ಬಿಲ್ಡೆಕೋರ್​ ಪ್ರದರ್ಶನಕ್ಕೆ ಚಾಲನೆ

ವಿಜಯವಾಣಿ ಸುದ್ದಿಜಾಲ ಧಾರವಾಡ

ಫೋರಂ ಆಫ್ ಕನ್ಸಲ್ಟಿಂಗ್​ ಸಿವಿಲ್​ ಇಂಜಿನಿಯರ್ಸ್​ ಧಾರವಾಡ ಮತ್ತು ದಿ. ಇನ್​ಸ್ಟಿಟ್ಯೂಶನ್​ ಆಫ್ ಇಂಜಿನಿಯರ್ಸ್​ ಸ್ಥಾನಿಯ ಸಂಸ್ಥೆ ಹಾಗೂ ಹು-ಧಾ ಮಹಾನಗರ ಪಾಲಿಕೆ ಸಹಯೋಗದಲ್ಲಿ ಕಲಾಭವನ ಮೈದಾನದಲ್ಲಿ ಏರ್ಪಡಿಸಿರುವ ಬಿಲ್ಡೆಕೋರ-2025 ಪ್ರದರ್ಶನಕ್ಕೆ ಶುಕ್ರವಾರ ಚಾಲನೆ ನೀಡಲಾಗಿದೆ.

ಹುಡಾ ಆಯುಕ್ತ ಡಾ. ಸಂತೋಷ ಬಿರಾದಾರ ಪ್ರದರ್ಶನಕ್ಕೆ ಚಾಲನೆ ನೀಡಿದರು. ನಂತರ ಮಾತನಾಡಿದ ಅವರು, ಅಕ್ರಮ ಲೇಔಟ್​ಗಳ ನಿರ್ಮಾಣ ಕೇವಲ ಹು-ಧಾ ಮಾತ್ರವಲ್ಲದೆ, ಎಲ್ಲ ಕಡೆಗಳಲ್ಲೂ ವ್ಯಾಪಿಸಿದೆ. ಹೀಗಾಗಿ ಅಕ್ರಮ ಲೇಔಟ್​ಗಳ ನಿರ್ಮಾಣ ತಡೆಗೆ ಪ್ರಯತ್ನಿಸಲಾಗುವುದು. ಇದಕ್ಕೆ ಸಾರ್ವಜನಿಕರ ಸಹಕಾರವೂ ಅಗತ್ಯವಾಗಿದೆ ಎಂದರು.

ಮೇಯರ್​ ರಾಮಪ್ಪ ಬಡಿಗೇರ ಮಾತನಾಡಿದರು. ದಿ. ಇನ್​ಸ್ಟಿಟ್ಯೂಶನ್​ ಆಫ್ ಇಂಜಿನಿಯರ್ಸ್​ ಸ್ಥಾನಿಯ ಸಂಸ್ಥೆ ಅಧ್ಯಕ್ಷ ಡಾ. ವಿ.ಎಸ್​. ಹವಾಲ್ದಾರ ಅಧ್ಯಕ್ಷತೆ ವಹಿಸಿದ್ದರು.

ಮೂರು ದಿನಗಳ ಕಾಲ ನಡೆಯುವ ಈ ಪ್ರದರ್ಶನದಲ್ಲಿ ಸಿಮೆಂಟ್​ ಉತ್ಪಾದಕರು, ನೀರು ಸರಬರಾಜು ಸಾಮಗ್ರಿಗಳ ಉತ್ಪಾದಕರು, ಗೋಡೆ, ನೆಲಹಾಸುಗಲ್ಲುಗಳ ಉತ್ಪಾದಕರು, ವಾಟರ್​ ಪ್ರೂಫಿಂಗ್​, ಕಾಂಕ್ರೀಟ್​ ವಸ್ತುಗಳ ಉತ್ಪಾದಕರು ಸೇರಿ ಮನೆಗಳ ನಿರ್ಮಾಣಕ್ಕೆ ಸಂಬಂಧಿಸಿದ 65 ಮಳಿಗೆಗಳನ್ನು ಸ್ಥಾಪಿಸಲಾಗಿದೆ. ವೀಕ್ಷಣೆಗೆ ಉಚಿತ ಪ್ರವೇಶ ನೀಡಲಾಗಿದೆ.

ಬಿಲ್ಡೆಕೋರ ಅಧ್ಯಕ್ಷ ಎ.ಸಿ. ತಹಸೀಲ್ದಾರ, ಫೋರಂ ಆಫ್ ​ ಕನ್ಸಲ್ಟಿಂಗ್​ ಸಿವಿಲ್​ ಇಂಜಿನಿಯರ್ಸ್​ ಧಾರವಾಡ ಅಧ್ಯಕ್ಷ ಸಂತೋಷ ಅಂಚಟಗೇರಿ, ಸತೀಶ ನಾಯ್ಕರ, ಶ್ರೀಹರಿ ಕೆ.ಎಚ್​., ಪದಾಧಿಕಾರಿಗಳು, ಇಂಜಿನಿಯರ್ಸ್​ಗಳು, ಇತರರು ಇದ್ದರು.