ಕಳೆಗುಂದಿದ ಭರಚುಕ್ಕಿ ಜಲಪಾತ

ವರ್ಷದ ಪ್ರಾರಂಭದಲ್ಲಿಯೇ ಜಲಪಾತ ವೀಕ್ಷಣೆಗೆ ಬರುವ ಪ್ರವಾಸಿಗರ ಸಂಖ್ಯೆ ಕುಸಿದಿತ್ತು. ದೇಶ-ವಿದೇಶ ಸೇರಿದಂತೆ ರಾಜ್ಯದ ನಾನಾ ಕಡೆಗಳಿಂದ ವರ್ಷವಿಡೀ ಲಕ್ಷಾಂತರ ಜನರು ಜಲಪಾತ ನೋಡಲು ಆಗಮಿಸುತ್ತಾರೆ. ಮಳೆಗಾಲದಲ್ಲಿ ಜಲಪಾತ ಭೋರ್ಗರೆದು ಬೀಳುವ ರೌದ್ರರಮಣೀಯ ದೃಶ್ಯ ನೋಡಲು ಎರಡು ಕಣ್ಣು ಸಾಲದು. ಆದರೀಗ ಕಾವೇರಿ ನದಿಯಲ್ಲಿ ನೀರು ಕಡಿಮೆಯಾಗಿದೆ. ಇದರಿಂದ ಭರಚುಕ್ಕಿ ವೈಭವ ಸೊರಗಿದೆ. ಈ ನಡುವೆ ಐತಿಹಾಸಿಕ ಧಾರ್ಮಿಕ ಸ್ಥಳವಾದ ಶಿವನಸಮುದ್ರ ಸಮೂಹ ದೇವಾಲಯಗಳಾದ ಆದಿಶಕ್ತಿ ಶಿಂಷಾ ಮಾರಮ್ಮ, ಶ್ರೀಮಧ್ಯರಂಗನಾಥಸ್ವಾಮಿ, ಶ್ರೀಚಕ್ರ ಸಮೇತ ಮೀನಾಕ್ಷಿ ದೇವಾಲಯ ಹಾಗೂ ದರ್ಗಾಕ್ಕೆ ವಿಕೆಂಡ್‌ನಲ್ಲಿ ಹೆಚ್ಚು ಜನರು ಆಗಮಿಸುತ್ತಾರೆ. ಈ ವೇಳೆ ಪಕ್ಕದಲ್ಲಿಯೇ ಇರುವ ಭರಚುಕ್ಕಿ ಫಾಲ್ಸ್‌ಗೂ ತೆರಳುತ್ತಿದ್ದು ನೀರಿಲ್ಲದೆ ಕಲ್ಲು ಬಂಡೆಗಳ ದರ್ಶನ ಮಾಡಿ ಬೇಸರದಿಂದ ಹಿಂದಿರುಗುತ್ತಿದ್ದಾರೆ.

ಇನ್ನು ನೀರಿಲ್ಲದೆ ಪ್ರವಾಸಿಗರ ಸಂಖ್ಯೆ ಕ್ಷೀಣಿಸುತ್ತಿರುವುದರಿಂದ ಪ್ರವಾಸೋದ್ಯಮಕ್ಕೂ ಪೆಟ್ಟು ಬಿದ್ದಿದೆ. ಸತ್ತೇಗಾಲ ಹ್ಯಾಂಡ್‌ಪೋಸ್ಟ್‌ನಿಂದ ಭರಚುಕ್ಕಿ ಜಲಪಾತದವರೆಗೆ ಪ್ರವಾಸಿಗರನ್ನೇ ನಂಬಿ ಜೀವನ ಸಾಗಿಸುವ ವ್ಯಾಪಾರಿಗಳಿದ್ದಾರೆ. ಕಿರಾಣಿ ಅಂಗಡಿಯಿಂದ ಹಿಡಿದು ಹೋಟೆಲ್ ಉದ್ಯಮ ಇದರಿಂದಾಗಿ ಕಷ್ಟಕರವಾಗಿದೆ.

