ಬೆಣ್ಣೆ ಹಳ್ಳ ಸೇತುವೆ ಜಲಾವೃತ, ಸಂಪರ್ಕ ಕಡಿತ

ಬೆಳವಣಿಕಿ(ತಾ.ರೋಣ): ಬುಧವಾರ ಸಂಜೆ ಸುರಿದ ಮೃಗಶಿರ ಮಳೆಯಿಂದಾಗಿ ಸಮೀಪದ ಯಾವಗಲ್ಲ ಬಳಿ ಹರಿಯುವ ಬೆಣ್ಣೆ ಹಳ್ಳದ ಸೇತುವೆ ಸಂಪೂರ್ಣ ಜಲಾವೃತವಾಗಿದೆ.

ಬೆಣ್ಣೆಹಳ್ಳದ ದಂಡೆಗುಂಟ ಇರುವ ಸಾವಿರಾರು ಎಕರೆಯಲ್ಲಿ ಬಿತ್ತನೆ ಮಾಡಿರುವ ಹೆಸರು, ಗೋವಿನಜೋಳ, ಹತ್ತಿ, ಶೇಂಗಾ, ಅಲಸಂದಿ, ಉಳ್ಳಾಗಡ್ಡಿ, ಮೆಣಸಿನಕಾಯಿ ಮುಂತಾದ ಪೈರುಗಳಿಗೆ ಹಾನಿಯುಂಟಾಗಿದೆ. ಹಳ್ಳದ ದಂಡೆಯಲ್ಲಿರುವ ರೈತರ ಪಂಪಸೆಟ್​ಗಳು ನೀರಿನಲ್ಲಿ ಕೊಚ್ಚಿ ಹೋಗಿವೆ.

ಬೆಳವಣಕಿ, ಕೌಜಗೇರಿ, ಹಡಗಲಿ, ಹದ್ಲಿ ಗ್ರಾಮದ ಹಳ್ಳದ ದಂಡೆಯಲ್ಲಿರುವ ಎಲ್ಲ ಭೂಮಿಗಳಿಗೆ ನೀರು ನುಗ್ಗಿ ಬಿತ್ತಿದ ಬೆಳೆಗಳು ನೀರಿನಲ್ಲಿ ಕೊಚ್ಚಿ ಹೋಗಿವೆ. ರೈತರು ಹೆಚ್ಚು ಖರ್ಚು ಮಾಡಿ ಬಿತ್ತನೆ ಮಾಡಿದ್ದರು ಎಂದು ರೈತ ಹೋರಾಟಗಾರರಾದ ವೀರಪ್ಪ ಕುಸುಗಲ್ಲ, ಶರಣಪ್ಪ ಹದ್ಲಿ, ಮಲ್ಲಣ್ಣ ದಾದ್ಮಿ, ಶಿವಾನಂದ ಅಳಗವಾಡಿ, ಹನಮಂತಗೌಡ ಅಡೂರ, ಇತರ ರೈತರು ತಮ್ಮ ಅಳಲು ತೋಡಿಕೊಂಡರು. ಸ್ಥಳಕ್ಕೆ ಅಧಿಕಾರಿಗಳು ಭೇಟಿ ನೀಡಿ ಪರೀಶಿಲನೆ ಮಾಡಿದರು.