ದೊಡ್ಡಬಳ್ಳಾಪುರ : ಕೂಮಾರ್ಸನದಲ್ಲಿ ಭಾರ ಎತ್ತುವ ಮೂಲಕ ಮಹಿಳಾ ವಿಭಾಗದಲ್ಲಿ ಎ.ಜಿ.ಯಶಸ್ವಿನಿ ಹಾಗೂ ಪುರುಷರ ವಿಭಾಗದಲ್ಲಿ ದೊಡ್ಡಬಳ್ಳಾಪುರದ ನಿವಾಸಿ ಎಚ್.ಆರ್.ಶ್ರೀವತ್ಸರಾಜ್ ವಿಶ್ವ ದಾಖಲೆ ಪ್ರದರ್ಶನ ನೀಡಿ ಗಮನ ಸೆಳೆದಿದ್ದಾರೆ.
ದೊಡ್ಡಬಳ್ಳಾಪುರದ ಸನ್ಶೈನ್ ಫಿಟ್ನೆಸ್ ಸೆಂಟರ್ನಲ್ಲಿ ಅ.14ರಂದು ನಡೆದ ವಿಶ್ವ ದಾಖಲೆಯ ಪ್ರದರ್ಶನದಲ್ಲಿ ಶ್ರೀ ರಾಮಕೃಷ್ಣ ಯೋಗ ಶಿಕ್ಷಣ ಕೇಂದ್ರದ ವಿದ್ಯಾರ್ಥಿನಿ ಎ.ಜಿ.ಯಶಸ್ವಿನಿ ಕೂಮಾರ್ಸನದಲ್ಲಿ 215 ಕೆ.ಜಿ. ಭಾರ ಎತ್ತಿ ಮಹಿಳಾ ವಿಭಾಗದಲ್ಲಿ ಸಾಧನೆ ಮಾಡಿದ್ದಾರೆ.
ಮೂಡುಬಿದಿರೆಯ ಆಳ್ವಾಸ್ ಪ್ರತಿಷ್ಠಾನ ಶಿಕ್ಷಣ ಸಂಸ್ಥೆಯ ವಿದ್ಯಾರ್ಥಿ ಎಚ್.ಆರ್.ಶ್ರೀವತ್ಸರಾಜ್ ಇದೇ ಆಸನದಲ್ಲಿ 265 ಕೆ.ಜಿ. ಭಾರ ಎತ್ತಿ ಪುರುಷರ ವಿಭಾಗದಲ್ಲಿ ದಾಖಲೆ ಪ್ರದರ್ಶಿಸಿದರು. ಯೋಗಾಭ್ಯಾಸದ ಮೂಲಕ ದೈಹಿಕ ಸಾಮರ್ಥ್ಯ, ಏಕಾಗ್ರತೆ ಹಾಗೂ ಶಿಸ್ತು ಬೆಳೆಸಿಕೊಳ್ಳಬಹುದು ಎಂಬುದಕ್ಕೆ ಈ ಪ್ರದರ್ಶನ ಸಾಕ್ಷಿಯಾಯಿತು.
ವೈದ್ಯ ಡಾ.ವಿಜಯ್ ಕುಮಾರ್ ಮಾತನಾಡಿ, ಯೋಗಾಭ್ಯಾಸದ ಮಹತ್ವ ಹಾಗೂ ದೈಹಿಕ ಕ್ಷಮತೆ ವೃದ್ಧಿಸಿಕೊಳ್ಳುವಲ್ಲಿ ಅದರ ಪಾತ್ರದ ಕುರಿತು ಮಾಹಿತಿ ನೀಡಿದರು. ನಿಯಮಿತ ಯೋಗಾಭ್ಯಾಸವು ದೇಹದ ನಮ್ಯತೆ, ಸಮತೋಲನ ಮತ್ತು ಏಕಾಗ್ರತೆ ಸುಧಾರಿಸಲು ನೆರವಾಗುತ್ತದೆ. ಪ್ರತಿನಿತ್ಯದ ಯೋಗ ಅಭ್ಯಾಸದಿಂದ ಆರೋಗ್ಯವೂ ಸಾಕಷ್ಟು ಸುಧಾರಿಸಲಿದ್ದು, ಹೊಸ ಉತ್ಸಾಹ ಮೂಡುತ್ತದೆ ಎಂದರು.