ಶತಕ ಬಾರಿಸಿದ ಟೊಮ್ಯಾಟೊ ದರ

ಸಂತೋಷ ಮುರಡಿ ಮುಂಡರಗಿ
ಪ್ರತಿ ಮನೆಯಲ್ಲಿ ಆಹಾರ ತಯಾರಿಕೆಯಲ್ಲಿ ಟೊಮ್ಯಾಟೊ ಬಳಸುವುದು ಸಾಮಾನ್ಯ. ಇದು ಅಡುಗೆಯ ರುಚಿ ಹೆಚ್ಚಿಸುತ್ತದೆ. ಪೋಷಕಾಂಶ ಒಳಗೊಂಡಿರುವ ಟೊಮ್ಯಾಟೊ ಆರೋಗ್ಯಕ್ಕೆ ತುಂಬ ಒಳ್ಳೆಯದು. ಇಂತಹ ಟೊಮ್ಯಾಟೊ ದರ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿದ್ದು, ಈಗ ಕೆ.ಜಿಗೆ ೧೦೦ ರೂಪಾಯಿ ದಾಟಿದೆ.
ವಾರದ ಹಿಂದೆ ಪ್ರತಿ ಕೆಜಿಗೆ ೫೦ ರಿಂದ ೬೦ ರೂ.ಗೆ ಮಾರಾಟವಾಗಿದ್ದ ಟೊಮ್ಯಾಟೊ ಈಗ ೧೦೦ ರಿಂದ ೧೨೦ರೂ.ಗೆ ಮಾರಾಟವಾಗುತ್ತಿದೆ. ಸಣ್ಣ ಪ್ರಮಾಣದಲ್ಲಿನ ಟೊಮ್ಯಾಟೊ ಕೆಜಿಗೆ ೧೦೦ ರೂಪಾಯಿಗೆ ಮಾರಾಟವಾಗುತ್ತಿದೆ. ತಾಲೂಕಿನಲ್ಲಿ ಟೊಮ್ಯಾಟೊ ಇಳುವರಿ ಪೂರ್ಣಪ್ರಮಾಣ ಕುಸಿತ ಕಂಡ ಹಿನ್ನೆಲೆಯಲ್ಲಿ ಪಟ್ಟಣದ ಮಾರುಕಟ್ಟೆಗೆ ದಾವಣಗೆರೆ, ಕೋಲಾರ, ಮಹಾರಾಷ್ಟ್ರ ಮೊದಲಾದ ಕಡೆಗಳಿಂದ ಟೊಮ್ಯಾಟೊ ಬರುತ್ತಿದೆ. ಹೀಗಾಗಿ ದರ ಹೆಚ್ಚಳ ಕಂಡಿದೆ. ಹಾಗೆಯೇ ಬೇಸಿಗೆಯಲ್ಲಿ ಸಮರ್ಪಕವಾಗಿ ಇಳುವರಿ ಬರದಿರುವುದರಿಂದಲೂ ದರ ಏರಿಕೆಯಾಗುತ್ತಿದೆ.
ಮಳೆಗಾಲದಲ್ಲಿ ಸಾಮಾನ್ಯವಾಗಿ ತೇವಾಂಶದಿಂದ ಬೆಳೆ ಹಾನಿಯಾಗುವುದು ಸಹಜ. ಹೀಗಾಗಿ ಟೊಮ್ಯಾಟೊ ಬೆಳೆ ಹಾನಿಯಾದರೆ ಈಗಿರುವಂತ ದರಕ್ಕಿಂತ ಮತ್ತಷ್ಟು ದರ ಹೆಚ್ಚಳವಾಗಬಹುದೇ? ಎಂಬ ಆತಂಕ ಗ್ರಾಹಕರಲ್ಲಿದೆ. ಮುಂದಿನ ದಿನದಲ್ಲಿ ಟೊಮ್ಯಾಟೊ ದರ ಹೆಚ್ಚಳವಾಗುತ್ತದೆಯೋ ಅಥವಾ ಇಳಿಕೆಯಾಗುತ್ತದೆಯೋ ಕಾದು par ನೋಡಬೇಕಿದೆ.---ಬಾಕ್ಸ್---
ವಿವಿಧ ತರಕಾರಿ ದರ ಏರಿಕೆ…
ಟೊಮ್ಯಾಟೊ ದರ ಮಾತ್ರವಲ್ಲ, ನಿತ್ಯದ ಅಡುಗೆಗೆ ಅವಶ್ಯವಿರುವ ವಿವಿಧ ತರಕಾರಿ ಬೆಲೆಯೂ ಹೆಚ್ಚಳಗೊಂಡಿದೆ. ಕಳೆದೊಂದು ತಿಂಗಳಿಂದ ಬೆಲೆ ಏರಿಕೆಯಾಗುತ್ತಿದೆ. ಪ್ರತಿ ಕೆಜಿ ಉಳ್ಳಾಗಡ್ಡಿಗೆ ಹಿಂದೆ ೨೦ ರೂ.ಇತ್ತು. ಈಗ ೪೦ ರೂ. ಇದೆ. ೪೦ ರೂ.ಗೆ ಇದ್ದಂತ ಕ್ಯಾರೆಟ್ ೬೦ ರಿಂದ ೮೦ ರೂ.ಆಗಿದೆ. ೪೦ ರೂ.ಇದ್ದಂತ ಸೌತೆಕಾಯಿ ೬೦ ರಿಂದ ೮೦ ರೂ.ಗೆ ತಲುಪಿದೆ. ದೊಣ್ಣೆಮೆಣಸಿನಕಾಯಿ ಕೆಜಿಗೆ ೧೦೦ರೂ. ಇದೆ. ಇನ್ನೂ ಕತಂಬರಿ ದೊಡ್ಡ ಕಟ್ಟು ೪೦ ರೂ., ಮೆಂತೆ ೪೦ ರೂ. ಇದೆ. ಒಟ್ಟಾರೆ ತರಕಾರಿ ದರ ಏರಿಕೆ ಗ್ರಾಹಕರಿಗೆ ತಲೆಬಿಸಿ ಮಾಡಿದೆ.