4 ತಿಂಗಳು ಕಳೆ: ಈಗಾಗಲೇ ಕಳೆದ 2 ತಿಂಗಳಿನಿಂದ ವ್ಯಾಪಾರ ಸಂಕಷ್ಟಕ್ಕೆ ಪ್ರವಾಸೋದ್ಯಮ ಸಿಲುಕಿದೆ. ಅರಣ್ಯ ಇಲಾಖೆ ಭರಚುಕ್ಕಿ ಜಲಪಾತ ಪ್ರವೇಶಕ್ಕೆ ನಿಗದಿಪಡಿಸಿದ ದರ ಸಂಗ್ರಹಣೆ ಪಾತಾಳಕ್ಕೆ ಇಳಿದಿದೆ. ಅರಣ್ಯ ಇಲಾಖೆ ಮಾಹಿಯಂತೆ ದಿನದಲ್ಲಿ 100-120 ಜನರು ಬಂದರೂ ಹೆಚ್ಚು. ಜೂನ್, ಜುಲೈ, ಆಗಸ್ಟ್, ಸೆಪ್ಟೆಂಬರ್‌ನ ವಾರದ ದಿನಗಳಲ್ಲಿ 800 ರಿಂದ 1000, ವಾರಾಂತ್ಯ ದಿನದಲ್ಲಿ 1000 ರಿಂದ 1200 ಪ್ರವಾಸಿಗರು ಭೇಟಿ ನೀಡುತ್ತಾರೆ. ಮಳೆ ಬಿದ್ದು ಕಾವೇರಿ ಮೈದುಂಬಿ ಹರಿದರೆ ಕಾನನದ ನಡುವೆ ಭೋರ್ಗರೆದು ಹಾಲ್ನೊರೆಯಂತೆ ಬೀಳುವ ಜಲಪಾತ ಪ್ರವಾಸಿಗರಿಗೆ ಸಿಗಲಿದೆ. ಅಲ್ಲಿಯವರೆಗೂ ವ್ಯಾಪಾರಗಳಿಗೆ ಸಂಕಷ್ಟ ತಪ್ಪಿದ್ದಲ್ಲ. ಹೀಗಾಗಿ ಅಂಗಡಿ ಮಾಲೀಕರು ಕೆಲ ದಿನಗಳ ಕಾಲ ಪರ್ಯಾಯ ಕೆಲಸ ಮಾಡಿ ಜೀವನ ಸಾಗಿಸುತ್ತಾರೆ.

ನನೆಗುದಿಗೆ ಬಿದ್ದ ಬಯೋಡೈವರ್ಸಿಟಿ ಪಾರ್ಕ್ : ಭರಚುಕ್ಕಿ ಜಲಪಾತ ನಾಡಿನ ಪ್ರೇಕ್ಷಣೀಯ ಸ್ಥಳದಲ್ಲೊಂದಾಗಿದೆ. ಉತ್ತಮ ಮಳೆಯಾದರೆ ಜಿಲ್ಲಾಡಳಿತ ಆಯೋಜಿಸುವ ಭರಚುಕ್ಕಿ ಜಲಪಾತೋತ್ಸವ ನೋಡಲು ಪ್ರವಾಸಿಗರು ತುದಿಗಾಲಲ್ಲಿ ನಿಲ್ಲುತ್ತಾರೆ. ಪ್ರವಾಸಿಗರನ್ನು ಸೆಳೆಯಲೂ 2019ರಲ್ಲಿ ಅರಣ್ಯ ಮತ್ತು ಪ್ರವಾಸೋದ್ಯಮ ಇಲಾಖೆ ಭರಚುಕ್ಕಿ ಅಂಗಳದಲ್ಲಿ ಸುಮಾರು 155 ಎಕರೆ ಪ್ರದೇಶದಲ್ಲಿ ಸುಮಾರು 100 ಕೋಟಿ ರೂ. ವೆಚ್ಚದ ಬಯೋಡೈವರ್ಸಿಟಿ ಪಾರ್ಕ್ ನಿರ್ಮಾಣಕ್ಕೆ ಚಿಂತನೆ ನಡೆಸಿತ್ತು. ಅರಣ್ಯ ಇಲಾಖೆ ಅಗತ್ಯ ಕ್ರಿಯಾಯೋಜನೆ ತಯಾರಿಸಿ ರಾಜ್ಯ ಸರ್ಕಾರದ ಅನುಮೋದನೆಗೆ ಸಲ್ಲಿಸಿತ್ತು. ಈ ಯೋಜನೆಗೆ ಸರ್ಕಾರ ಒತ್ತು ನೀಡದಿದ್ದರಿಂದ ಯೋಜನೆ ನನೆಗುದಿಗೆ ಬಿದ್ದಿದೆ. ಬಯೋಡೈವರ್ಸಿಟಿ ಪಾರ್ಕ್ ನಿರ್ಮಾಣವಾದರೆ ಸದಾ ಗಿಜುಗುಡುವ ರಾಜ್ಯದ ಉತ್ತಮ ಪ್ರವಾಸಿ ತಾಣವಾಗಿ ಭರಚುಕ್ಕಿ ಫಾಲ್ಸ್ ಹೊರಹೊಮ್ಮಲಿದೆ. ಸರ್ಕಾರ ಈ ಬಗ್ಗೆ ಕ್ರಮವಹಿಸಬೇಕೆಂಬುದು ಸಾರ್ವಜನಿಕರ ಒತ್ತಾಯ.