ಬೋರನಕಣಿವೆ ಜಲಾಶಯದಿಂದ ಹಳ್ಳಿಗಳಿಗೆ ಕುಡಿವ ನೀರು ;  ಸಚಿವ ಜೆ.ಸಿ.ಮಾಧುಸ್ವಾಮಿ ಭರವಸೆ ;ತಿಮ್ಲಾಪುರ ಕೆರೆಗೆ ಬಾಗಿನ ಅರ್ಪಣೆ

ಹುಳಿಯಾರು : ಬೋರನಕಣಿವೆ ಜಲಾಶಯದಿಂದ ಕೆಂಕೆರೆ, ಹೊಯ್ಸಳಕಟ್ಟೆ, ಗಾಣಧಾಳು ಹಾಗೂ ಬರಕನಹಾಲ್ ಗ್ರಾಪಂ ವ್ಯಾಪ್ತಿಯ ಹಳ್ಳಿಗಳಿಗೆ ಹುಳಿಯಾರು ಪಟ್ಟಣಕ್ಕೆ ಕೊಡುತ್ತಿರುವ ಮಾದರಿಯಲ್ಲಿ ಶುದ್ಧ ನೀರು ಕೊಡಲಾಗುವುದು ಎಂದು ಸಚಿವ ಜೆ.ಸಿ.ಮಾಧುಸ್ವಾಮಿ ತಿಳಿಸಿದರು.

ಹುಳಿಯಾರು ಸಮೀಪದ ತಿಮ್ಲಾಪುರ ಕೆರೆ ಹೇಮಾವತಿ ನದಿ ನೀರಿನಿಂದ ಕೋಡಿ ಬಿದ್ದ ಹಿನ್ನೆಲೆಯಲ್ಲಿ ಬಾಗಿನ ಅರ್ಪಿಸಿ ಮಾತನಾಡಿದ ಅವರು, ಸಣ್ಣ ನೀರಾವರಿ ಇಲಾಖೆಯಿಂದ ಚಿಕ್ಕನಾಯಕನಹಳ್ಳಿ ತಾಲೂಕಿನ 122 ಕೆರೆಗೆ ಒಟ್ಟು 260 ಕೋಟಿ ರೂ, ತಿಪಟೂರು ತಾಲೂಕಿಗೆ 200 ಕೋಟಿ ರೂ. ಅನುದಾನ ನೀಡಲಾಗಿದೆ. ಮುಂದೆ ತುರುವೇಕೆರೆ ತಾಲೂಕಿಗೆ 80 ಕೋಟಿ ರೂ, ಬೆಳ್ಳಾವಿ, ಕೋರಾ, ಕಳ್ಳಂಬೆಳ್ಳ ಹೋಬಳಿಗೆ 260 ಕೋಟಿ ರೂ. ಮಂಜೂರು ಮಾಡಿಸಿರುತ್ತೇನೆ ಎಂದರು.

ಇದೇ ಹೇಮಾವತಿ ನೀರಿತ್ತು. ಇದೇ ವ್ಯವಸ್ಥೆಯಿತ್ತು. ಆದರೆ ತುಮಕೂರು ಜಿಲ್ಲೆ ನೀರು ನೋಡುತ್ತಿರಲಿಲ್ಲ. ಪ್ರತಿ ಸಲ ನೀರಿಗಾಗಿ ಹೋರಾಟ, ಗಲಾಟೆ ನಡೆಯುತ್ತಿತ್ತು. ಆದರೆ 3 ವರ್ಷಗಳಿಂದ ಜಿಲ್ಲೆಯಲ್ಲಿ ನೀರಿಗಾಗಿ ಒಂದೇ ಒಂದು ಹೋರಾಟ ನಡೆದಿಲ್ಲ. ಆ ರೀತಿ ಜಿಲ್ಲೆಯಲ್ಲಿ ನೀರು ಹರಿಸಿದ್ದೇನೆ. ಮತ ನೀಡಿ ಗೆಲ್ಲಿಸಿದ ಮತದಾರರು ಹೆಮ್ಮೆ ಪಡುವಂತೆ ಆಡಳಿತ ಮಾಡುತ್ತಿರುವ ತೃಪ್ತಿ ನನಗಿದೆ ಎಂದು ತಿಳಿಸಿದರು.

ಜಿಪಂ ಮಾಜಿ ಸದಸ್ಯೆ ಮಂಜುಳಮ್ಮ, ತಾಪಂ ಮಾಜಿ ಅಧ್ಯಕ್ಷ ಕೆಂಕೆರೆನವೀನ್, ಹೊಸಹಳ್ಳಿಜಯಣ್ಣ, ನಿರಂಜನ್, ಕೇಶವಮೂರ್ತಿ, ಹರ್ಷ, ಕೆಂಕೆರೆ ಗ್ರಾಪಂ ಅಧ್ಯಕ್ಷ ಕೆ.ಸಿ.ವಿಕಾಸ್, ದೊಡ್ಡಬಿದರೆ ಗ್ರಾಪಂ ಅಧ್ಯಕ್ಷ ರಂಗಸ್ವಾಮಿ, ಬಿಜೆಪಿ ಮುಖಂಡರಾದ ಬುಕ್ಕಾಪಟ್ಟಣ ಮಂಜುನಾಥ್, ಬರಕನಹಾಲ್ ವಿಶ್ವನಾಥ್, ನಂದಿಹಳ್ಳಿಶಿವಣ್ಣ, ಅಶೋಕ್‌ಬಾಬು, ರಾಮಣ್ಣ, ಶಿವರಾಜ್, ಬಸವರಾಜು ಇದ್ದರು.