂದೆ ಭತ್ತ ಬೆಳೆಯುವ ಪ್ರದೇಶದಲ್ಲಿ ಉಚಿತವಾಗಿ ಸಿಗುತ್ತಿದ್ದ ಹುಲ್ಲಿನ 30 ಕೆಜಿ ತೂಕದ ಪಿಂಡಿಗೆ 300 ರೂ.ಗೆ ಬಿಕರಿಯಾಗುತ್ತಿದೆ. ಸ್ಥಳೀಯವಾಗಿ ಮುಸುಕಿನ ಜೋಳದ 7 ಕಡ್ಡಿ ಕಂತೆಗೆ 50 ರೂ. ಹಾಗೂ 10 ಕಡ್ಡಿಯಿರುವ ಕಂತೆಗೆ 100 ರೂ.ನಂತೆ ಮಾರಾಟ ಮಾಡುವ ಮೂಲಕ ಜಾನುವಾರು ಮಾಲೀಕರನ್ನು ಶೋಷಣೆಗೆ ಒಳಪಡಿಸುತ್ತಿದ್ದಾರೆ. ನೆರೆರಾಜ್ಯಗಳಿಗೆ ಮೇವು ಸಾಗಂಎ ಮಾಡುವುದನ್ನು ತಡೆಗಟ್ಟಿದರೆ ಸ್ವಲ್ಪಮಟ್ಟಿಗೆ ಮೇವಿನ ಕೊರತೆ ನೀಗಿಸಲು ಸಾಧ್ಯವಾಗುತ್ತದೆ ಎಂದು ಆಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ನೀರಾವರಿ ಜಮೀನು ಹೊಂದಿರುವವರಿಗೆ ಮೇವು ಬೀಜ ಕೊಡುವ ಬಗ್ಗೆ ಚಿಂತಿಸಲಾಗಿದ್ದು ಇದರಿಂದ ಒಂದೆರಡು ತಿಂಗಳಲ್ಲಿ ಮೇವು ದೊರಕುವುದರಿಂದ ಮೇವಿನ ಕೊರತೆಯ ತೀವ್ರತೆ ತಗ್ಗಿಸುವ ಚಿಂತನೆ ನಡೆಸಲಾಗಿದೆ. ತಾಲೂಕಿನಲ್ಲಿ ಅತಿ ಹೆಚ್ಚಿನ ಪ್ರಮಾಣದಲ್ಲಿ ಬಾಳೆ ಬೆಳೆಯಲಾಗುತ್ತಿದೆ. ಮೇವಿನ ಕೊರತೆ ನೀಗಿಸಲು ಜಾನುವಾರು ಮಾಲೀಕರು ಸ್ವಲ್ಪ ಪ್ರಮಾಣದಲ್ಲಿ ಬಾಳೆ ಕಂದು, ಎಲೆ, ನುಗ್ಗೆ, ಅಗಸೆ, ಟೀಕ್ ಎಲೆ, ಗೊಬ್ಬರದ ಗಿಡ, ಬಸವನಪಾದ ಸಸಿಗಳನ್ನು ಮೇವಿನ ರೂಪದಲ್ಲಿ ನೀಡುವಂತೆ ತಿಳಿ ಹೇಳಲಾಗುತ್ತಿದೆ.