ಉಡುಪಿ: ಮೀನುಗಾರಿಕಾ ಋತು ಪ್ರಾರಂಭವಾಗಿ ಮಲ್ಪೆ ಬಂದರಿನಿಂದ ಆಳ ಸಮುದ್ರ ಮೀನುಗಾರಿಕೆಗೆ ತೆರಳುತ್ತಿರುವ ಬೋಟುಗಳಿಗೆ ಭಾರೀ ಪ್ರಮಾಣದಲ್ಲಿ ಬೋಂಡಾಸ್ ಮೀನುಗಳು ಲಭಿಸುತ್ತಿದ್ದು, ಮಾರುಕಟ್ಟೆಯಲ್ಲಿ ಬೇಡಿಕೆ ಕುಸಿದಿರುವುದರಿಂದ ಕೆಜಿಗೆ 400 ರಿಂದ 500 ರೂ. ಇದ್ದ ದರ ಈ ವರ್ಷ ದಿಢೀರ್ 100 ರೂ.ಗೆ ಕುಸಿದಿದೆ.
ಆ.7ರಂದು ಮಲ್ಪೆ ಬಂದರಿನಿಂದ ತೆರಳಿದ ನೂರಾರು ಆಳಸಮುದ್ರ ಮೀನುಗಾರಿಕಾ ಬೋಟುಗಳು 10 ದಿನಗಳ ಮೀನುಗಾರಿಕೆ ಮುಗಿಸಿ ಕಳೆದ ಎರಡು ಮೂರು ದಿನಗಳಿಂದ ಮಲ್ಪೆ ಬಂದರಿಗೆ ವಾಪಸಾಗುತ್ತಿದೆ. ಎಲ್ಲಾ ಬೋಟ್ಗಳಲ್ಲಿ ಈ ಬಾರಿ ಟನ್ ಗಟ್ಟಲೆ ಬೊಂಡಾಸೆ ಮೀನುಗಳೇ ಲಭಿಸಿದ್ದು, ಇದರಿಂದ ಬಂದರಿನಲ್ಲಿ ಬೊಂಡಾಸ್ ಮೀನುಗಳ ರಾಶಿ ಕಾಣ ಸಿಗುತ್ತಿದೆ.
ಬೊಂಡಾಸ್ ಮೀನಿಗೆ ಯುರೋಪ್ ದೇಶಗಳಲ್ಲಿ ಹೆಚ್ಚಿನ ಬೇಡಿಕೆಗಳಿದ್ದರಿಂದ ಮಲ್ಪೆಯಿಂದ ರಫ್ತು ಆಗುತ್ತಿತ್ತು. ಆದರೆ ಕಳೆದ ಮಾರ್ಚ್ನಿಂದ ಯುರೋಪ್ ದೇಶಗಳಲ್ಲಿ ಆರ್ಥಿಕ ಹಿಂಜರಿತ ಕಂಡುಬಂದಿರುವುದರಿಂದ ಮೀನಿಗಳಿಗೆ ಬೇಡಿಕೆ ಇಲ್ಲವಾಗಿದೆ. ಇದರ ಪರಿಣಾಮವಾಗಿ ಬೊಂಡಾಸ್ ಮೀನಿನ ದರ ಕೂಡ ಪಾತಾಳಕ್ಕೆ ಕುಸಿತ ಕಂಡಿದೆ. ಬೊಂಡಾಸ್ ಮೀನಿನ ಬಂಪರ್ ಸಿಕ್ಕರೂ ಅದರ ದರ ಕುಸಿದಿರುವುದರಿಂದ ಮೀನುಗಾರರಿಗೆ ಸಾಕಷು ನಷ್ಟ ಉಂಟಾಗಿದೆ. ಒಂದೆಡೆ ಡೀಸೆಲ್ ಬೆಲೆ ಏರಿಕೆ, ಇನ್ನೊಂದು ಕಡೆ ಮೀನಿನ ದರ ಇಳಿಕೆಯಿಂದ ಮೀನುಗಾರಿಕೆಗೆ ಈ ಋತುವಿನ ಆರಂಭದಲ್ಲಿಯೇ ದೊಡ್ಡ ಹೊಡೆತ ಬಿದ್ದಿದೆ.
ಬೊಂಡಾಸ್ ಮೀನಿನ ಫಸ್ಟ್ ಗ್ರೆಡ್ಗೆ ಕಳೆದ ಮಳೆಗಾಲದ ಇದೇ ಅವಧಿ ಯಲ್ಲಿ ಕೆ.ಜಿ. 400-500ರೂ. ದರ ಇತ್ತು. ಆದರೆ ಇವತ್ತು ಅದರ ದರ ಕೆ.ಜಿ.ಗೆ 90ರೂ. ಆಗಿದೆ. ಅದೇ ರೀತಿ ಸೆಕೆಂಡ್ ಗೆ 50 ರೂ. ಮತ್ತು ಥರ್ಡ್ಗೆ ಕೆ.ಜಿ.ಗೆ 15 ರೂ. ಬಂದು ತಲುಪಿದೆ.