ತುಮಕೂರು: ನಗರ ಬಿಜೆಪಿ ಶಾಸಕ ಜಿ.ಬಿ.ಜ್ಯೋತಿಗಣೇಶ್ ಡಿಎನ್ಎ ಕಾಂಗ್ರೆಸ್ನದ್ದು ಎಂದು ಸಚಿವ ಜಿ.ಪರಮೇಶ್ವರ ಹೇಳಿದ್ದು ಸಾಕಷ್ಟು ಇರಿಸುಮುರಿಸಿಗೆ ಕಾರಣವಾಯಿತು.
ಜ್ಯೋತಿಗಣೇಶ್ ಮನಸ್ಸೆಲ್ಲೋ ಇದೆ. ಅವರಿಗೊಂತರಾ ಇಕ್ಕಟ್ಟು ನನಗೂ ಗೊತ್ತಿದೆ. ಅವರ ಡಿಎನ್ಎನೇ ಕಾಂಗ್ರೆಸ್ನದ್ದು. ಇಲ್ಲ ಅನ್ನಲಿ ನೋಡೋಣ ಎಂದು ತುಮಕೂರು ದಸರಾ ವೇದಿಕೆ ಕಾರ್ಯಕ್ರಮದಲ್ಲಿ ಹಾಸ್ಯಮಿಶ್ರಿತ ದಾಟಿಯಲ್ಲಿ ಹೇಳಿದರು.
ಸಚಿವರ ಈ ಹೇಳಿಕೆಯಿಂದ ತೀವ್ರ ಮುಜಗರಕ್ಕೊಳಗಾದ ಜ್ಯೋತಿಗಣೇಶ್, ಸರ್ ನಾನು ರಾಜಕೀಯಕ್ಕೆ ಬರಬೇಕು ಅಂದುಕೊಂಡಿರಲಿಲ್ಲ. ನಮ್ಮ ತಂದೆ ಸೇರಿ ಯಾರ್ಯಾರು ಯಾವ ಪಕ್ಷದಲ್ಲಿದ್ದರು? ಈಗ ಎಲ್ಲಿದ್ದಾರೆ ಎಂಬುದು ಎಲ್ಲರಿಗೂ ಗೊತ್ತಿದೆ. ಯಡಿಯೂರಪ್ಪ ಅವರ ಕಾರಣಕ್ಕೆ ನಾನು ರಾಜಕೀಯ ರಂಗಕ್ಕೆ ಪ್ರವೇಶ ಮಾಡಿದೆ ಎಂದು ಸ್ಪಷ್ಟಪಡಿಸಿದರು.
ತುಮಕೂರಿಗೆ ಷಡಕ್ಷರಿಗೆ ಆಹ್ವಾನ: ತಿಪಟೂರು ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ ಮಹಿಳೆಯರ ಸಂಖ್ಯೆ ಹೆಚ್ಚಿದ್ದು ಮುಂದಿನ ದಿನಗಳಲ್ಲಿ ಮಹಿಳಾ ಮೀಸಲು ಕ್ಷೇತ್ರವಾಗುವ ಸಾಧ್ಯತೆ ಇದೆ. ಹಾಗಾಗಿ, ಷಡಕ್ಷರಿ ತುಮಕೂರಿಗೆ ಬಂದು ಸ್ಪರ್ಧಿಸಲಿ ಎಂದು ಪರಮೇಶ್ವರ್ ಹಾಸ್ಯ ಚಟಾಕಿಹಾರಿಸಿದರು.